Jeremiah 46 - Tedim Bible

Egypt Gam Tawh Kisai Genkholhnate

¹ Gamdangte’ thu tawh kisai-in Topa in kei kiangah thu hong gen hi.

² Josiah’ tapa Jehoiakim, Judah gamah kumpi a suahzawh kum li a phak hunin Babylon kumpipa Nebukhadnezzar in Eufratis gun gei Karkhemish khua-ah Egypt kumpipa Faro Neko simin a zo hi. Egypt kumpipa’ galkapte tawh kisai-in hih bangin a hong gen hi:

³ “Na lumte uh la unla galsim dingin kuankhia un!

⁴ Sakol vante vawh unla, tuang ta un, sakol galkapte aw. Na sik lukhute uh khu unla, na teipite uh tat hiamin, na sik puante uh silh un.

⁵ “A bangci mawk ahi hiam? Amaute lungmangin a nungkik ta uh hi. A galkapte uh kilehhawl a, lau-in taikekmang mawk uh hi. Kinungleh hei kik lo uh hi; mun khempeuhah launa vive!

⁶ A manlang pente zong paikhia thei tuan lo uh a, galkapte zong suakta lo uh hi. Leilu lam Eufratis gun gei-ah hoi-in a tuk uh hi.

⁷ Nail gunpi bangin a hong khang, guntui khang a bang kua ahi hiam?

⁸ Nail gunpi bangin Egypt gam hong khang a, guntui khang hong bang hi. Amah in, kei ka khang ding a, leitung khempeuh ka tuam ding hi. Khuapite le a sunga teng mite ka susia ding hi, a ci hi.

⁹ Sakolte aw, mai nawt un; sakol leengte aw, hat un! Lum a tawi Ethiopia mite le Put mite aw, thal tawi a siam Lud mite aw, na galkapte uh kuansak un.

¹⁰ “Bang hang hiam cih leh tuni pen Vanglian Topa Pasian’ ni hi a, phu a lakkik ni, a galte a thuk ni ahi hi. Namsau in amaute that ding a, a kham mateng a si uh a dawn ding hi. Bang hang hiam cih leh Vanglian Topa Pasian in Eufratis gun gei leilu lamah amaute biakna-in a nei hi.

¹¹ Egypt nungakte aw, Gilead gamah pai unla, damna zatui va la un. Zatui tampi na zat khit uh hangin damna na ngah tuan kei uh hi.

¹² Gamdangte in na zumhuaina uh hong za khin uh a, leitung bupah na kahna aw uh kiza hi. Na galkapte uh khatlekhat kiphukha-in, a nihun a pukkhawm uh hi,” a hong ci hi.

¹³ Egypt gam a sim dingin Babylon kumpipa Nebukhadnezzar’ hong paina tawh kisai-in Topa in hih bangin kei kiangah a hong gen hi:

¹⁴ “Egypt gam le Migdol khua-ah va gen in. Memfis khua le Tahpanhes khua-ah va taangko in: ‘Kigingsa le kithawisa-in om un; bang hang hiam cih leh namsau tawh note hong kithat khin ding hi,’ va ci in.

¹⁵ Bang hangin na bawngtal pasian uh Apis guallelin taimang ahi hiam? Topa in amah a vattuk hang ahi hi.

¹⁶ Na mite uh tampi tak hoi-in tuk uh a, amaute in khatlekhat kiangah, ‘Kithawi dih un; i mipihte kiang, i suahna gamah va ciahkik ni; tua hileh hih namsau tawh sihna pan i suakta ding hi,’ a kici uh hi.

¹⁷ “Egypt kumpipa Faro, min thak khat pia unla, ‘Kam si bekin hun mawk beisak pa,’ ci ta un.

¹⁸ Vanglian Topa keimah Kumpipa ka hi hi. Taber mual, mual khempeuh sangin sangzaw-in, Karmel mual, tuipi tungah sangpi-in a dawktoh bangin, no hong sim pa’ thahatna a lian mahmah ding hi.

¹⁹ Egypt gamah a tengte aw, note salin a hong kipaipih cianga ding na puanlomte uh zialkhol un. Bang hang hiam cih leh Memfis khua gamlak suak ding a, kisia gawpin, kuamah teng lo ding hi.

²⁰ Egypt gam, bawngla hoih mahmah tawh a kibang hi. Leilu lam panin a hong leeng cippi in amah a pet hi.

²¹ A galkap cialte nangawn amaute’ lakah bawngno hat lote a bang lel uh hi. Pang loin, do tentan lo uh a, nungkikin a taikeek uh hi. Bang hang hiam cih leh amau’ kisiat ding ni, amau’ gimthuak ding ni, hong tungzo hi.

²² A galte uh hong kuan uh ahih manin Egypt mite gul tai bangin zutkhat a kisuah uh hi. A galte uh sing phuk bangin hei tawh hong kuan uh hi.

²³ Gam pha lua-in a kiphut zawh loh hangin a galte un a singte uh a phukmaisak teitei ding uh hi, Topa in a ci hi. Bang hang hiam cih leh amaute kauphe sangin tamzaw uh a, simzawh loh zahin a tam uh hi.

²⁴ Egypt nungakte a maizum ding uh hi. Leilu lam panin a hong pai mite’ khut sungah amaute a kipia ding uh hi,” a hong ci hi.

²⁵ Vanglian Topa, Israel mite’ Pasian in, “En un: Keimah in Thebes khua-a Amon pasian le Faro kumpipa a kipan a pasian-te uh le a kumpite uh, Egypt kumpipa le amah a muang mi khempeuh tungah gimna ka tungsak ding hi.

²⁶ Amaute a that nuam Babylon kumpipa Nebukhadnezzar le a uliante’ khut sungah amaute ka pia ding hi. Ahi zongin Topa in kong cihin-ah, nidang lai bangin Egypt gamah mi a tengkik ding hi.

²⁷ Ahih hangin lau kei un, ka nasempa Jakob’ suante aw. Patau kei un, Israel mite aw. Bang hang hiam cih leh gamlapi panin note kong honkhia ding a, na suanlekhakte uh saltanna gam panin kong honkhia ding hi. Jakob’ suante hong ciahkik ding uh a, nuamtakin a om ding uh hi. Kuamah in amaute a lausak nawn kei ding hi.

²⁸ Topa in kong cihin-ah, ka nasem Jakob’ suante aw, lau kei un. Bang hang hiam cih leh note kong ompih hi. Note ka hong thehthangna gamte khempeuh ka susia khin ding a, ahih hangin note kong susia khin kei ding hi. A kilawm zahin kong thuhilh ding a, gim pia loin kong mawk koih kei ding hi,” a hong ci hi.