Jeremiah 44 - Tedim Bible

Jeremiah in Egypt Gam a Om Jew Mite Kiangah Thu Hilh

¹ Egypt gam Migdol khua, Tahpanhes khua, Memfis khua, le leitaw lama teng Jew mite tawh kisai-in Topa in thu hong gen a,

² “Vanglian Topa, Israel mite’ Pasian in kong genin-ah: Note in Jerusalem khua le Judah gam khuapi khempeuh tungah ka tunsak gimna na muzo uh hi. En un, tuni-in tua khuate a siasa mahin omlai a, kuamah teng lo hi.

³ Bang hang hiam cih leh amaute in ka heh nadingin gitlohna bawl uh a, amaute a kipan note le na pu na pate un a theih ngei loh uh pasian-te’ na semin paknamtui halin a bia uh hi.

⁴ Ahih hangin note kiangah ka nasem kamsangte khempeuh kong sawl a, ‘Ka muhdah hih a kihhuai na na gamta nawn kei un,’ ci-in kong gensak tawntung hi.

⁵ Ahih hangin amaute in ka thu hong ngai loin a bil uh hong ngat lo uh a, a gitlohna uh panin kihei loin, pasian dangte kiangah paknamtui hal veve uh hi.

⁶ Tua ahih manin Judah gam khuapite sung le Jerusalem khua kongzing lakah ka hehna le ka thangpaihna ka bua a, ka kuangsak hi. Tuni-a na muh uh bangin tuate kisia-in gamlak suak khinta hi.

⁷ “Tu-in Vanglian Topa Pasian, Israel mite’ Pasian in kong genin-ah: Bang hangin note in hih bangin note’ siat nadingin mawhna lianpi bawl na hi uh hiam? Judah gam sungah papi, nupi, naupang, le naungek a kipan a nungtalai kuamah om nawn kei hen, cih na deihna uh ahi hiam?

⁸ Note si-in, leitung a minam dang khempeuhte in hamsiatna-in a hong zat ding uh le hong simmawh nadingun bang hangin na khut uh tawh milim bawlin, na ten nadingun na zuat uh Egypt gamah pasian dangte’ kiangah paknamtui halin kei hong hehsak na hi uh hiam?

⁹ Judah gam le Jerusalem khua kongzing lakah na pute na pate uh’ gitlohna, Judah kumpite’ gitlohna, a zite uh’ gitlohna, note mahmah’ gitlohna, le na zite uh’ gitlohnate mangngilh khin na hi uh hiam?

¹⁰ Tuni ciang dong note na kiniamkhiat kei uh a, kei hong zahtak loin, note le na pute na pate uh tungah kong piak ka thukhamte le ka ngeinate na zui kei uh hi.

¹¹ “Tua ahih manin Vanglian Topa, Israel mite’ Pasian in kong genin-ah: En un, note a susia dingin na langkhat uhah kei ka ding a, Judah gam khempeuh ka susia ding hi.

¹² Egypt gamah a teng dingin a lungsim a khensat khin Judah mi a omlaite, a vekpi-un ka sisak khin ding hi. Egypt gamah namsau tawh kithat sakin kial tawh ka puksisak ding hi. A neupen a kipan a golpen dongin namsau le kialpi tawh a si ding uh a, mite’ lipkhap, mite in kihamsiatna-in a zat leh mite’ simmawh ka suaksak ding hi.

¹³ Jerusalem khua ka siatsak bangin Egypt gam a teng mite namsau tawh, kialpi tawh, pulnatna tawh sihna ka thuaksak ding a,

¹⁴ Egypt gamah pai-in a teng Judah mi a omlaite in a zuatkik nop uh ahi Judah gamah ciahkik thei nawn loin, khat beek suakta loin, zong a nungta suak kei ding uh hi. Galtai pawlkhat longal khat beek a suakta kei ding uh hi,” a hong ci hi.

¹⁵ Tua ciangin a zite un pasian dangte kiangah paknamtui a hallam a thei papi khempeuh le tua lai-ah a ding nupi khempeuh a kipan Egypt gam leitaw lamah a teng mi khempeuh, a vekpi-in mi tampi tak in kei kiangah,

¹⁶ “Topa’ mina nong gen thute kong mang kei ding uh hi.

¹⁷ Ahih hangin ka ciamsa uh bangin kote, ka pute ka pate, ka kumpite uh le kumpi uliante in Judah gam khuapite le Jerusalem khua kongzing lakah ka hih ngei uh bangin vantung kumpinu kiangah paknamtui halin tuidawn biakna ka hihzaw ding uh hi. Bang hang hiam cih leh ka tuacih uh ciangin an tampi ka nei uh a, hau-in gimna zong ka thuak kei uh hi.

¹⁸ Ahih hangin vantung kumpinu kiangah paknamtui halna le tuidawn biakna ka hih nawn loh uh a kipan bangmah ka nei nawn kei uh a, namsau le kial in hong thatlum zawsop hi,” a hong ci uh hi.

¹⁹ Nupite in zong, “Vantung kumpinu’ lim a sun dingin moh bawlin paknamtui halna le tuidawn biakna ka bawl uh ciangin ka pasalte uh’ thukim lohpi-in a bawl ka hi zenzen uh hiam?” a hong ci uh hi.

²⁰ Tua ciangin tua bangin a hong dawngkik papi, nupi a kipan mi khempeuhte kiangah,

²¹ “Judah gam khuapite le Jerusalem khua kongzing lakah note, na pute na pate uh, na kumpite uh, le na kumpi uliante uh a kipan gam sung mi khempeuh in paknamtui halna na bawl uh ciangin Topa in tua pen a phawk lo sa na hi uh hiam? A ngaihsun lo sa na hi uh hiam?

²² Topa in na hoih lohnate uh le na bawl uh kihhuainate hangin note hong thuakzo nawn lo hi. Tua ahih manin tuni mahmahin zong na gam uh gamlak suakkhin a, mite’ kihamsiatna suakin kuamah teng nawn lo hi.

²³ Note in paknamtui halin, Topa’ tungah mawh tham loin, Topa’ thu mang loin ama thukhamte, a ngeinate, le a hong thupiakte zui lo na hih manun tuni mahmahin zong hih gimna note tungah hong tung ahi hi,” ka ci hi.

²⁴ Tua ciangin mi khempeuhte kiang le a diakdiakin nupi khempeuhte kiangah, “Topa’ kammal ngai dih un. Egypt gamah a om no Judah mite khempeuh aw,

²⁵ Vanglian Topa, Israel mite’ Pasian in hong genin-ah: Note le na zite un na khut bek uh tawh na sep uh hi loin na kam mahmah uh tawh, ‘Vantung kumpinu’ tungah paknamtui hal ding le tuidawn biakna piak dingin ka kiciamnasa uh bangin ka sem taktak ding uh hi,’ ci-in na gen khinzo uh hi. Tua ahihleh na kiciamna uh kipsak ta unla, na kiciamna uh bangin sem dih un!

²⁶ Ahih hangin Egypt gamah a om no Judah mite aw, Topa’ thugenna hong ngai un. En un, Topa in kong cihin-ah, Egypt gamah a om Judah mi khat beek in, ‘Topa a nuntak bangin,’ ci-in ka min zangin a kiciam nawn loh nadingun ka min lianpi tawh ka kiciam khinzo hi.

²⁷ En un, amaute tungah hoihna tung loin siatna a tun nadingin keimah in ka bawl ding hi. Egypt gamah a om Judah mi khempeuh namsau le kialpi tawh si ding uh a, khat beek a suakta kei ding uh hi.

²⁸ Namsau tawh thahna a thuak kha lo mi tawmkhate, Egypt gam panin Judah gamah hong ciahkik ding uh a, Egypt gamah a teng dingin a pai a nungtalai sunte in kei’ kammal le amau’ kammal koizaw a manin tung, cih a thei ding uh hi.

²⁹ Note’ siatna ding ka gensa thute a hong tung takpi ding ahihna thu na theih nadingun Topa in kong cihin-ah, note tungah hih lim kong pia ding a, hih munah note kong thuaksak ding hi:

³⁰ Topa in kong genin-ah: ‘En un, Judah kumpi Zedekiah, a gal pa ahi amah a that nuam Babylon kumpipa Nebukhadnezzar’ khut sungah ka piak mah bangin Egypt kumpipa Faro Hofra, a galte’ khutsung, amah a thatnuam mite’ khut sungah ka pia ding hi,’ hong ci hi,” ka cithuah lai hi.