Kolose 3 - Tedim Bible

¹ Note pen Khrih tawh a thokik khinte na hih manun, Pasian’ taklam a kumpi tokhom tungah Khrih a tutna mun vantung thute ngaihsutin nei un.

² Vantungah a om thute ngaihsutin nei unla, leitungah a om thute ngaihsutin nei kei un.

³ Note a sikhin na hi uh a, note’ nuntakna pen Khrih tawh Pasian’ sungah a kiseelkhawm ahi hi.

⁴ Note’ nuntakna taktak Khrih ahih manin amah hong kilat ciangin note zong amah tawh hong kilang khawmin amah tawh na minthang khawm ding uh hi.

Nuntakna Lui le Nuntakna Thak

⁵ Tua ahih manin nulepa mawhna, a kilawm lo gamtatna, hukna lanna, a hoih lo lunggulhna, le milim biakna nam khat ahih manin huaihamna ahi note sungah a om leitung lungsimte na sisak un.

⁶ Ama thu a mang lo mite tungah hih bang gamtatna hangin Pasian’ hehna hong tung ding hi.

⁷ Note pen hih bangin gamta-in a nungta ngeite na hi uh hi.

⁸ Ahi zongin tu-in hehna, thangpaihna, muhdahna, gensiatna, kam hoih lo pauna cihte nei nawn kei un.

⁹ Ngeina lui le gamtatna lui khempeuh a beisakkhin na hihna uh kithei-in khatlekhat tungah zuauthu kigen nawn kei unla,

¹⁰ ngeina thak tawh kituakin gamta un. Eite a hong piangsak Pasian a kicing takin i theih semsem nadingin amah a sun dingin a hong thakbawl tawntung ahi hi.

¹¹ Tua ahih manin Gentail mi le Jew mi, vun-at mi le vun-at loh mi, khuapi mi le khuaneu mi, sila le sila ahi lo, cih bangin a kilamdanna om lo a, Khrih pen mi khempeuh a’ ding hi thei a, thu khempeuh a’ ding hi thei a, thu khempeuhah amah bek ahi hi.

¹² Pasian in note hong itin, hong teelin, ama mi siangthote hikhin na hih manun note pen hehpihna nei-in, migi-in, kiniamkhiatin, dikin, na lungduai ding uh ahi hi.

¹³ Note lakah khatlekhat a kilungkim lo na om uh ciangin khatlekhat na mawhna uh kimaisakin na kihuh ciat un. Topa in note’ mawhna hong maisak bangin note zong khatlekhat na mawhna uh na kimaisak ding uh hi.

¹⁴ Hihte khempeuh banah, mi khempeuh kilem takin a hong om khawmsak thei ahi ki-itna na bulphuh un.

¹⁵ Note pumkhat suakin a lungdam khawm dingin Pasian in a hong sap ahih mah bangin Khrih hong piak nopsakna in note’ lungsim hong uk ta hen la, lungdamin om ta un.

¹⁶ Khrih thu a cingtakin note lungsimah hong om hen la, pilna tawh khatlekhat thu kihilhin na kitai un. Pasian tungah lungdam kohna-in Thuciam Lui sunga late, la thakte, le biakna late na sa un.

¹⁷ Na kampauna, na gamtatnate khempeuh uhah, Topa Jesuh hangin Pa Pasian tungah lungdam kohna-in Jesuh min paulamin na hih ding uh hi.

Nuntak Thak sung Gamtatzia

¹⁸ Zite aw, Khristiante gamtat dingin a kilawm ahih mah bangin na pasalte uh thu na mang un.

¹⁹ Pasalte aw, na zite uh it unla, amaute tungah ngongtat kei un.

²⁰ Tate aw, na nu na pate uh thu man’ tawntung ding pen na Khristian nasep uh ahi hi. Tua bang thumanna in Pasian lungdamsak hi.

²¹ Pate aw, na tate un a thuak zawh loh zah dong dingin thuhilhin taii niloh kei un.

²² Silate aw, thu khempeuhah na leitung topa uh thu na mang un. Amau’ hong pahtak ding deihna tawh a hong muh sung bekin a hoihtatte hi kei unla, Topa na zahtakna uh hangin lungsim tak tawh gamta un.

²³ Mite’ nasem bangin kingaihsun loin, Pasian’ nasem bangin kingaihsun unla, na sep peuhpeuh uh lungsim takpi tawh lawpin sem un.

²⁴ Topa in note tungah thaman a hong piak ding lamtak phawk gige un. Tua bangin na sepna uhah Khrih Topa’ na a semsem na hi uh hi.

²⁵ A man loin a gamtate in ahihleh a gamtatna bangun thuak ding uh hi. Pasian in kuamah deidan loin amau’ gamtatna bang ciatin thu a khen ahi hi.