Jonah 1 - Tedim Bible

Topa’ Kiang Pan Jonah Taikhia

¹ Topa in Amittai’ tapa Jonah tungah,

² “Kithawi inla, a lian mahmah Nineveh khuapi-ah va pai-in thu va hilh in; bang hang hiam cih leh amau’ gitlohna thu ka za khinzo hi,” a ci hi.

³ Ahih hangin Topa’ kiang pan Jonah taikhia-in Tarshish khua lamah a taisim dingin a kithawi zawsop hi. Joppa khua-ah paisuk a, Tarshish khua a zuan ding teembaw khat a mu hi. A sap man ding pia-in a tungah kah a, Topa’ kiang pan a taikhia dingin teembaw hawlte tawh Tarshish khua-ah a pai hi.

⁴ Ahih hangin Topa in tuipi tungah huih nakpi-in nungsak a, huihpi hatlua ahih manin teembaw a kisia dekdek hi.

⁵ Tua ciangin teembaw hawlte lau uh a, a pasian ciat uh’ kiangah a kiko ciat uh hi. Teembaw a zantuam nadingin a sunga vante tuipi sungah a paai uh hi. Tua bang hinapi-in teembaw sungtawng lamah Jonah na lutsukin a na ihmu hithiat hi.

⁶ Teembaw ukpa in amah a muh ciangin, “Ihmu pa aw, bang na cihna ahi hiam? Tho inla na pasian kiangah thu ngen in. I sih loh nadingin amah in eite hong ngaihsun khathei ding hi,” a ci hi.

⁷ Tua khit ciangin teembaw hawlte in, “Hong pai dih un. Kua’ hangin hih bang gimna ei’ tungah hong tung ahi hiam, cih i theih nadingin ai san dih ni,” ci-in khatlekhat a kikum uh hi. Ai a san uhleh Jonah tung a tu hi.

⁸ Tua ciangin amaute in, “Bang hangin hih gimna ei’ tungah hong tung ahi hiam, hong gen in. Na nasep bang ahi hiam? Koi lai pana hong pai na hi hiam? Na gam bang ahi hiam? Kua minam na hi hiam?” ci-in a dong uh hi.

⁹ Amah in, “Kei pen Hebru mi ka hi hi; tuipi le leitang a bawl, vantungte’ Pasian ahi Topa ka bia hi,” a ci hi.

¹⁰ Tua ciangin tua mite lau mahmah uh a, “Bang hangin hih bangin gamta mawk na hi hiam?” a ci uh hi. Bang hang hiam cih leh Topa’ kiang pan amah a taikhiasim ahihlam a gen khitsa ahih manin a thei khinzo uh hi.

¹¹ Tua ciangin amaute in, “Ei a dingin tuipi a hong daihtheih nadingin nang bang kong cih ding uh hiam?” ci-in a dong uh hi. Bang hang hiam cih leh huihpi lauhuai semsem hi.

¹² Amah in, “Hong domto unla, tuipi sungah hong khia un; tua hileh no a dingin tuipi a hong dai ding hi; bang hang hiam cih leh hih huihpi na thuakna uh keima hang ahi hi, cih ka thei hi,” ci-in a dawngkik hi.

¹³ Tua bang a cih hangin amaute in teembaw a khawlsak dingin hahkatin lei lamah a hot teitei uh hi. Ahih hangin a hihzo kei uh hi; bang hang hiam cih leh huihpi a hat semsem hi.

¹⁴ Tua ahih ciangin Topa’ kiangah amaute kiko-in, “Topa aw, hih mipa ka sihsak manun kote hong sisak kei inla, mi that hi, ci-in hong ngawh kei ta in, ci-in kong thum uh hi; bang hang hiam cih leh Topa aw, nangmah in pha na sak banga na bawl ahi hi,” ci-in thu a ngen uh hi.

¹⁵ Tua ciangin Jonah domto-in tuipi sungah a khiat uhleh tuipi a dai pah hi.

¹⁶ Tua ciangin tua mite in Topa kihta mahmah uh a, Topa’ tungah biakna pia-in thuciamna a bawl uh hi.

¹⁷ Ahih hangin Jonah a nawmvalh dingin Topa in ngapi khat a geelkholhsa hi a, tua ngapi’ gil sungah Jonah sun thum le zan thum sung a om hi.