Jeremiah 41 - Tedim Bible

¹ Kha sagih kha hong tun ciangin Nethaniah’ tapa, Elishama’ tupa, kumpi nam le kumpipa’ ulian pente khat ahi Ishmael, mi sawm tawh Mizpah khua Ahikam’ tapa Gedaliah’ kiangah hong hawh uh hi. Mizpah khua-ah amaute in an a nekkhawm laitakun,

² Nethaniah’ tapa Ishmael le tua mi sawmte in, Babylon kumpipa in gam uk dingin a koih Ahikam’ tapa, Shafan’ tupa Gedaliah pen namsau tawh satin a thatlum uh hi.

³ Ishmael in Mizpah khua-ah Gedaliah tawh a omkhawm Jew mi khempeuh le tua laitakin a om Babylon galkapte zong a that hi.

⁴ Gedaliah a kisuam ni a zing ciang, kuama theih ma-in

⁵ Shekhem, Shiloh, le Samaria khuate panin mi sawmgiat hong pai uh hi. Amaute in a khamul uh metin a puan uh balkekin, a pumpi uh a kikui gawpsa-in Topa’ biakinn-ah an tawh biakna le paknamtui tawh biakna a piak ding uh hong tawi khawm uh hi.

⁶ Nethaniah’ tapa Ishmael zong Mizpah khua panin kap kawmin hong paikhia a, amau hong dawntuah hi. Amau tawh a kimuh ciangin amah in, “Ahikam’ tapa Gedaliah hong en dih un,” ci-in a sam hi.

⁷ Khuapi sung a tun uh ciangin Nethaniah’ tapa Ishmael le a mi sawmte in amaute thatin a luang uh tuikhuk sung khatah a paai uh hi.

⁸ Ahih hangin amaute’ lakah mi sawm in Ishmael’ kiangah, “Ko hong that kei in. Mangbuh, mangbuhham, sathau le khuaizu ka seelsim uh lolai-ah tampi a om hi,” a ci uh hi. Tua ahih manin amah le a lawmte in amaute a that kei uh hi.

⁹ Ishmael in a thahsa misi luanghawm khempeuh a paihna tuikhuk pen a gol khat hi a, kumpipa Asa in Israel kumpipa Baasha a nan nadingin a bawl ahi hi. Nethaniah’ tapa Ishmael in a thahsa misi luanghawmte tua tuikhuk a dimsak hi.

¹⁰ Tua ciangin kumpi cing galkapmang Nebuzaradan in, Ahikam’ tapa Gedaliah’ uk dingin a piak kumpipa’ tanute le Mizpah khua-a a kinusia mi khempeuh a kipan Mizpah khua-ah a omlai mi khempeuh Nethaniah’ tapa Ishmael in man a, Ammon gam lam zuanin a paikhiatpih hi.

¹¹ Ahih hangin Kareah’ tapa Johanan le amah tawh a omkhawm galkapmang khempeuh in Nethaniah’ tapa Ishmael’ tatsiatnate a zak uh ciangin

¹² a galkap khempeuh uh tawh Nethaniah’ tapa Ishmael a sim dingin a kuankhia uh hi. Gibeon tuikhukpi a tun uh ciangin a pha uh hi.

¹³ Ishmael’ mat mi khempeuh in Kareah’ tapa Johanan le a hong tonpih galkapmangte a muh uh ciangin a nuam uh hi.

¹⁴ Tua ahih manin Mizpah khua panin Ishmael in manin a paikhiatpihte khempeuh hong kilehhei kikin Kareah’ tapa Johanan a beel uh hi.

¹⁵ Ahih hangin Nethaniah’ tapa Ishmael le mihing giat Johanan’ khutsung panin suakta uh a, Ammon gamah a tai uh hi.

¹⁶ Tua ciangin Kareah’ tapa Johanan le a paipih galkapmangte khempeuh in, Nethaniah’ tapa Ishmael in Mizpah khua-ah Ahikam’ tapa Gedaliah a thah khit ciangin manin a paikhiatpih galkapte, nupite, naupangte le kumpi innsung mangte a kipan a omlai mi khempeuh Gibeon khua panin a ciahpih kik uh hi.

¹⁷ Egypt gam a zuan dingin amaute pai uh a, Bethlehem khua gei Khimham Khawlmun-ah a khawl uh hi.

¹⁸ Bang hang hiam cih leh Babylon mite a kihta uh hi. Babylon kumpipa in gam uk dingin a koih Ahikam’ tapa Gedaliah pen Nethaniah’ tapa Ishmael in suamlum ahih manin a kihta uh ahi hi.