Jonah 2 - Tedim Bible

Jonah’ Lungdamkohna

¹ Tua ciangin Jonah in tua ngapi’ gil sung panin Topa a Pasian kiangah thu ngen a,

² “Ka cihmawhna panin Topa ka sam a, amah in kei hong dawng hi. Sihna gam Sheol panin kong kiko a, nangmah in ka aw nong za hi.

³ Tuipi thuk sungah kei nong khia a, tui in kei hong tuumcip hi. Na tuihualte khempeuh in kei hong tum hi.

⁴ Tua ciangin keimah in, ‘Na omna panin kei hong kihawlkhia hi. Na biakinn siangtho hong koici et kik thei ding ka hi hiam?’ ka ci hi.

⁵ Tui in kei hong tuamcip a, ka kimkotah hong umcih hi. Tuipi tunga lopate in ka lu hong vialcip hi.

⁶ Mualte’ bul tuipi taw dong ka va paisuk a, kong hong kikhaknelh tawntungna mun ka tun hangin tua Leihawmpi sung panin a nungta-in nong lato veve hi, Topa ka Pasian aw.

⁷ Kei ka lung a kiat ciangin Topa kong phawk a, ka thungetna, na biakinn siangtho sung, nangma kiang hong tung hi.

⁸ Kimanna a nei lo milim a biate in nangmah hong taisan uh hi.

⁹ Ahih hangin ke’n ahihleh lungdamna aw tawh biakna kong pia ding a, ka ciamsa thu ka tangtungsak ding hi. Topa’ kiang pan hotkhiatna hong pai hi,” a ci hi.

¹⁰ Tua ciangin Topa in tua ngapi sawl a, amah in lei keu tungah Jonah a luakhia hi.