Late 120 - Tedim Bible

Huh Ding Ngetna

¹ Ka cihmawh ciangin Topa’ tungah ka kiko a, amah in hong dawng hi.

² Topa aw, mizuaute le mikhemte’ kiang panin kei hong honkhia in.

³ Mikhem theite aw, note’ tungah bang hong kipia ding a, note’ tungah bang hong kihih ding ahi hiam?

⁴ Galhang pa’ thal hiamte le sesing hol-am hi ding hi.

⁵ Note lakah ka omkhak pen Meshek gam sungah tenkhak sangin haksazaw a, Kedar mite lakah tenkhak sangin siahuaizaw hi.

⁶ Gal kilemna a deih lo mite lakah sauvei ka teng luakha hi.

⁷ Kei pen gal kilemna a ngaihsun mi ka hi hi. Ahih hangin kilemna ding thu ka gen ciangin amaute in galkido ding utna tengin nei uh hi.