Late 11 - Tedim Bible

Topa pen Midikte’ Belh

¹ Ke’n Topa ka bel hi. Bang hangin ka tungah, “Vasa leeng bangin mualtungah tai in;

² bang hang hiam cih leh, en in, migilote in khuamial sung panin lungsim thutangte a kap dingin a thalkhau uhah thaltang bulhin a thal uh a keek uh hi.

³ Bulpite kisusia khin leh midikte in bangcih thei nawn ding hiam?” nong ci thei diam?

⁴ Topa a biakinn siangtho sungah om a, Topa’ tokhom vantungah om hi. Amah in mihingte hong en a, mihingte’ gamtatna khempeuh a theitel hi.

⁵ Topa in midikte le migilote entel a, a ngongtat nuam mite a lungsim in mudah hi.

⁶ Amah in migilote tungah mei-am le kaat zusak ding a, amau’ ngah ding gimna huihsa mahmah hi ding hi.

⁷ Bang hang hiam cih leh Topa dik mahmah a, dik gamtatna a deih hi. Thutang mi in ama mai a mu ding hi.