Jeremiah 22 - Tedim Bible

¹ Topa in kei hong hopih a, “Judah kumpipa’ inn-ah va paisuk inla, hih bangin va gen in.

² David tokhom tungah a tu Judah kumpipa aw, nang le na nasemte a kipan hih kongpi-ah a hong lut na gammite khempeuh in Topa’ kammal ngai dih un.

³ Topa in a cihin-ah, thumanin diktat unla, a bawlsiate’ khutsung panin bawlsiatna a thuak mite honkhia un. Minam dangte, pa nei lote le meigongte simmawhbawl kha loin amau’ tungah ngongtat kei unla, hih munah zong mawhna nei lo mite that kei un.

⁴ Bang hang hiam cih leh note in hih thute na zuih takpi uhleh David’ suante kumpi suak tawntung ding uh a, amaute a kipan a nasemte uh le a mite uh sakol leeng le sakol tungah tuangin hih inn kongpite-ah hong lut ding uh hi.

⁵ Ahih hangin note in hih thute na zuih kei uhleh keimah Topa in kong genin-ah, hih inn gamlak a suaksak dingin ka kiciam hi.

⁶ Bang hang hiam cih leh Judah kumpi inn tawh kisai-in Topa in kong cihin-ah: Nang pen Gilead gam ahi a, Lebanon mual bangin ahi zongin na hoih mahmah hi. Ahih hangin nang sehnel gam kong suaksak ding a, kuamah a ten lohna khua kong suaksak ding hi.

⁷ Nang’ langkhatah a hong susia ding mi ka kithawisak ding a, a hei uh hong keng ding uh hi. Amaute in na sidar khuam hoihpente hong phuksakin mei-ah hong khulsak ding uh hi.

⁸ “Tua ciangin minam dang tampi in hih khuapi kantan ding uh a, a innsak a innkhangte’ kiangah, ‘Bang hangin hih khuapi lian hici bawl ahi hiam,’ ci-in khatlekhat a kidong ding uh hi.

⁹ Tua ciangin, ‘A Pasian uh Topa’ thuciamna taisan uh a, pasian dang peuh bia-in a na a sepsak man uh ahi hi,’ ci-in a kidawngkik ding uh hi, va ci in,” hong ci hi.

¹⁰ Judah mite aw, misi pa Josiah kah kei unla, khasiat kei un. A kipaikhiatpih Shallum hangin nakpitakin kapzaw un. Bang hang hiam cih leh a pianna gam a mu dingin amah hong kilehkik nawn lo ding hi.

¹¹ Bang hang hiam cih leh Judah kumpipa Josiah’ za a luah a tapa, hih mun panin a paikhia pa Shallum thu tawh kisai-in Topa in, “Amah hong kilehkik nawn lo ding a,

¹² salin a kikaihna munah a si ding hi. Hih gam a mukik nawn kei ding hi,” a ci hi.

¹³ Thuman lopi-in inn lam a, zuauthu tawh inndei tungnung a lam mi, ama na a mawkna-in a inn vengte a semsak mi, thaman a pia lo mi in gimna thuak tahen.

¹⁴ “Inndei tungnung zapi a awng inn gol khat ka lam ding hi,” ci-in tawlet vangte bawl a, taamtak singpeek tawh thuap sawm a, za san a zut mi in gimna thuak tahen.

¹⁵ Taamtak sing tawh inn na lam manin kumpi kisa na hi hiam? Na pa in an ne tui dawn a, thumanna le diktatna tawh na a sep manin a maa pai hi lo ahi hiam?

¹⁶ Amah in mizawngte le mi cimawhte thuman tawh thu khen a, na khempeuh a hoih a suak pah hi. Tu-a banga hihna pen kei nong theihna uh hi lo ahi hiam, Topa in kong ci hi.

¹⁷ Ahih hangin note in thuman lo tawh ngahna ding ahi zongin, mimawh lote’ sisan luanna ding ahi zongin, mi nuaisiahna le ngongtatna ding ahi zongin, na mitte uh le na lungsim uh na zang uh hi.

¹⁸ Tua ahih manin Judah kumpipa Josiah’ tapa Jehoiakim thu tawh kisai-in Topa in hih bangin kong ci hi: “Amaute in, ‘Sanggampa aw,’ ‘Sanggamnu aw,’ ci-in a sih ciangun a kikah bangun amah a sih ciangin a kah kei ding uh a, ‘Topa aw, kumpipa aw,’ ci-in zong a kah kei ding uh hi.

¹⁹ La si a kiphum bang lelin amah kivui ding a, Jerusalem kongpi pualamah kikai talin kipaai ding hi,” a ci hi.

²⁰ Jerusalem khua mite aw, Lebanon Mual tungah kahto-in awng unla, Bashan gamah va kiko un. Abarim mualtungah va kiko un; bang hang hiam cih leh na pawlte un gal lel khin hi.

²¹ Na daupai laitakun kong hopih hangin na hong ngai nuam kei uh hi. Na neu tung uh a kipan nong tuacih ngitnget uh a, keima thu nong mang ngei kei uh hi.

²² Na makaite uh huih in hong mut mangsak ding a, na pawlte uh salin kiman ding uh hi. Tua ciangin na gitlohna uh hangin maizumin na lung-am ding uh hi.

²³ Lebanon gam panin a kila taamtak inn sungah nuamtakin na teng uh hi. Ahih hangin gimna hong tun ciangin bangzah takin na tau ding uh hiam? Numei nausuak dingte tawh na kibang ding uh hi.

²⁴ Topa in Jehoiakim tapa Judah kumpipa Jehoiakhin tungah, “Kei a nungta Pasian ka hih mah bangin, nangmah in ka taklam khutah a om ka letmatthuhna tawh a kibang na hih hangin nang kong lakhia ding a,

²⁵ na kihtak, nang hong thatnuamte’ khut sungah kong pia ding hi. Babylon kumpipa Nebukhadnezzar le Khaldea mite’ khut sungah nang kong pia ding hi.

²⁶ Nangmah le nang hong paii na nu, na suahna mun uh ahi lo gam dangah kong lawnkhia ding a, tua laitakah na si ding uh hi.

²⁷ Na ciahkik nopna gam uhah na ciahkik thei nawn kei ding uh hi,” a ci hi.

²⁸ Jehoiakhin, kuama deih loh a kipaimang beel kitam tawh kibang ta ahi hiam? Bang hangin amah le a tate kilawnkhia a, a theih loh uh gamah kipaimang ahi hiam?

²⁹ Aw ka gam, ka gam aw, Topa’ kammal ngai dih ve’n!

³⁰ Topa in hih bangin ci hi: “Hih pa, ta nei lopa, a khan tawntungin a gualzo ngei lopa, ci-in ciamteh un. Ama suanlekhakte khat beek in David’ tokhom luah lo ding a, Judah gam a uk kei ding hi,” a ci hi.