Jeremiah 18 - Tedim Bible

Beelseek pa’ Beelseekna Tawh Thuhilhna

¹ Topa in kei hong hopih a,

² “Tho in. Beelseek pa’ inn-ah paisuk inla, tua lai-ah ka thute kong hilh ding hi,” hong ci hi.

³ Tua ciangin kei zong beelseek pa’ inn-ah ka paisuk leh beel a sek laitak ka va tuakkha hi.

⁴ Buan tawh a bawl a beel ama khut sungah kisia ahih manin beelseek pa in hoih a sak bangin beel dang khatin a sek pha hi.

⁵ Tua ciangin Topa in kei kiangah,

⁶ “Israel mite aw, Topa in kong cihin-ah, hih beelseek pa’ hih bangin note zong hong hih thei lo ding ka hi hiam? En un, beelseek pa’ khutsunga buan tawh kibangin, Israel mite aw, kei’ khut sungah note na om uh hi.

⁷ Minam khat peuhpeuh ahi zongin, gam khat peuhpeuh ahi zongin botkhia-in, khenkhamin, ka suksiatna ding thu, hun khat peuhpeuh lai-in ka gen khinzo ahi zongin

⁸ tua ka gensa minam le gam a siatna panin a kiheikik leh, ama tungah siatna tunsak dingin ka sehsa pen ka kisikkik ding a, ka tungsak nawn kei ding hi.

⁹ Minam khat peuhpeuh ahi a, gam khat peuhpeuh ahi zongin lam ding le phut dingin hun khat peuhpeuh lai-in ka gen khinzo ahi zongin,

¹⁰ amah in ka thu hong ngai loin, hoih ka sak lohte a bawl teitei leh, ama tungah hoihna bawl ding ka sehsa pen ka kisikkik ding a, ka bawl nawn kei ding hi.

¹¹ Tua ahih manin tu-in, Judah mite le Jerusalem khuamite’ kiangah Topa in a cihin-ah, ‘En un, note’ siatna ding ka geel a, note’ langkhatah ngimna khat ka nei hi. Na vekpi-un na siatna uh pan kilehkik unla, na omdan uh le na nasepnate uh bawlpha un,’ va ci in.

¹² Amaute in, ‘Tua bang gen kullo hi. Ko’ ngimna bangin ka gamta ding uh a, mi khempeuh ama lungsim sia’ deihna bangin a gamta ding uh hi,’ hong ci ding uh hi.

¹³ “Tua ahih manin Topa in kong cihin-ah: Minam dangte’ lakah hih bang thu a kiza ngei hiam, dong dih un. Keima mituam Israel in a mulkimhuai mahmah na khat a hihzo hi.

¹⁴ Lebanon mualtung vuk in susia ngei ahi hiam? Mualtung panin a hong luang a vot kilkel luite kang ngei ahi hiam?

¹⁵ Ahih hangin ka mite in kei hong mangngilh khin uh a, milim pasian-te kiangah paknamtui a hal uh hi. Amau’ tot ding lampi-ah tuk uh ahih manin a tot ngei uh lampi lui zui nawn loin, lampi lopi a tawn uh hi.

¹⁶ Amaute’ gam pen a mulkimhuai le simmawhna tawh a kiphitsan den ding gam a suaksak uh hi. Tua gam a kantan khempeuh mulkim mahmah uh a, lamdangsa-in a lu uh a pei uh hi.

¹⁷ Nisuahna lam huih in nin a mutmang bangin a galte uh mai-ah amaute ka thehthang ding hi. Haksatna a tuah ni-un amaute ka nungngat ding a, ka maingat kei ding hi,” hong ci hi.

Mite’ Sawmna le Jeremiah’ Thungetna

¹⁸ Tua ciangin amaute in, “Hong pai un, Jeremiah sawm ni. Bang hang hiam cih leh eite a hong hilh dingin siampite ahi zongin, i dot ding mipilte ahi zongin, Pasian’ thu a hong gen dingin kamsangte ahi zongin i nei hi. Hong pai un, amah mawhsakin ama thu peuhmah mal khat zong i mang kei ding hi,” hong ci uh hi.

¹⁹ Hong en in, Topa aw, keima hong thugennate le ka galte in keima thu a gennate hong ngai in.

²⁰ Hoihna pen siatna tawh a kituak ding mah ahi hiam? Keimah hong siahna-in gum a to uh hi. Nangma mai-ah kong ding a, amau a’ ding thuhoih kong gen hi. Na hehna amaute tungah na tunsak loh nadingin ka hong ngetnate hong phawk in.

²¹ Tua ahih manin a tate uh kial tawh puksisak inla, amaute namsau-in sisak in. A zite uh ta neisak kei inla, meigong suaksak in. A pasalte uh pulnatna tawh sisak inla, a tangvalte uh gal sungah namsau tawh kithatlum sak in.

²² Amau a thatlum ding galkapte thakhat thu-in paisak inla, amau’ innte panin kahna aw kizasak in! Bang hang hiam cih leh ka kiat nadingin gum to uh a, ka khete a awk nadingin thang a hong siah uh hi.

²³ Ahih hangin Topa aw, amaute in thah dingin kei a hong sawmna uh nang na thei hi. Amau’ khialhnate na maisak kei inla, nangma muhna panin amau’ mawhnate phiatmangsak kei in. Nangma mai-ah amaute guallelsak inla, na heh ni mahin hih ek in.