Jeremiah 32 - Tedim Bible

Jeremiah in Anathoth Khua-ah Lo Khat Lei

¹ Nebukhadnezzar kumpipa in a ukzawh kum sawm le kum giat a phak kumin, Judah gamah Zedekiah kumpi a suahzawh kum sawm pha ta a, tua kumin Topa in Jeremiah a hopih hi.

² Tua hun pen Babylon kumpipa’ galkapte in Jerusalem khua a sim laitak hi a, kamsangpa Jeremiah zong Judah kumpipa’ inn huang sunga thong sungah a kikhumcip laitak ahi hi.

³ Bang hang hiam cih leh Judah kumpipa Zedekiah in ama kiangah, “Bang hangin nangmah in thu genkhol a, ‘Topa in a cihin-ah: En un, hih khuapi, Babylon kumpipa’ khut sungah ka pia ding a, amah in a la ding hi.

⁴ Judah kumpipa Zedekiah zong Khaldea mite’ khutsung pan a suakta kei ding a, Babylon kumpipa’ khut sungah a kipia taktak ding hi. Amah tawh maitang kimu-in a ki-en ding uh a, a kiho ding uh hi.

⁵ Amah in Babylon khua-ah Zedekiah la ding a, ama tungah na ka sep mateng tua lai-ah om ding hi. Khaldea mite na do uh hangin na zo kei ding uh hi, Topa in hong ci hi,’ ci-in bang hangin thu hilh na hi hiam?” ci-in thong sungah a khum hi.

⁶ Jeremiah in zong, “Topa in kei hong hopih a,

⁷ En in, na pano Shullam’ tapa Hananel nang kiangah hong pai ding a, ‘Anathoth khua-a ka lo hong lei in. Bang hang hiam cih leh a lei thei ding lak panin ka kinaipih pen nangmah na om hi,’ ci-in hong gen ding hi, hong ci hi.

⁸ Tua ciangin Topa’ hong cihna bangmahin thong sungah ka innlak sanggampa hong pai takpi-in hong hopih a, ‘Benjamin gam Anathoth khua-a ka lo hong lei in. Bang hang hiam cih leh, i ngeina bangin a nei ding le a tankhia ding nangmah na hi hi. Nang a dingin lei in,’ hong ci hi. Tua ciangin keimah in Topa’ hong hopihna taktak hi, ci-in ka thei hi.

⁹ “Keimah in zong ka innlak sanggampa Hananel’ kiang panin Anathoth khua-a lo ka lei a, ama a dingin ngun shekel sawm le sagih ka tehkhia hi.

¹⁰ Thukimna lai bawlin, min gelhin, gip khenin, a hong theihpih ding mite zong ka sap khit ciangin tawi khaina-ah sum ka teh hi.

¹¹ Tua ciangin ka kithukimna teng uh a ki-atna, gip a kikhen lai pen le gip a kikhen lo lai pen ka la a,

¹² Neriah’ tapa ahi, Mahseiah’ tupa Baruk kiangah ka pia hi. Tua laite, ka innlak sanggampa Hananel tawh, tua kileina laite tunga a min uh a gelh a hong theihpih mite tawh thong huang sunga a tu Judah mite tawh a omkim laitakun ka pia hi.

¹³ Amaute’ om laitakin Baruk kiangah,

¹⁴ ‘Vanglian Topa, Israel mite’ Pasian in a hong genin-ah: Hih gip a kikhen lai le a kikhen lo lai tegel la inla, sia loin sawtveipi a kikep theih nadingin leibeel khat sungah koih in.

¹⁵ Bang hang hiam cih leh Vanglian Topa, Israel mite’ Pasian in a hong genin-ah: Hih gamah innte, lote le leenggah lote mite in a leikikta ding uh hi,’ ci-in ka gen hi.

¹⁶ “Neriah’ tapa Baruk kiangah kileina lai ka piak khit ciangin Topa’ kiangah thu ka ngen a,

¹⁷ ‘Topa Pasian! Nangma vangpi le na khut tawh vantung le leitung na bawl khinzo hi. Nang a dingin a haksalua khat beek om lo hi.

¹⁸ Nangmah in a kikheel ngei lo itna mi tul tampite’ tungah na lak a, ahih hangin pate’ mawhnate tate’ tungah na thuk hi. Vanglian Topa a kici a lian mahmah, a hat mahmah Pasian aw,

¹⁹ na ngimnate lian mahmah a, na sepnate thupi mahmah hi. Mite’ nuntak zia khempeuh na mu a, amau’ nuntak dan le a sepna tawh kizui-in mi khempeuh tungah thaman na pia kim hi.

²⁰ Egypt gamah lim le na lamdangte na lak a, tu-in zong Israel gam le minam dangte khempeuh tungah lakin, tu-in mun khempeuhah na min thang mahmah hi.

²¹ Na mi Israel-te Egypt gam panin lim le nalamdang tawh ahi a, a khauh mahmah a kizan na khut tawh ahi a, lauhuaina lianpi tawh ahi zongin na lakhia a,

²² a pute a pate uh tungah piak dingin na ciamsa, bawngnawi le khuaizu tui bangin a luanna hih gam na pia hi.

²³ Amau zong lutin a luahpah uh hi. Ahih hangin amaute in na thu hong mang loin, thukham hong zui lo uh a, hih dinga na thupiakte khat beek a hih kei uh hi. Tua ahih manin amaute tungah hih siatna khempeuh na tungsak hi.

²⁴ “‘En in, khuapi lak nadingin kan a to khinzo uh hi. Namsau tawh kithahna hang, kialpi hang, le pulnatna hangin amaute a sim Khaldea mite’ khut sungah khuapi a kipia ding hi. Nong gensa bangin hong tun loh phamawh ahih manin en in, nang’ na mu ta hi.

²⁵ Ahih hangin Topa Pasian aw, hih khuapi Khaldea mite’ khutsung a tung ding hinapi, nangmah in, “A hong theihpih ding mi sam inla, tua lo lei in,” ci-in nong sawl teitei hi,’ ci-in thu ka ngen hi,” a ci hi.

²⁶ Topa in kei hong hopih a,

²⁷ “En in, kei pen Topa ka hi a, mi khempeuhte’ Pasian zong ka hi hi. Kei a dingin a haksa lua bang om ahi hiam?

²⁸ Tua ahih manin, Topa in kong cihin-ah: En in, hih khuapi Khaldea mite’ khutsung le Babylon kumpipa Nebukhadnezzar’ khut sungah ka pia ding a, amah in a la ding hi.

²⁹ Hih khuapi a sim Khaldea mite hong pai-in mei tawh khuapi a hal ding uh a, ka heh nadingin innkhum tungah Baal milimte paknamtui halna tawh a biakna innte uh le pasian dangte’ kiangah tuidawn biakna a piakna uh innte zong a haltum ding hi.

³⁰ Bang hang hiam cih leh Israel mite le Judah mite in a neulai pek uh a kipan ka muhna-ah a sia bekbek a gamta uh hi. Keimah Topa in kong cihin-ah, Israel mite in a khut uh tawh milim a bawlna uh hangin kei hong hehsak uh hi.

³¹ Hih khuapi in, a kisat cil a kipan tuni ciang dong hong hehsakin hong thangpaisak ahih manin ka muhna panin ka hemkhia ding hi.

³² Bang hang hiam cih leh Israel mite le Judah mite, a kumpite uh le a kumpi uliante uh, a siampite uh le a kamsangte uh a kipan Judah mite le Jerusalem khuamite khempeuh in kei hong hehsak nadingin siatna a bawl uh hi.

³³ Amaute in kei hong nungngatin hong maingat lo uh a, ka hilh tawntung hangin ka hilhna a hong mang kei uh hi.

³⁴ Amaute in ka min tawh a kilo biakinnsung nangawnah a kihhuai milimte a koih uh a, a ninsak uh hi.

³⁵ Hinnom Kuam-ah a tapate le a tanute uh tawh Molek pasian a biak nadingun Baal a’ ding biakna tau sangte a bawl uh hi. Hih a kihhuai na semin, Judah mite mawhna a bawlsak nadingun amaute ka sawl kei a, zong ka ngaihsunkha ngei beek kei hi.

³⁶ “Jeremiah aw, nangmah in hih khuapi, namsau tawh thahna, kialpi tunna le pulnatna tawh Babylon kumpipa’ khut sungah kipia ding hi, na ci hi. Ahi zongin tu-in tua bang na cihna hih khuapi tawh kisai-in Topa, Israel mite’ Pasian in kong genin-ah:

³⁷ En in, ka hehna, ka thangpaihna le ka lungkim lohna lianpi tawh ka hawlkhiatna gam khempeuh panin amaute ka kaikhawm kik ding a, hih munah tunpih kikin, lungmuang takin ka omsak ding hi.

³⁸ Amaute keima mi hi ding uh a, kei pen amaute’ Pasian ka hi ding hi.

³⁹ Amaute’ hoihna ding le amaute’ nunga a tu a tate uh a hoih nadingin a tawntungin kei hong zahtak nadingun a lungsim uh kikhat sakin, a nuntak dan uh zong ka kikhatsak ding hi.

⁴⁰ Amaute tungah a tawntungin hoihna ka bawl den nadingin amaute tawh tawntung thuciamna khat ka bawl ding hi. Kei kiang panin a kiheikhiat loh nadingun amaute sungah kei hong zahtakna ding uh lungsim ka guan ding hi.

⁴¹ Amaute tungah hoihna ka bawl manin ka lungdam ding a, ka lungsim khempeuh tawh thuman takin hih gamah amaute ka phut ding hi.

⁴² “Bang hang hiam cih leh Topa in kong cihin-ah, hih siatna khempeuh hih mite tungah ka tunsak mah bangin, amaute’ tunga ka khapsa a hoih khempeuh zong ka tungsak pelmawh ding hi.

⁴³ Nangmah in, hih gam pen mihing le ganhing a ten lohna gam simtham hi ding a, Khaldea mite’ khut sungah kipia ding hi, ci-in na gen hangin tu-in hih gamah lo kileikik ta ding hi.

⁴⁴ Benjamin gam, Jerusalem khua kimkot le Judah gam khuapite a kipan mualtung a khuapite, Shefelah zanglei-a khuapite le leitaw lam Negeb gam a khuapite-ah sum tawh lo kilei ding a, a theihpih mite tawh thukimna min gelhin gip tawh kikhen ding hi; bang hang hiam cih leh keimah in amaute a gam mah uhah ka omsakkik ding hi, Topa in kong ci hi,” a hong ci hi.