Jeremiah 52 - Tedim Bible

Zedekiah’ Ukna

¹ Zedekiah kumpi a suahin kum sawmnih le kum khat pha a, Jerusalem khua-ah kum sawm le kum khat sung a uk hi. A nu’ min Hamutal hi a, Libnah khua-a teng Jeremiah’ tanu ahi hi.

² Amah in kumpi Jehoiakim bangmahin Pasian’ hoihsak lohte hong sem hi.

³ Topa in Jerusalem khuamite le Judah gam mite ama kiang panin a hawlkhiatna zah dong dingin a hehna a lian hi. Zedekiah in Babylon kumpipa langpan’ hi.

Jerusalem A Kilakna

⁴ Tua ciangin amah kumpi a suahzawh a kum kua kum, a kha sawmna, a ni sawm ni-in, Babylon kumpipa Nebukhadnezzar in a galkap khempeuh tawh Jerusalem khua a sim dingin hong kuan uh a, khuapi kimkotah galdalna a phut uh hi.

⁵ Zedekiah in a ukzawh kum sawm le kum khat a phak dong khuapi a kisim hi.

⁶ Tua kum a kha lina, a ni kua ni ciangin khuapi sungah kial nasia lua ahih manin, mite in annek ding a nei nawn kei uh hi.

⁷ Tua ciangin khuakulhpi kiphulet a, khuapi kimkotah Khaldea mite om napi-in, zan laitakin kumpipa’ huan gei-a kulh tegel kikal-a kongpi tawnin galkapte taikhiasim uh a, Arabah gam lam a manawh uh hi.

⁸ Ahih hangin Khaldea galkapte in kumpi Zedekiah nungdelh uh a, Jerikho zanglei-ah a phak uh ciangin a galkap khempeuh kithehthangin amah a taisan uh hi.

⁹ Amaute in kumpipa a mat khit uh ciangin Hamath gam Riblah khua-a Babylon kumpipa kiangah puak uh a, amah in thukhenna a pia hi.

¹⁰ Riblah khua-ah Babylon kumpipa in Zedekiah’ muh mahin a tate thahlupsak a, Judah gam kumpi ulian khempeuh zong a thatlum hi.

¹¹ Babylon kumpipa in Zedekiah’ mittangte a khelkhiatsak khit ciangin kol bulh a, Babylon khuapi-ah paipihin a sih mateng thong sungah a koih hi.

Judah Mite’ Salsuahna

¹² Babylon kumpipa Nebukhadnezzar in a ukzawh kum sawm le kum kua a phak kum, a kha ngana, a ni sawm ni-in Babylon kumpipa a cing galkap mangpa Nebuzaradan, Jerusalem khua sungah hong lut hi.

¹³ Amah in Topa’ biakinnpi a kipan kumpipa’ inn le Jerusalem khua-a inn lian khempeuh a hal hi.

¹⁴ Amah tawh a omkhawm a galkap khempeuh in Jerusalem khua kimkota kulh khempeuh a susia hi.

¹⁵ Kumpi cing galkap mangpa Nebuzaradan in mi zawngpen pawlkhat, khuapi sunga a kinusialai mite, Babylon kumpipa’ lamah a tai mite, le khutsiam mi a omlai teng, sal dingin a paikhiatpih hi.

¹⁶ Ahih hangin kumpi cing galkap mangpa Nebuzaradan in leenggah lo a cing ding le lo a kho dingin gam sunga a zawngpente pawlkhat a nusialai hi.

¹⁷ Babylon mite in Topa’ biakinnpi sungah a om sumngo khuamte, sumngo tuikuang le a ngaknate suzan gawp uh a, sumngo khempeuh Babylon-ah a la uh hi.

¹⁸ Tua banah, biakpiakna a kizang beelte, vutluahnate, taitehte, kuangte, sikkeute, le biakinn kikhopna-a kizang sumngo tawh a kibawl kuangte khempeuh zong a la uh hi.

¹⁹ Biakpiakna a kizang keuneute, mei-am luahna kuangdaite, kuangte, beelte, khuai meivakkhuamte, sikkeute, le tuibuahna dinga kizang keute zong a la uh hi. Kham tawh a kibawl nate kham dingin ahi zongin, ngun tawh a kibawl nate ngun dingin ahi zongin kumpi cing galkap mangpa in a lakhia hi.

²⁰ Solomon kumpipa in Topa’ biakinn a dingin a bawl khuampi nih, tuikuangpi khat le tua nuai-a a pua sumngo bawngtal sawm le nih le a kingaknate, sumngote a gihna kiteh zo lo hi.

²¹ Tua khuamte khat ciangin pi sawmnih le pi sagih sang a, a kimkot pi sawm le giat pha a, a sahna zung li pha-in a sung a hawm ahi hi.

²² A tunglam pi sagih le alang ciang sumngo hi-in, tua mun teng a kimkotah sumngo tawh a kibawl mang kawlsing lim kisuai hi.

²³ Mang kawlsing a vekpi-in a kimkotah zakhat om a, sawmkua le guk bek a kilang hi.

²⁴ Kumpi cing galkap mangpa in siampi lianpen pa Seraiah, siampi lian a nihna Zefaniah, le kongpi uk biakinn upa thum a paikhiatpih hi.

²⁵ Tua banah khuapi sung panin galkapte a uk galkapmang khat le khuasunga a kimu kumpipa’ uliante sagih, galkap zumlai a kem galkap mangpa’ lai-at pa le khuasunga a kimu midang sawmguk, khuasung panin a paikhiatpih hi.

²⁶ Kumpi cing galkap mangpa Nebuzaradan in amaute paipihin Riblah khua-a Babylon kumpipa kiangah a tunpih hi.

²⁷ Babylon kumpipa in zong Hamath gam Riblah khua-ah amaute satin a thatlum hi. Tu-a bangin Judah mite a gam panun sal dingin a kilakhia hi.

²⁸ Nebukhadnezzar in sal dingin a paipih mi phazah hih bang ahi hi: Kumpi a suahzawh a kum sagih kumin Judah mi tulthum sawmnih thum,

²⁹ a kum sawm le giat kumin Jerusalem khua panin Nebukhadnezzar in mi zagiat sawmthum nih sal dingin a paipih hi.

³⁰ Nebukhadnezzar in a ukzawh a kum sawmnih le thum kumin kumpi cing galkap mangpa Nebuzaradan in a sal dingin Judah mi zasagih sawmli nga a paikhiatpih hi. A vekpi-in mi tulli le zaguk a pha hi.

Jehoiakhin A Kikhahna le Babylon-ah A Kipahtawina

³¹ Judah kumpipa Jehoiakhin sal a suahzawh kum sawmthum le kum sagih a cin ciangin Babylon-ah Evilmerodak kumpi a suak hi. Tua kumpipa in Judah kumpipa Jehoiakhin hehpih a, tua kum kha sawm le kha nihna a ni sawmnih le ni nga ni ciangin thong sung panin a suaktasak hi.

³² Hoihtakin hopih a, Babylon khua-a a ompih kumpi dangte sangin a sangzaw tutna a pia hi.

³³ Tua ahih manin Jehoiakhin in a thong puante a suahkhia hi. A nuntak sungteng khempeuh kumpipa’ sabuai-ah nisimin an a ne hi.

³⁴ A sih mateng a nuntak hun sungteng nisimin a kisap khempeuh kumpipa in a pia tawntung hi.