Kah la 5 - Tedim Bible

Hehpih Ding Ngetna

¹ Topa aw, kote tunga thupiangte hong phawk in. Hong en inla, ka maizumna uh hong mu in.

² Ka neihsa teng uh gamdang mite’ khut sungah tung mangkhin a, ka innsung uhah gamdang mite teng ta uh hi.

³ Ka pate uh gal in hong thahsak khin a, ka nute uh meigong suak khin uh hi.

⁴ Ka tuidawn tawm ding uh lei ding kul ta a, ka sing cihtawm ding uh lei ding kul ta hi.

⁵ Kalaoh van pua le la van pua bangin nakpitakin a hong kihawl gawpgawp hi. Gim mahmah hinapi tawlngakna ding hun a hong kipia kei hi.

⁶ Ka nuntak theih nadingun Assiria le Egypt-te kiangah an ngen dingin ka pai uh hi.

⁷ Ka pu ka pate un mawhna a bawl manun a si khin uh hi. Amaute’ mawhna kote in ka thuak uh hi.

⁸ Silate sangin a zahpihhuai zaw mite in kote hong uk tazen uh a, amaute’ khutsung panin kuamah in a hong honkhiazo kei hi.

⁹ Gam sung khempeuhah misuamte dim ahih manin, luangkham zen mahin an zong dingin ka pai uh hi.

¹⁰ Gilkial luat manin cisa-in ka nattun uh a, ka pumpi uh mei-am sa a bang hi.

¹¹ Zion mual le Judah gam sung khempeuhah ka zite uh le ka nungakte uh hong kibuansak hi.

¹² Makaite khempeuh hong kikhailupsak a, ka puteekte uh a hong kithusimsak kei hi.

¹³ Tangvalte sila bangin aana tawh an kigawisak a, naupangnote sing kitomsakin a lelh pipi uh a kipuasak hi.

¹⁴ Puteekte khuapi kongpi-ah tu nawn lo uh a, khangnote inla a sa nawn kei uh hi.

¹⁵ Lungnopna khempeuh bei mangkhin ta a, lungdamna khempeuh lungkhamna a suak ta hi.

¹⁶ Kisaktheihna ding bangmah om nawn lo a, mawh ihih manin gimna a thuak ihi hi.

¹⁷ I lungsim mahmah cina a, i khitui luangte in khua hong musak thei kei hi.

¹⁸ Zion mual gamdai ta a, kinusia khin ahih manin se-alte a kawi vak ta hi.

¹⁹ Ahih hangin Topa aw, nang na hih leh a tawntungin kumpi na hi a, hun tawp dongin na uk paisuak ding hi.

²⁰ Bang hangin sauveipi hong pampaih na hi hiam? Kote hong phawkkik nawn lo takpi ding na hi hiam?

²¹ Topa aw, kote hong kaikhawm kik in! Hong kaikhawm kik in! A beisa sauveipi lai mah bangin hong thaksuaksakkik in.

²² Kote hong nial tawntung takpi ding na hi hiam? Na hehna in ciangtan hun nei thei lo ding ahi hiam?