Kolose 4 - Tedim Bible

¹ Tote aw, note in zong vantungah To khat na neihna uh phawk unla, na silate uh a kilawm a kituakin bawl un.

² Lungsim takpi tawh thu ngen tawntung unla, kidawm kawmin lungdamna tawh thu ngen un.

³ Mite kiangah Khrih’ thusim hilhtheih nadingin Pasian in kote tungah hunpha hong piaktheih nadingin thu hong ngetsak un. Ka thongkiatna pen hih thu hang mah ahi hi.

⁴ Mite’ teltheih dingin a kitel takin ka gentheih nadingin thu hong ngetsak un.

⁵ A pualam mite tungah a kilawm a kituakin gamta unla, hunhoih na ngah khempeuh uh na valkhongsak ngei kei un.

⁶ Kam na pau uh ciangin mi’ zaknop, mi’ ngaihnop dingin na pau un. Tua hileh na kihopih uh mite khempeuh a dingin phattuamna a nei kam a pau na hi ding uh hi.

Vaikhakna

⁷ Topa’ nasepna-ah citakin a manpha mahmah ka naseppih uh ka sanggam uh Tikhikas in kei’ thu a kicing takin note kiangah hong gen ding hi.

⁸ Hih lai-a kote’ omzia hong gen ciangin note’ lungsim a noptheih nadingin amah a hong paisak ka hi hi.

⁹ Note’ khuapih mi, a citak i sanggam it pa Onesimas zong ka hong zuisak hi. Amau tegel in hih lai-a thupiang khempeuh note kiangah hong gen ding uh hi.

¹⁰ Kei tawh thong a kiakhawm Aristarkhas in note hong hopih hi. Barnabas’ sanggamnu’ tapa Marka in zong hong hopih hi (amah hong pai ciangin hoihtakin na pawlbawl un, ci-a hong kigen pa ahi hi).

¹¹ Justas zong a kici zel Jesuh in zong note hong hopih hi. Vun-atna a zang Jew mi Khristian a hong suakte lak panin hih mi thumte bek, Pasian thu-ah ka naseppih lakah a hong kihel ahi hi. Ka nasepna-ah amaute in nakpitakin hong huh uh hi.

¹² Jesuh Khrih nasem, note’ makai Epafras in zong hong hopih hi. Pasian’ deihna bangin note nungta-in, lungsim khanghamin kiptakin na omtheih nadingun amah in thu hong ngetsak tawntung hi.

¹³ Amah in note-a’ ding a kipan Laodisia khua le Hierapolis khua mite a dingin nakpitakin na a sepna thu ka thei hi.

¹⁴ I it siavuanpa Luka le Demas in zong hong hopih uh hi.

¹⁵ Laodisia khua-a om i sanggamte le Nymfas le ama inn-a a kikhawm pawlpi mite na hopihsak un.

¹⁶ Hih ka hong laikhak na sim khit uh ciangin Laodisia khua-a om pawlpite zong na simsak unla, Laodisia khua pawlpite kiang pan hong pai ding lai zong note in na sim hamtang un.

¹⁷ Tua ciangin Arkhippas kiangah, “Pasian a dingin nasepna nang tungah hong kipia pen hoihtakin na zo in,” ci-in na gen un.

¹⁸ Keimah Paul’ khut mahmah tawh, Note ka hong hopih hi, cihna lai ka gelh ahi hi. Sikkhau khihna ka thuakna thu mangngilh kei un. Note khempeuh tungah Pasian’ hehpihna thupha hong tung tahen.