Late 119 - Tedim Bible

Pasian’ Thu Ngaihsut Ngiungeuna

¹ Amau’ gamtatna-ah paubaan om loin Topa’ ngeina sungah a gamtate thupha ngah ahi hi.

^2-3 Ama thuhilhnate zui-in, a lungsim khempeuh uh tawh amah zongin, khialhna zong bawl loin, ama lampi a zuite, thupha ngah ahi hi.

⁴ Nangma thuhilhte limtakin zuih dingin thu nong pia hi.

⁵ Nangma ngeina kipte zuihna-ah ka gamtatna kip tahen.

⁶ Na thupiakte khempeuh mitsuanin nei ka hih manin, kei ka maizum kei ding hi.

⁷ Nangmah biakna ngeina kipte ka sin khit ciangin lungsim thutang tawh nangmah kong phat ding hi.

⁸ Nangma ngeina kipte ka zui ding hi; kei hong nusia suak kei in.

⁹ Tangval khat in ama gamtatna a siangtho mahmah dingin bangci kep ding ahi hiam? Nangma thu zuihna tawh ama gamtatna siangthosak thei ding hi.

¹⁰ Ka lungsim khempeuh tawh nang ka hong zong hi. Na thupiaknate panin kei hong pialsak kei in.

¹¹ Nangma tungah kong khialh loh nadingin ka lungsim sungah nangma thu ka khol hi.

¹² Topa aw, thupha ngah ta in; na ngeina kipte kei hong hilh in.

¹³ Nangma hong piak nangmah biakna ngeina kipte khempeuh ka gengen ding hi.

¹⁴ Hauhnate khempeuh sangin nangma thuhilhnate nuam ka sa zaw hi.

¹⁵ Nangma thuhilhnate lungngaingai-in, nangma lampite ka mitsuan ding hi.

¹⁶ Nangma ngeina kipte-ah nuam ka sa ding a, nangma thu ka mangngilh ngei kei ding hi.

¹⁷ Nungta-in nangma thu ka zuih theih nadingin na nasempa tungah hong cingh in.

¹⁸ Nangma thukham sung panin a lamdang nate ka muh theih nadingin keima mitte hong honsak in.

¹⁹ Kei pen hih leitungah peemta ka hi hi; kei’ kiang panin na thuphate seel kei in.

²⁰ Nangmah biakna ngeina kipte a tawntungin ka lunggulh venvan hi.

²¹ Nangmah in na thupiaknate panin a pialkhia, a kisamsiat, a kiphasakte na thuhilh hi.

²² Na thuhilhnate zui ka hih manin amau’ hong nuihsatna le hong simmawhnate panin kei hong suaktasak in.

²³ Uliante in kei hong langpangin thu a vaihawm uh hangin na nasempa in na ngeina kipte ngaihsunsun ding hi.

²⁴ Na thuhilhnate ka deih hi. Tuate pen keimah thu hong lakte ahi hi.

²⁵ Guallelin leivui lakah ka lum hi. Na thu omsa bangin kei hong hingsak in.

²⁶ Ka gamtatnate kong gen ciangin nangmah in kei nong dawng hi. Na ngeina kipte kei hong hilh in.

²⁷ Nangma ngeina kipte kei hong theitel sak in. Nangma nasep lamdangte ka ngaihsunsun ding hi.

²⁸ Dahna in kei hong vukcip hi. Nangma thu omsa bangin kei hong thakhauhsak in.

²⁹ A man lo lampite ka zuih khak loh nadingin kei hong kem in. Hong hehpih inla, na ngeinate hong hilh in.

³⁰ Thuman lampi ka teel khin a, na biakna ngeina kipte ka deih hi.

³¹ Topa aw, na thuhilhnate ka pom hi. Kei hong zahhuaisak kei in.

³² Keima theihna nong zaisak ciangin nangma thupiaknate lawpna tawh ka zui ding hi.

³³ Topa aw, na ngeina kipte kei hong hilh in. A mong dongin ka zui ding hi.

³⁴ Nangma thute kemin ka lungsim khempeuh tawh ka zuih theih nadingin thu theihtelna hong pia in.

³⁵ Nangma thupiakna lampi-ah kei hong paipih in. Bang hang hiam cih leh tua-ah nuam ka sa hi.

³⁶ Nangma thuhilhnate’ lamah ka lungsim awnsak inla, ngahna ding bekah awnsak kei in.

³⁷ Bangmahin a kimang lo nate, kei hong kinsak kei inla, nangma thu omsa bangin hong nungtasak in.

³⁸ Na thu hong mangte tungah na thuciamnate, na nasempa tungah hong kipsak in.

³⁹ Ka kihtak hong kikonate kei’ kiang pan heikhia in. Bang hang hiam cih leh nangmah biakna ngeina kipte hoih mahmah hi.

⁴⁰ En in, na thuhilhnate ka lunggulh hi. Na thumanna tawh kei hong hingsak in.

⁴¹ Topa aw, na ciamna bangin na itna kip, na hotkhiatna kei tungah hong tungsak in.

⁴² Tua hileh na thu ka muanna hangin kei hong zahkote ka dawnna ding hong om ding hi.

⁴³ Nangmah biakna ngeina kipte lamenin om ka hih manin a man thu hong gen theisak tawntung in.

⁴⁴ Nangma thu tatsat loin ka zui ngitnget ding hi.

⁴⁵ Nangma thuhilhnate zuih ding hanciam ka hih manin nuamtakin ka nungta ding hi.

⁴⁶ Kumpite’ mai-ah nangma thute ka gen ding a, maizumna ka thuak kei ding hi.

⁴⁷ Bang hang hiam cih leh ka deih nangma thupiakna zuih ding nuam ka sa hi.

⁴⁸ Keima deih ahi na thupiakte ka zahtak a, na ngeina kipte ka lungngaingai ding hi.

⁴⁹ Keimah nong lametsakna ahi na nasempa’ tungah na thuciamna hong phawk in.

⁵⁰ Hih pen ka thuakna-ah keima kihehnepna hi a, na thuciamna in kei tungah nuntakna hong pia hi.

⁵¹ Mi kiphasakte in kei hong zahko gawp uh a, ahih hangin nangma thupiakna panin kei ka pial kei hi.

⁵² Topa aw, hun lui lai-a nangmah biakna ngeina kipte ka ngaihsut ciangin ka lung hong nuam hi.

⁵³ Nangma thu a nusia migilote’ hangin ka heh a suak hi.

⁵⁴ Hih leitung ka omna peuhah nangma ngeina kipte la phuahin ka sa hi.

⁵⁵ Topa aw, zanin na min ka phawk a, nangma thu ka zui hi.

⁵⁶ Nangma thuhilhte zui ka hih manin keima tungah hih thupha hong tung hi.

⁵⁷ Topa pen keima tanh ahi hi. Na thute zuih ding ka kiciam hi.

⁵⁸ Ka lungsim khempeuh tawh na maipha kong ngen hi. Na thuciamna omsa bangin kei hong hehpih in.

⁵⁹ Ka gamtatnate ka ngaihsun a, na ngeinate zuih ding ka kiciam hi.

⁶⁰ Kei kinawhin, na thupiakte zuih ding ka zekai kei hi.

⁶¹ Migilote’ khau in kei hong vialh hangin nangma thu ka mangngilh tuan kei hi.

⁶² A thuman na ngeina kipte hangin nangmah a phat dingin zankim laitakin ka tho hi.

⁶³ Kei pen, na thuhilhte a zui, nangmah a hong zahtakte tawh a kikhawlpa ka hi hi.

⁶⁴ Topa aw, leitung pen nangma itna kip tawh kidim hi. Na ngeina kipte kei hong hilh in.

⁶⁵ Topa aw, na thuciamna bangin na nasempa na limbawl hi.

⁶⁶ Na thupiakte um ka hih manin thu khentel theihna le theihsiamna hong hilh in.

⁶⁷ Gim nong piak ma-in lam ka pial thei zel a, ahih hangin tu-in na thu ka zui hi.

⁶⁸ Nangmah na hoih a, a hoih nate na sem hi. Na ngeina kipte kei hong hilh in.

⁶⁹ Mi kiphasakte in kei’ thu, zuau vive gengen uh a, ahih hangin keimah in ka lungsim khempeuh tawh na thuhilhte ka zui hi.

⁷⁰ Amaute’ lungsim in thu theithei loin khikcip a, ahih hangin keimah in nangma thu sung nuam ka sa hi.

⁷¹ Nangma ngeina kipte ka sin theih nadingin gimna ka thuak pen kei a dingin hoih mahmah hi.

⁷² Nangma kam sung pana thu pen kham le ngun tul tampite sangin kei a dingin hoihzaw hi.

⁷³ Nangmah in kei hong piangsakin na hong bawl hi. Na thupiaknate ka sin theih nadingin thu theihtelna hong pia in.

⁷⁴ Nangma thuciamna muang ka hih manin nang hong zahtakte in kei hong mu-in lungdam ding uh hi.

⁷⁵ Topa aw, nangmah biakna ngeina kipte man hi, ci-in ka thei a, na thumanna hangin kei gim na hong pia hi.

⁷⁶ Na nasempa tungah na thuciamna bangin keimah hong hehnem dingin na itna kip a baihsa-in hong omsak in.

⁷⁷ Ka nuntak theih nadingin kei hong hehpih in. Bang hang hiam cih leh nangma thu nuam ka sa hi.

⁷⁸ Mi kiphasakte zahhuaisak in. Bang hang hiam cih leh amaute in khemna tawh kei hong lumlet uh hi. Ke’n ahihleh na thuhilhte ka lungngaingai ding hi.

⁷⁹ Na teci pannate a theih nadingun nang hong zahtakte kei’ lamah hong kiheisak in.

⁸⁰ Guallelh maizumna ka thuak loh nadingin nangma ngeina kipte a kicing takin a zuizo mi hong hisak ta in.

⁸¹ Na hong hotkhiat ding ka ngakngakna-in ka tha bei ta a, nangma thu muangin ka lamen hi.

⁸² Na thuciamnate ka etetna-in ka mitte thazaw ta hi. “Cik ciangin hong hehnem ding na hiam?” kong ci hi.

⁸³ Bang hang hiam cih leh kei pen meikhu lak a a kikoihdak savun-um tawh ka kibang a, ahi zongin nangma ngeina kipte ka mangngilh tuan kei hi.

⁸⁴ Na nasempa in bang tanvei ngaklai ding ka hi hiam? Kei hong bawlsiate cik ciangin thu khen ding na hi hiam?

⁸⁵ Nangma thu a zui lo, mi kiphasakte in keimah hong siahna-in gum a to uh hi.

⁸⁶ Nangma thupiakte khempeuh man taktak hi. Amaute in thuman lopi-in kei hong bawlsia uh hi. Kei hong huh in.

⁸⁷ Amaute in kei hong thatzo dektak uh hi. Ahih hangin na thuhilhnate ka mangngilh tuan kei hi.

⁸⁸ Na kam pana na teci pannate ka zuih theih nadingin na itna kip tawh kei hong hingsak in.

⁸⁹ Topa aw, vantungah nangma thu kip tawntung hi.

⁹⁰ Nangma thumanna khang tawntungin kip hi. Nangmah in leitung na kipsak a, om tawntung hi.

⁹¹ Nangma sehna tawh tu dongin amaute kip uh hi. Bang hang hiam cih leh na khempeuh nangma nasem ahi hi.

⁹² Nangma thu, nuam a sa lo hileng, ka gimthuakna-ah ka kisia khinzo ta ding hi.

⁹³ Nangma thuhilhte ka mangngilh ngei kei ding hi. Bang hang hiam cih leh tuate tawh nong nungtasak hi.

⁹⁴ Kei pen nangma a’ ka hi hi. Kei hong hon in. Bang hang hiam cih leh nangma thuhilhte zuih ding ka hanciam hi.

⁹⁵ Migilote in keimah a hong that dingin hong buk uh hi. Ahih hangin na teci pannate ke’n ka lungngaingai ding hi.

⁹⁶ A kicinga a kingaihsun nate khempeuh in mong a neihna ka mu khin a, ahih hangin na thupiakna in mong nei loin zai mahmah hi.

⁹⁷ Na thu deih mahmah ing. Sun tawntungin ka lungngaihngaih ahi hi.

⁹⁸ Na thupiakna in ka langte khempeuh sangin a pilzaw-in hong bawl hi. Bang hang hiam cih leh tua pen kei tawh omkhawm den hi.

⁹⁹ Ka siate khempeuh sangin thu ka telzaw hi. Bang hang hiam cih leh na teci pannate ka ngaihsunsun hi.

¹⁰⁰ Khanghamte sangin thu ka telzaw hi. Bang hang hiam cih leh na thuhilhnate ka zui hi.

¹⁰¹ Na thu ka zuih theih nadingin gamtatsia khempeuh ka pelh hi.

¹⁰² Nangmah in hong hilh khin na hih manin na biakna ngeina kipte panin kei ka pial kei hi.

¹⁰³ Nangma thute khum mahmah a, khuaizu sangin khumzaw hi.

¹⁰⁴ Na thuhilhnate hangin thu theihtelna ka ngah hi. Tua ahih ciangin a man lo lampi khempeuh ka mudah hi.

¹⁰⁵ Nangma thu pen lam hong lak ding meivak hi a, ka paina lampi-ah khuavak ahi hi.

¹⁰⁶ A thuman ahi nangmah biakna ngeina kipte a zui dingin ka kiciam khin a, ka kipsak khin hi.

¹⁰⁷ Nakpi takin gimna ka thuak hi. Topa aw, nong ciamsa bangin kei hong nungtasak in.

¹⁰⁸ Topa aw, phatin kong biaknate hong sang inla, nangmah biakna ngeina kipte kei hong hilh in.

¹⁰⁹ Nisimin ka nuntakna a lauhuai sungah om ngitnget a, ahih hangin nangma thu ka mangngilh tuan kei hi.

¹¹⁰ Migilote in kei thang hong siah uh a, ahih hangin na thuhilhnate panin kei ka pial kei hi.

¹¹¹ Nangmah biakna ngeina kipte tawntung keima luah ahi hi. Tuate pen keima lungdamna ahi hi.

¹¹² Nangma ngeina kipte ka sih mateng a zui tawntung dingin ka lungsim ka khensat hi.

¹¹³ Nangma tungah a thuman lote ka mudah a, ahih hangin keimah in nangma thu ka deih hi.

¹¹⁴ Nang pen keima bukna mun le kei hong hupa na hi hi. Na thuciamna ka muang hi.

¹¹⁵ No, siatna a bawlte aw, Pasian’ thupiakte ka zuih theih nadingin kei kiang panin paikhia un.

¹¹⁶ Kei ka nuntak theih nadingin na thuciamna tawh kizui-in kei hong huh inla, ka lametna-ah kei hong zahhuaisak kei in.

¹¹⁷ Ka suahtak theih nading le na ngeina kipte sungah nuamsa-in ka om ngitnget theih nadingin kei hong huh in.

¹¹⁸ Nangma ngeina kipte panin a pialkhiate khempeuh na nilkhia hi. Amau’ khem siamna a mawkna ahi hi.

¹¹⁹ Leitung a migilote khempeuh sik-ek bangin na ngaihsun hi. Tua ahih ciangin na teci pannate ka deih hi.

¹²⁰ Nang kong zahtakna hangin ka khuasikmul suak a, na thukhennate ka zahtak hi.

¹²¹ Thutang thumanin ka gamta hi. Hong nengniamte’ khut sungah kei hong nusia kei in.

¹²² Na nasempa a dingin nangmah hong kikham inla, mi kiphasakte hong nengniamsak kei in.

¹²³ Nangma hotkhiatna le a man na thuciamna hong tun ding ka etna-in ka mitte a gim ta hi.

¹²⁴ Na itna kip tawh kituakin na nasempa tungah hong bawl inla, na ngeina kipte kei hong hilh in.

¹²⁵ Kei pen na nasempa ka hi hi. Na thuhilhnate ka theih nadingin thu theihtelna hong guan in.

¹²⁶ Topa aw, nangma thu kipalsat khin ahih ciangin thu na khen ding hun hita hi.

¹²⁷ Tua ahih ciangin khamte, le kham hoihpente sangin nangma thupiakna ka deihzaw hi.

¹²⁸ Tua ahih ciangin na thuhilhnate khempeuh tawh a kituakin kei ka gamta a, a man lo lampi khempeuh ka mudah hi.

¹²⁹ Na thuhilhnate lamdang pha mahmah a, ka lungsim khempeuh tawh tuate ka zui hi.

¹³⁰ Na thute gentelna in khua vaksak a, thu thei lote tungah thu theihtelna a guan hi.

¹³¹ Na thupiakte ka lunggulhna-in ka kam ka-in ka leii ka kha hi.

¹³² Nangmah hong itte tungah na hih ngei bangin kei lamah hong kihei-in kei hong hehpih in.

¹³³ Na hong ciamsa bangin ka pukna ding panin hong kem inla, keima tungah siatna gualzosak kei in.

¹³⁴ Nangma thuhilhte ka zuih theih nadingin hong nengniamte’ kiang pan kei hong honkhia in.

¹³⁵ Na nasempa tungah na mai hong taangsak inla, na ngeina kipte hong hilh in.

¹³⁶ Mite in nangma thu zui lo uh ahih manin ka khitui hawk luanin a luang hi.

¹³⁷ Topa aw, nang na thuman a, na thukhennate zong thuman mahmah hi.

¹³⁸ Nangma koihsa ngeina kipte thumanin thutak hi.

¹³⁹ Ka galte in nangma thu kin het lo uh ahih manin keima hehna mei bangin a kuang hi.

¹⁴⁰ Na thuciamnate kician mahmah a, na nasempa in tuate deih mahmah hi.

¹⁴¹ Kei ka neu a, hong kisimmawh hi. Ahih hangin na thuhilhnate ka mangngilh tuan kei hi.

¹⁴² Nangma thumanna kip tawntung a, na thukham zong man tawntung hi.

¹⁴³ Dahna le lungkhamna ka tungah hong tung a, ahih hangin na thupiaknate nuam ka sakna ahi hi.

¹⁴⁴ Na teci pannate a tawntungin thuman hi. Thu theihtelna hong guan in; tua hileh ka nungta ding hi.

¹⁴⁵ Ka lungsim khempeuh tawh nang tungah kong kiko hi. Hong dawng in, Topa! Na ngeina kipte ka zui ding hi.

¹⁴⁶ Nang tungah kong kiko hi. Na thuhilhnate ka zuih theih nadingin kei hong hon in.

¹⁴⁷ Khuavak ma-in tho-in huhna ngenin kong kiko a, nangma thuciamna hong tun ding lamenin ka om niloh hi.

¹⁴⁸ Nangma thuciamna a lungngaingai dingin zan khuavakin ka zanhak hi.

¹⁴⁹ Topa aw, na itna kip tawh a kizui-in ka aw hong za inla, nangma thutang tawh kizui-in ka nuntakna hong kem in.

¹⁵⁰ Gitloh ngimna tawh kei hong bawlsia mite in kei hong nehta uh a, amaute in nangma thu ngaihsutin nei lo uh hi.

¹⁵¹ Ahih hangin Topa aw, kei kiangah nang nong nai a, na thupiaknate khempeuh ahi taktak vive ahi hi.

¹⁵² Tuate a tawntungin a kip dingin na bawl ahihna thu, nangma thuhilhnate panin sawtpi-in ka thei hi.

¹⁵³ Ka thuakna hong en inla, kei hong honkhia in. Bang hang hiam cih leh nangma thu ka mangngilh kei hi.

¹⁵⁴ Ka thu-ah hong pang inla, kei hong suaktasak in. Na ciamsa bangin kei hong honkhia in.

¹⁵⁵ Migilote, kihonkhia lo ding hi. Bang hang hiam cih leh amaute in na thukhamte zui lo uh hi.

¹⁵⁶ Topa aw, na hehpihna lian hi. Na biakna ngeina kip tawh a kituakin kei hong honkhia in.

¹⁵⁷ Kei hong bawlsiate, ka langte tam mahmah a, ahih hangin nangma thu panin kei ka pial tuan kei hi.

¹⁵⁸ Thuman lo mite ka muh ciangin ka kih mahmah hi. Bang hang hiam cih leh amaute in nangma thupiakte zui lo uh hi.

¹⁵⁹ Nangma thuhilhnate bangzah takin ka deihna hong ngaihsun in. Topa aw, na itna kip tawh a kizui-in kei hong hon in.

¹⁶⁰ Na thubulpi thumanna hi a, a man mahmah, nangmah biakna ngeina kipte khempeuh a tawntungin kip paisuak hi.

¹⁶¹ Uliante in thu om lopi-in kei hong bawlsia uh a, ahih hangin na thute lamdang sa mahmahin ka thupi ngaihsut hi.

¹⁶² Vankinusia tampi tak a ngah pa bangin na thuciamna-ah ka lung a dam mahmah hi.

¹⁶³ Zuaunate zadahin ka kih a, ahih hangin nangma thu ka deih mahmah hi.

¹⁶⁴ Nangmah biakna ngeina kipte hangin nisimin sagihvei nang kong phat hi.

¹⁶⁵ Nangma thu a deihte in lungnopna lianpi ngah uh a, amaute a tuksakzo ding bangmah om lo hi.

¹⁶⁶ Topa aw, nong hotkhiat ding ka ngak a, na thupiakte ka sem hi.

¹⁶⁷ Na thuhilhnate ka zui a, tuate ka nak deih mahmah hi.

¹⁶⁸ Na thuhilhnate le na ngeina kip omte khempeuh hoihtakin ka zui a, ka gamtatna khempeuh nangmah in na hong mu hi.

¹⁶⁹ Topa aw, kong kikona aw, na kiang hong tung hen la, nangma thu omsa tawh kizui-in thu theihtelna kei hong guan in.

¹⁷⁰ Keima thumna in na kiang hong ban hen la, nangma thu omsa tawh kizui-in kei hong honkhia in.

¹⁷¹ Na ngeina kipte kei hong hilh na hih manin kong phat tawntung ding hi.

¹⁷² Na thupiak khempeuh man mahmah ahih manin nangma thu phatna la ka sa ding hi.

¹⁷³ Nangma thuhilhte hong zui ka hih manin keimah hong huh dingin a kigingsa-in om tawntung in.

¹⁷⁴ Topa aw, nong hotkhiat ding ka lamen a, nangma khut sungah nuam ka sa mahmah hi.

¹⁷⁵ Nang kong phat theih nadingin kei hong nungtasak inla, nangmah biakna ngeina kipte kei hong huhsak in.

¹⁷⁶ A gammang tuu bangin lam ka pial khin hi. Tua ahih manin na nasempa hong zong in. Bang hang hiam cih leh nangma thupiaknate ka pelh kei hi.