Jeremiah 48 - Tedim Bible

Moab Gam Tawh Kisai Genkholhna

¹ Moab gam tawh kisai-in Vanglian Topa, Israel mite’ Pasian in a genin-ah: “Nebo mite in gimna a thuak ding uh hi. Bang hang hiam cih leh a gam uh a kisia ding hi. Kiriathaim khua kila khinzo a, a kulhpite uh cim khinta hi. A mite in maizumna thuak uh a,

² Moab gam a minthanna beita hi. Heshbon khua-ah a galte un a simna ding uh vaihawm uh a, ‘Hong pai un, Moab gam i beimangsak ding hi,’ a ci uh hi. Madmen khua aw, nang zong na gamdai ta ding hi. Namsau in nang hong nungdelh ding hi.

³ Ngai dih un! Horonaim khua-ah mi kiko a, ‘Ngongtatna le siatna lianpi,’ a ci uh hi.

⁴ “Moab gam kisusia khinta a, a kahna aw uh Zoar khua dongin a kiza hi.

⁵ Luhith mual kahtohna lampi-ah a paikawmun a kap uh hi. Horonaim khua-ah a tuahsuk laitakun khuapi siatna hangin a kikona aw uh a za uh hi.

⁶ ‘Tai un! Na suahtak nadingun tai un! Sehnel gam a gamlak late bangin taimang un!’ a ci uh hi.

⁷ “Na hatnate uh le na neihsate uh na suan manun note zong hong kipai khiatpih ding hi. Na pasian uh Khemosh zong a siampi teng le a ulian teng tawh, kipai khiatpih ding hi.

⁸ Khua khempeuh kisia khin ding a, khat beek a suakta kei ding hi. Topa in ka gensa bangin mualkuam le zangleite a kisia ding uh hi.

⁹ Moab mite a leenkhiat theih nadingun a kha ding uh pia un. A khuapite uh gamlak suak ding a, kuamah a teng kei ding hi.

¹⁰ “Topa’ na citakin a sem lopa in kamsiatna thuak tahen. Thah nadingin a namsau a dok lopa in hamsiatna thuak tahen.

¹¹ Moab gam a neu lai a kipanin nuamtakin a om den ahi hi. Gamdangah kipaikhiatpih ngei lo a, thawl khat pan thawl khatah a kitei kawikawi leenggahzu tawh kibang lo hi. A limna kilamdang ngei lo a, a gimnam zong kikheel ngei lo hi.

¹² “Tua ahih manin en un, Topa in kong cihin-ah, Moab mite leenggahzu buak bangin a buakhia ding mi kong paisak hun hong tung ding hi. Amaute in a thawl a hawm dong bungkhia-in, tua khit ciangin a thawl sukhamzan ding uh hi.

¹³ Tua ciangin Israel mite, a muan uh Bethel pasian in a maizumsak mah bangin Moab mite, a biak uh Khemosh pasian in a maizumsak ding hi.

¹⁴ Note in bang hangin, ‘Galhangte ka hi uh a, galsim hatte ka hi uh hi,’ ci thei na hi uh hiam?

¹⁵ Moab gam le a khuapite a susia ding pa hong paito ta hi. A tangval hoihpente uh thahlup dingin kipaipih khinzo hi, ci-in Vanglian Topa a kici keimah Kumpipa in kong gen hi.

¹⁶ Moab gam a kisiat ding sawt nawn lo a, a gimna ding hong naita hi.

¹⁷ “A kiima tengte le a min a thei mite aw, Moab gam kah un. ‘A minthanna bei khinta a, a vangliatna kumpi ciangkhut kitan ta hi,’ ci un.

¹⁸ Dibon khua-a teng mite aw, na minthanna uh mun sang panin hong kumsuk unla, leivui lakah hong tu un! Bang hang hiam cih leh Moab hong sim dingte hong paita a, na kulhte uh hong suksiatsak zo uh hi.

¹⁹ Aroer khua-a teng mite aw, lam gei-ah dingin na en un! A hong galtai numei le pasalte kiangah, ‘Bang thu piang ahi hiam?’ ci-in dong un.

²⁰ Moab gam kisia khinzo a, zumhuaina thuak khinzo hi. Thum unla kah un! Arnon gun dungah, Moab gam kisiatna thu va gen un.

²¹ “Pasian’ thukhenna, mualtung gamteng le Holon khua, Jahzah khua, Mefaath khua,

²² Dibon khua, Nebo khua, Bethdiblathaim khua,

²³ Kiriathaim khua, Bethgamul khua, Bethmeon khua,

²⁴ Kerioth khua, le Bozrah khua a kipan Moab gam sung a gamla, a nai-a om khuapi khempeuhah hong tungzo hi.

²⁵ Topa in kong cihin-ah, Moab gam’ hatna teng bei khinta hi. A hatna le a vangliatna teng kisuksiatsak hi.

²⁶ “Moab, zu khamsak un; bang hang hiam cih leh amah in Topa langpangin kiliansak hi. Tua ahih manin ama luak mahah amah bual ding a, mi khempeuh in awi-in a nuihsan ding uh hi.

²⁷ Moab aw, nang zong Israel mite nuihsan hi lo na hi hiam? Ama thu na gen simin lungdamin na lu na sinsin’, amah guta sa na hi hiam?

²⁸ Moab gam a teng mite aw, khuapite nusia unla, kawl lakah teng un! Keen pangah vakhu bu bawl bangin va om un.

²⁹ Moab’ kiphatsakna ka za khinzo a, kiphasak pha mahmah hi. Kiliansakin kisathei a, kuamah thusim loin mite a neu-et hi.

³⁰ Ama hehna ka thei a, a kisialhna teng zuaupi hi-in, a sepna teng zong zuaupi mah ahi hi, Topa in kong ci hi.

³¹ Tua ahih manin Moab a dingin ka tau hi. Moab gammi khempeuh a dingin ka kap a, Kirheres khua a dingin zong ka thum hi.

³² Sibmah khua aw, Jazer khua a’ ding sangin nang a dingin ka nak kahzaw hi. Nang pen leenggah gui zaam bangin na hiangte in tuipi kantan a, Jazer khua dongah na zaam suak hi. Na khuakhal ante le na leenggahte hong kisuksiatsak ta hi.

³³ Leihoih mahmah Moab gamah lungdamna le kipahna a beita hi. Leenggah cilna panin leenggahzu ka luangkhiasak nawn kei a, leenggah cilin lungdamin kuamah a kiko nawn kei a, a kikona uh lungdam kikona hi lo hi.

³⁴ “Heshbon khua panin Elealeh khua le Jahaz dongah, Zoar khua panin Horonaim khua le Eglathshelishiah khua dongah mite’ kahna aw kiza hi. Bang hang hiam cih leh Nimrim tui nangawn keu ta a, kisusia ta hi.

³⁵ Moab gam mualsang tungah biakna pia a, milim pasian-te tungah paknamtui a hal mite, Topa in kong cihin-ah, tua bang ka hihsak nawn kei ding hi.

³⁶ Tua ahih manin Moab a dingin ka kap a, Kirheres khua mite a dingin misi vuina tamngai kitum bangin ka kapkhia hi. Bang hang hiam cih leh a neih a lam khempeuh uh kisiamang khinta hi.

³⁷ “Mi khempeuh in a lu uh mettol uh a, a khamul uh kiatsiang uh hi. A khutte uh kuikek uh a, a kawng uhah puanhampi a teng uh hi.

³⁸ Moab gam innkhum khempeuh le lam lianpi khempeuhah kahna bekbek a om hi. Bang hang hiam cih leh Topa in kong cihin-ah, leibeel suktap bangin Moab gam ka sutam a, kuamah in phamawh a sa kei hi.

³⁹ Moab gam kitam ta! A mite kap! Maizumin hong nungngat ta! Tua ahih manin amah pen mite’ nuihsat ding le lipkhap ding a suakzo hi.

⁴⁰ Topa in kong cihin-ah: En in, muvanlai leeng bangin manlang takin gam khat hong leeng ding a, Moab gam a sim dingin a kha hong zal ding hi.

⁴¹ A khuapite kila-in a kulhpite zong kila ding hi. Tua ni ciangin Moab galkapte nupi nausuak ding bangin a lau ding uh hi.

⁴² Moab kisusia ding a, a minamin a om nawn kei ding hi. Bang hang hiam cih leh Topa demin a kiliansak uh hi.

⁴³ Moab gam a teng mite aw, Topa in kong cihin-ah, launa, dum le thangte in note hong pang!

⁴⁴ Lauhuaina pan a taisim mite dum sungah a kia ding hi. Dum sung panin a hong kahkhiato mite, thangah a awk veve ding hi. Bang hang hiam cih leh Moab gim ka piak ni-in hih thute ka tungsak ding hi, Topa in kong ci hi.

⁴⁵ A bahgawp galtaite in Heshbon khua hong beel uh hi. Ahih hangin Sihon kumpipa a maanna ngei Heshbon khua panin meikuang hong kipankhia veve hi. Gal a simnuam mite’ tenna Moab gam, a gammong dongin mualsangte zong a kangtum hi.

⁴⁶ Moab aw, gimna na thuak ding hi. Khemosh pasian a bia mite si khinta uh hi. Na tapate uh sal dingin kipaipih khin a, na tanute uh zong thongkia dingin kipaipih hi.

⁴⁷ “Ahih hangin Topa in kong cihin-ah, nidang ciangin Moab gam a ngei bangsakin ka hausakkik ding hi,” a ci hi. Moab tungah thukhenna tu-a zah ahi hi.