Joshua 20 - Tedim Bible

Bukna Khuapite Kiseh

¹ Tua ciangin Topa in Joshua kiangah,

^2-3 “Israel mite tungah hih bangin gen in: ‘Sawm lohpi-in ahi a, theih lohna hangin ahi zongin mi khat a that khapa a tai theih nadingin Moses tungtawnin nang tungah kong gen bukna khuapite teel in. Phulapa kiang panin note a dingin tua khuate pen bukna hi ding hi.

⁴ Hih khuapite khat peuhpeuhah amah tai-in khuapi kongpi tumna-ah ding ding a, tua khuapi upate kiangah a thu gentel ding hi. Tua ciangin amaute in khuapi sungah amah paipihin amah mun khat pia ding a, amaute tawh amah omkhawm ding hi.

⁵ Tua ciangin phulapa in amah a delh leh, tua pa tungah mi that pa pia lo ding uh hi. Bang hang hiam cih leh amah in theih lohna hangin a vengpa thatin, a beisa hun sungah ama tungah galneihna bangmah nei lo hi.

⁶ Thukhenna thuak dingin mihonte mai-ah a din mateng, le tua hun laitak a siampi lianpen pa a sih hun mateng, tua khuapi sungah amah om ding hi. Tua khit ciangin mi that khapa ama khua ama inn, a hong taikhiatna khua-ah paikik thei ding hi,’ ci-in gen in,” a ci hi.

⁷ Tua ahih ciangin amaute in Naftali mualtung gam sunga om Galilee gam sung panin Kedesh khua, Efraim mualtung gam sungah Shekhem khua, le Judah mualtung gam sungah Kiriatharba (Hebron a cihna) khuate a tuamkoih uh hi.

⁸ Jerikho nisuahna Jordan galkhatah Reuben minam sung panin mualzang sehnel gam a om Bezer khua, Gad minam sung panin Gilead gam sunga om Ramoth khua, le Manasseh minam sung panin Bashan gam sunga om Golan khuate a seh uh hi.

⁹ Hihte pen Israel mi khempeuh le amaute lakah a peem khualmi a dingin sawm lopi-in mi khat a that khapa pen mihonte mai-ah a din ma-in phulapa khutah a sih loh nadingin a tai theih nadinga a kiseh khuapite ahi hi.