Jonah 4 - Tedim Bible

Jonah’ Lungkim lohna le Pasian’ Hehpihna

¹ Ahih hangin tua thu hangin Jonah lungkim hetloin a heh hi.

² Topa’ kiangah thu ngen a, “Kong thum hi, Topa aw; ka gam sungah ka omlai pekin hici mah in teh, ci hi lo ka hi hiam? Hanciamin Tarshish khua-ah ka taisimna zong tua hang mah ahi hi; bang hang hiam cih leh nang pen a hehpih thei Pasian, a hehhak, a migi mahmah, siatna tunsak ding a kisiknuam Pasian na hihna kong thei hi.

³ Tua ahih ciangin Topa aw, tu-in ka nuntakna hong la in, ci-in kong thum hi. Bang hang hiam cih leh ka nuntak sangin sileng kei a dingin a hoihzaw hi,” a ci hi.

⁴ Topa in zong, “Na heh ding kilawm sa na hi hiam?” a ci hi.

⁵ Tua ciangin khuapi pualamah Jonah paikhia a, nisuahna lamah ama a’ ding bukno khat lamin tua lai-ah a tu hi. Tua khuapi bang hong ci ding hiam, cih a en dingin a buk liim nuai-ah tu-in a ngak hi.

⁶ Topa Pasian in zong Jonah a liah ding le a lungkhamna a tawldamsak dingin umgui khat a tungah a zaamsak hi. Tua ahih ciangin tua umgui hangin Jonah lungdam mahmah hi.

⁷ Ahih hangin a zingsang khuavak ciangin Pasian in tua umgui lungno khat nesak ahih manin a keu hi.

⁸ Ni hong suah ciangin Pasian in nisuahna lam panin huih a sa mahmah nungsak a, ni in zong Jonah’ luzang kapsuk veva ahih manin a gim mahmah hi. Tua ciangin amah in, “Ka nuntak sangin si leng kei a dingin hoihzaw hi,” ci-in a sih nading thu a ngen hi.

⁹ Ahih hangin Pasian in Jonah kiangah, “Tua umgui hangin na heh ding kilawm sa na hi hiam?” a ci hi. Jonah in, “Ka heh ding kilawm sa tham loin hehlua-in ka si zongin kilawm ka sa veve hi,” a ci hi.

¹⁰ Tua ciangin Topa in, “Nang in na gimpih lohpi, na khansak lohpi, zan khat thu-in hong piangin zan khat thu mahin a si tua umgui pammaih na sa hi.

¹¹ Tua ahihleh keimah in ganhing tampi tham lo, a taklam khut le a veilam khut nangawn a khenthei nai lo naupang tul za le tul sawmnih sangin a tamzawte’ tenna, a lian mahmah Nineveh khuapi pammaih sa lo ding ka hi hiam?” ci-in a dawngkik hi.