Late 115 - Tedim Bible

Milim A Haihuaina le Topa Muanna

¹ Kote tungah hi loin, Topa aw, kote tungah hi loin, na itna kip le na thumanna hangin nangma tungah minthanna om tahen.

² Bang hangin minam dangte in, “Amaute’ Pasian koi-ah om ahi hiam?” ci laizang ding ahi uh hiam?

³ Vantungah eite’ Pasian om a, ama ut peuhpeuh a hih hi.

⁴ Amau’ milimte pen ngun le kham hi lel a, mihingte’ khut tawh a kibawl ahi hi.

⁵ Amaute in kam nei napi-in pau thei lo uh a, mit nei napi-in khua mu thei lo uh hi.

⁶ Amaute in bil nei napi-in khua za lo uh a, nak nei napi-in a nam thei lo uh hi.

⁷ Amaute in khut nei napi-in lawng thei lo uh a, khe nei napi-in pai thei lo uh hi. Amaute in aw gingsak thei lo uh hi.

⁸ Tuate a bawlte le tuate a muangte khempeuh pen tuate mah tawh kibang uh hi.

⁹ Israel-te aw, Topa muang un. Amah pen note hong huhpa le hong hupa ahi hi.

¹⁰ Aaron innkuante aw, Topa muang un. Amah pen note hong huhpa le hong hupa ahi hi.

¹¹ Topa a zahtakte aw, Topa muang un. Amah pen note hong huhpa le hong hupa ahi hi.

¹² Topa in eite hong phawk a, thupha hong pia ding hi. Amah in Israel mite, thupha hong pia ding a, amah in Aaron innkuante thupha hong pia ding hi.

¹³ Amah in Topa a zahtakte a lian a neu-in thupha hong pia ding hi.

¹⁴ Topa in note le na tate uh hong pungsak tahen.

¹⁵ Van le lei a bawl Topa in note thupha hong pia tahen.

¹⁶ Vantung pen Topa a’ hi a, ahih hangin leitung pen mihingte tungah hong pia khin hi.

¹⁷ Misite ahi a, gamdaihna sungah a pai peuhpeuhte in ahi zongin Topa phat lo uh hi.

¹⁸ Ahih hangin eite in tu a kipanin a tawntungin Topa i phat ngitnget ding hi. Topa phat un.