Jeremiah 25 - Tedim Bible

Kum Sawmsagih Sung Judah Mite A Kihawlkhiatna

¹ Josiah’ tapa Jehoiakim, Judah gamah kumpi a suahzawh kum sawmli a cin kumin Judah mite tawh kisai-in Topa in Jeremiah a hopih hi. (Hih hun pen Babylon-ah Nebukhadnezzar kumpi a suah kum ahi hi.)

² Kamsangpa Jeremiah in zong Judah gammi khempeuh le Jerusalem khuami khempeuhte’ tungah hih bangin a gensawn hi:

³ “Amon’ tapa Josiah, Judah gamah kumpi a suahzawh a kum sawm le thum pan tu ciang dong kum sawmnih le kum thum sung Topa in kei hong hopih a, ke’n zong note kiangah kong gensawn tawntung hangin note in na ngai kei uh hi.

⁴ Topa in ama nasem ahi kamsangte khempeuh hong sawl tawntung hinapi-in note in ngai loin na bil uh na ngat kei uh hi.

⁵ Amaute in, ‘Tu-in na vekpi-un na gitlohna uh le na gamtat khialhnate uh panin na kihei uhleh Topa in note le tanglai-a na pu na pate uh tungah na neih tawntung dingun a hong piak gam sungah na teng thei ding uh hi.

⁶ Pasian dangte’ nung delh loin, a na sem loin na biak kei uh a, na khut uh tawh na bawl uh milimte peuh bia-in na hehsak kei nak-uhleh, note bangmah hong cih kei ding hi,’ ci-in hong gen uh hi.

⁷ Ahih hangin Topa in kong cihin-ah, note in ka thu nong ngai kei uh a, note’ gim ngahna ding mahin na khut uh tawh milim bawlin nong hehsak uh hi.

⁸ “Tua ahih ciangin Vanglian Topa in kong cihin-ah, note in ka thu hong mang lo na hih uh ciangin

⁹ en un, leilu lama om minam khempeuhte le ka nasempa ahi Babylon kumpipa Nebukhadnezzar ka vaikhak ding a, hih gam le a sunga a teng mi khempeuh le hih kiima om gam khempeuh a sim dingin ka va la ding hi. Keimah in amaute ka susia mangkhin ding a, amaute a tawntungin siacipin simmawhna ka thuaksak ding hi, ci-in Topa in kong gen hi.

¹⁰ Tua tham loin lungdamna le kipahna awte, zinei thak pa le mothak nu’ awte, le an gawina suang gingte ka gingsak nawn kei ding a, meivak taangte ka sumit ding hi.

¹¹ Gam sung khempeuh kisia-in, gam simtham suak ding a, hih mite khempeuh kum sawmsagih sung Babylon kumpipa’ salin a om ding uh hi.

¹² Kum sawmsagih a cin khit ciangin Topa in kong cihin-ah, Babylon kumpipa le a gam amau’ mawhna hangin gim ka pia ding a, tua gam a tawntungin gam simtham ka suaksak ding hi.

¹³ Tua gam a siatna ding ka gensa thute khempeuh hih laibu sungah kigelh a, Jeremiah in gam khempeuhte’ kiangah a gen hi. Tuate khempeuh ka tungsak ding hi.

¹⁴ Bang hang hiam cih leh gam tampi le kumpi liante in amaute salin man ding uh a, amau’ gamtatna amau’ tungah ka thukkik ding hi,” a ci hi.

Gamdangte’ Ngah Ding Hehna Hai

¹⁵ Topa, Israel mite’ Pasian in kei hong hopih a, “Ka khuttung panin hehna tawh a kidim hih leenggahzu hai la inla, kong sawlna gamte khempeuh dawnsak in.

¹⁶ Amaute in dawn ding uh a, amaute’ kianga ka sawl namsau hangin hoi dangdangin a hailawh ding uh hi,” hong ci hi.

¹⁷ Tua ahih manin kei zong Topa’ khuttung panin tua hai ka la a, Topa’ hong sawlna gamte khempeuh ka dawnsak hi.

¹⁸ Jerusalem le Judah gam a khuapite, a kumpite uh le a gam uliante uh ka dawnsak a, tuni dongin gam simtham suakin, mite’ simmawhna thuakin, a min uh hamsiat nadingin a kizang hi. Tua hai panin a dawn a dangte:

¹⁹ Egypt kumpipa Faro le a nasemte, a kumpi uliante;

²⁰ Egypt mite le amau’ lakah a teng gamdang mite khempeuh; Uz gam sunga kumpite khempeuh le Filistia gam sunga om Ashkelon, Gaza, Ekron khuapite, le Ashdod khuapi-ah a omlai sunte’ kumpite khempeuh;

²¹ Edom, Moab, le Ammon mite;

²² Taia kumpite khempeuh, Sidon kumpite khempeuh; tuipi gei-a kumpite khempeuh;

²³ Dedan, Tema, Buz khuapite; a sam uh a tommet khempeuhte;

²⁴ Arabia kumpite khempeuh; sehnel gam sunga teng minam kigawm khawmte’ kumpite khempeuh;

²⁵ Zimri kumpite khempeuh, Elam kumpite khempeuh, le Media kumpite khempeuh;

²⁶ le a gamla hitaleh a nai hitaleh leilu lama a om kumpite khempeuh khat khit ciangin khat ka dawnsak hi. Tua ciangin leitung a om gam khempeuh ka dawnsak hi. A tawpna-ah Babylon kumpipa in a dawn ding hi.

²⁷ Tua ciangin Topa in hong hopih a, “Amaute kiangah, Vanglian Topa, Israel mite’ Pasian in hih bangin ci hi: ‘Dawn un. Kham unla lua un. Note kiangah namsau hong paisak ding ka hih manin tuk unla, thozo nawn kei un,’ va ci in.

²⁸ “Amaute in na khuttung panin hai la-in dawn ding uh a, hong nial uhleh amaute kiangah, ‘Vanglian Topa in hong genin-ah: Na dawn uh kul ding hi.

²⁹ Bang hang hiam cih leh en un, ka min tawh a kilo khuapi sungah suksiatna ka pan ding hi. Note in bangmah a thuak lo ding kisa na hi uh hiam? Gim thuak loin na om kei ding uh hi; bang hang hiam cih leh Vanglian Topa in kong cihin-ah, leitung a teng mite khempeuh a that dingin namsau khat ka sawl hi,’ ci in.

³⁰ “Tua ahih ciangin nangmah in amaute thu na va hilh ding a, hih bangin na va gen ding hi: ‘A sang vantung panin Topa hong hawk ding a, a tenna a siangtho panin hong paukhia ding hi. Ama mite’ langkhatah nasia takin hong hawkgawp ding a, leenggah cil mite bangin leitung mi khempeuhte a langpangin hong kiko ding hi.

³¹ A awging, leimong dongah kithawn ding hi; bang hang hiam cih leh gamte’ langkhatah Topa pang hi. Amah in mi khempeuh thu sit ding a, namsau tawh migilote a thatlum ding hi, Topa in ci hi,’ na ci ding hi.

³² “Vanglian Topa in a cihin-ah: En un, gam khat pan gam khatah siatna a paipai hi. Leitung a gamla pen mun panin huihpi hong nung hi.

³³ “Tua ni-a Topa’ thahlup mite’ luanghawmte leimong khat panin mong khat dongah a kithehthang ding uh hi. Amaute kuamah in a kah kei ding uh a, kikaikhawm loin, kiphum lo ding uh ahih manin leilakah ek nusiatin a kinusia ding uh hi.

³⁴ “No makaite aw, tau unla, kap un; vut lakah kikhuk un, no uliante aw. Bang hang hiam cih leh hong kithahlup ni ding le na kikhenthang ni ding uh hong tungzo hi; tuutal teelte bangin hong kithatlum ding hi.

³⁵ Makaite a dingin bukna ding om lo ding a, uliante a dingin suahtak theih nading om lo hi.

³⁶ Ngai dih un, makaite’ kahna aw le uliante’ tauna aw kiza hi. Bang hang hiam cih leh Topa in a gam uh suksiatsak hi.

³⁷ A lauhuai mahmah Topa’ hehna hangin a nop mahmah a gam uh kisia gawp hi.

³⁸ Topa’ namsau hang ahi a, a lauhuai ama hehna hang ahi zongin, amau’ gam pen gam simtham suakkhin ahih manin humpinelkai in a kua a nusiat bangin Topa in a mite nusiazo hi,” a ci hi.