Jeremiah 38 - Tedim Bible

Tuikhuk Sung Pan Jeremiah Kihonkhia

¹ Mattan’ tapa Shefatiah, Pashhur’ tapa Gedaliah, Shelemiah’ tapa Jehukal, le Malkhiah’ tapa Pashhur-te in mi khempeuh tungah keima thugenna a za uh hi.

² Keimah in mite kiangah, “Topa in hong cihin-ah: Hih khuapi sungah a om mi peuhmah namsau tawh ahi a, kial tawh ahi a, pulnatna tawh ahi zongin a si ding uh hi. Ahih hangin pusuak khia-in Babylon mite a beel peuhmah nungta ding a, suakta liailiai ding uh hi.

³ Topa in hong cihin-ah, Babylon kumpipa’ khut sungah hih khuapi kipia taktak ding a, a kila ta ding ahi hi,” ka ci hi.

⁴ Tua ciangin kumpipa’ uliante in kumpipa kiangah, “Hih mipa i thatlum ding hi. Bang hang hiam cih leh hih thute a gen manin hih khuapi sungah a omlai galkapte le mi khempeuhte lungkia sakin thazawsak hi. Hih mipa in i gam mite’ phattuamna ding zong loin a gim ngah nading uh a zongzaw ahi hi,” a ci uh hi.

⁵ Kumpipa Zedekiah in, “En un, note’ khut sungah amah om hi. Keimah in note kong kho thei kei hi,” a ci hi.

⁶ Tua ciangin amaute in kei hong man uh a, thong huang sunga om kumpipa’ tapa Malkhiah’ tuikhuk sungah khau tawh hong khiasuk uh hi. Tuikhuk sungah tui om loin buan bek om a, buan sungah ka tumsuk hi.

⁷ Kumpipa’ inn sungah na a sem kumpi ulian khat ahi Ethiopia mi Ebedmelek in tuikhuk sungah kei hong kikhiatlam a za hi. Tua laitakin Benjamin Kongpi-ah kumpipa tu-in a om hi.

⁸ Ebedmelek zong kumpi inn panin hong paikhia-in kumpipa kiangah,

⁹ “Ka to kumpipa aw, hih mite in kamsangpa Jeremiah, tuikhuk sungah a khiatsuk uh a khial uh hi. Bang hang hiam cih leh khua sungah anlum om nawn lo ahih manin an ngawlin a puksi veve ding ahi hi,” a ci hi.

¹⁰ Tua ciangin kumpipa in Ethiopia mipa Ebedmelek sawl a, “Hih lai panin mi thum tonpih inla, kamsangpa Jeremiah a sih ma-in tuikhuk sung pan va kaikhia un,” a ci hi.

¹¹ Tua ciangin Ebedmelek in zong a mite tonpih a, kumpipa’ inn-ah pai-in vankoihna sungah a lut khit uh ciangin tuikhuk sung pan khau tawh kei hong kaihkhiatna ding uh puansiasa le puan lui pawlkhat a la uh hi.

¹² Tua ciangin Ethiopia mipa Ebedmelek in keima kiangah, “Na lenuai le khau kikalah puansiate dap in,” ci-in hong sawl hi. Kei zong tua mah bangin ka hih hi.

¹³ Tua ciangin amaute in tuikhuk sung panin khau tawh kei a hong kaikhiato uh hi. Ahi zongin thong huangsung mahah ka omlai hi.

Zedekiah in Jeremiah Thu Dong

¹⁴ Kumpi Zedekiah in kei hong vaikhak a, Topa’ biakinn kongkhak tumna-ah a hong sam hi. Kumpipa in kei kiangah, “Thu khat kong dong ding hi; bangmah hong im kei in,” hong ci hi.

¹⁵ Kei zong Zedekiah kiangah, “Thuman bangin hong gen leng kei nong that taktak ding hi. Ka ngaihsutna hong pia taleng zong nong mang nuam kei ding hi,” ka ci hi.

¹⁶ Tua ciangin kumpipa Zedekiah in kei kiangah, “Eite nuntakna a hong pia Topa a nuntak bangin kong sisak kei ding a, nang a hong thatnuam hih mite’ khut sungah zong kong pia kei ding hi,” ci-in kiciamna a hong piasim hi.

¹⁷ Tua ciangin keimah in Zedekiah kiangah, “Topa, Vanglian Pasian, Israel mite’ Pasian in hong genin-ah, Babylon kumpipa’ uliante na belh leh na nuntakna hong kimap ding a, hih khuapi in zong mei tawh haltumna thuak loin nang le na innkuanpihte na nungta ding uh hi.

¹⁸ Ahih hangin Babylon kumpipa’ uliante na belh kei leh Babylon kumpipa’ khut sungah hih khuapi kipia ding a, amau in mei tawh halin amaute’ khutsung pan na suakta kei ding hi,” ka ci hi.

¹⁹ Kumpipa Zedekiah in kei kiangah, “Babylon mite’ kiangah a tai Judah mite ka kihta hi. Amaute’ khut sungah kei hong kipia leh amaute in kei hong bawlsia ding uh hi,” a hong ci hi.

²⁰ Kei zong, “Amaute’ kiangah nang hong kipia lo ding hi. Tu-a kong gen bangin Topa’ thu mang in. Tua hileh nang a dingin hoih ding a, na nuntakna hong kimap ding hi.

²¹ Ahih hangin na lut nop kei leh, Topa in ka maangmuhna sungah hih bangin hong lak hi:

²² En in, Judah kumpipa’ inn sungah a kinusia numei khempeuh Babylon kumpipa’ uliante kiangah kipaipih a, tua numeite in Zedekiah kiangah, ‘Na lawm muante in nang hong khem uh a, nang hong zo ta uh hi. Buan sungah na khe tum ahih manin nang hong nungngat ta uh hi,’ ci-in a gen uh hi.

²³ Na nupite le na tate khempeuh Babylon mite kiangah kipaipih ding a, nangmahmah zong amaute’ khutsung panin na suakta kei ding hi. Babylon kumpipa in hong man ding a, hih khuapi mei tawh a kangtum ding hi,” ka ci hi.

²⁴ Tua ciangin Zedekiah in kei kiangah, “Hih thute kuamah theisak kei in. Tua hileh na si kei ding hi.

²⁵ Ahih hangin kumpi uliante in nang kong hopihlam a zakkhak uh a, nang kiangah hong pai-in hong hopihin, ‘Kumpipa kiangah na gen thute le kumpipa in nang kiangah hong gen thute hong gen in. Bangmah hong im kei lecin kong that kei ding uh hi,’ ci-in a hong genkhak uhleh

²⁶ amaute kiangah, ‘Kumpipa in kei, Jonathan’ inn-ah a si dingin a hong puakkik nawn loh nadingin a thum hi ing,’ ci-in dawng in,” ci-in a hong gen hi.

²⁷ Kumpi ulian khempeuh ka kiangah hong pai takpi uh a, thu a hong dong uh hi. Kei zong kumpipa’ hong vaikhakna bangin ka dawngkik hi. Tua ciangin amaute in a gen ding uh om nawn lo hi. Bang hang hiam cih leh kumpipa tawh ka kihona uh a hong zasim kuamah a om kei uh hi.

²⁸ Tua hi a, Jerusalem khua a kilak ciang dong kei zong thong huangsung mahah ka omlai hi.