Late 10 - Tedim Bible

Migilote Suksiat ding Ngetna

¹ Topa aw, bang hangin gamla din na hi hiam? Haksat hunin bang hangin nang bucip khong na hi hiam?

² Migilote in kiphatsakna tawh mizawngte uuk delh uh hi. Amau ngaihsut vaihawmna mahah amaute awksak in.

³ Bang hang hiam cih leh migilo in a lungsim deihna kisaktheihpih a, ngahna dingah a huaiham pa in Topa phuisamin a taisan hi.

⁴ Migilo in kiphatsakna lungsim nei a, Topa zong lo hi. Ama ngaihsutna khempeuhah, “Pasian om kei,” a ci hi.

⁵ A hihna khempeuhah a maa pai ngitnget hi. Na thukhennate khempeuh ama muhna in a batzawh lohin sang mahmah a, a galte khempeuh ahihleh amah in nehpiksan lel hi.

⁶ A lungsim sungah, “Kiling ngei kei ning; khang tawntungin kamsiatna tuak kei ning,” ci-in a ngaihsun hi.

⁷ Ama kampaute pen hamsia, khemna, le netniamna tawh kidim a, siatna le man lohna bekbek thugenin a nei tawntung hi.

⁸ Khuaneute sungah mi a buksimin tu a, munbu kawmah mawhnei lote a that hi. Ama mit in mi tuahsiate ensim a,

⁹ humpinelkai in a kuahawm sung pan a buk bangin amah in buksimin, mizawngte a man dingin buk a, a ngenthang sungah mizawngte kai-in a man hi.

¹⁰ A thatanghat thu tawh mi tuahsia mi sucipin a puksuk sak hi.

¹¹ Ama lungsim sungah, “Hih thute pen Pasian in mangngilh hi; a mai seel hi, en lo ding hi,” ci-in a ngaihsun hi.

¹² Tho in, Topa! Pasian aw, na tha hong san inla, a thuakte mangngilh kei in.

¹³ Bang hangin migilo in Pasian simmawh a, a lungsim sungah, “Hong thei kei na’n teh,” ci ahi hiam?

¹⁴ Nangmah in na mu hi. Na huh theih nadingin haksatna le gimna a thuakte na ciamteh hi. A tuahsia mi in nangma tungah ama pumpi hong ap a, pa nei lote a huhpa na hi hi.

¹⁵ Giloin siatna a bawlte’ khut kuaitan gawp inla, siatna a bawlzo nawn lo dingin gim pia in.

¹⁶ Topa, a tawntungin kumpi hi a, ama leitang panin minam dangte beimang ding hi.

¹⁷ Topa aw, lungnemte’ deihna na ngai ding hi. A lungsim uh na hatsak ding a, na bil na ngat ding hi.

¹⁸ Pa nei lote le netniamna a thuakte tungah nang na thutang a, leitung mite in launa tuakkha nawn lo ding uh hi.