Jeremiah 15 - Tedim Bible

Judah Mite tungah Topa’ Hehna

¹ Tua ciangin Topa in kei hong hopih a, “Moses le Samuel nangawn ka mai-ah hong dingin hong thum uh zongin hih mite ka hehpih tuan kei ding hi. Ka muhna panin hawlkhia unla, paikhia sak un.

² Amaute in, ‘Koi-ah pai ding ka hi uh hiam?’ ci-in hong dot uhleh hih bangin genkik in: ‘Topa in, “Pulnatna tawh a si dingte pul-in si ding uh a, namsau tawh a si dingte namsau-in si ding uh hi. Kial tawh a puksi dingte kialin si ding uh a, sala kikai dingte zong salin kikai ding uh hi,” a ci hi,’ va ci in.

³ “Amaute’ sih nadingin gimna nam li ka tungsak ding hi. A kithahna ding uh namsau, a keizan gawp dingin ui, a valhtum ding le a susiagawp dingin huih lak a vasate le leilak a ganhingte ka koih ding hi.

⁴ Judah kumpi Hezekiah’ tapa Manasseh in Jerusalem khua-ah hih bangin a bawl thu leitung gam khempeuhte in mu-in a lau ding uh hi.

⁵ “Kua in nang hong hehpih ding ahi hiam? Jerusalem aw, kua in nang hong kah ding ahi hiam? Kua, hong lambaangin, damlenat kitheihsakna-in hong hawh ding ahi hiam?

⁶ Nangmah in kei nong taisanzo hi, Topa in kong ci hi. Kei nong nungngat niloh hi. Tua ahih manin ka khut zanin nang kong susia hi. Ka hehna ka ki-ipzo nawn kei hi.

⁷ Na gam sung khua kongpite-ah huihpi’ mut bangin note kong mutmang ding hi. Na tate uh ka beisak ding a, ka mite ka susia ding hi. Bang hang hiam cih leh na gitlohna uh le na omdan hoih lo panun na kiheikik kei uh hi.

⁸ Tuipi a sehnel omzah sangin nupi meigong ka tamsakzaw ding hi. Na tangvalte uh a khan laitakin ka that ding a, a nute uh ka lunggimsak ding hi. Note’ tungah thakhat thu-in lungkhamna le launa ka hong tungsak ding hi.

⁹ Ta sagih a nei nupi khakham vei-in a sibup hi. Sunkimlai hinapi ama a dingin khuamial bang a, maizumna le mindaina a thuak hi. No a nungta laite na galte un namsau tawh a hong satlup dingun ka hong pia ding hi, Topa in kong ci hi,” a hong ci hi.

¹⁰ Gimna ka thuak hi; ka nu aw, gam sung khempeuh a mite tawh a kitawng a kisel dingin kei nong suaksak hi. Ka sumte kuamah lah leitawisak loin kuama-a’ lah leitawi la lo napi, a vekpi-un kei hong hamsiat teitei uh hi.

¹¹ Topa aw, amaute’ hoih nadingin nang tungah kong thumsak kei a, gimna le haksatna hun ciangin ka galte a dingin nang’ tungah kong ngetsak kei leh tua amau’ hong hamsiatnate kei’ tungah hong tung ta hen!

¹² Mi khat in sik kuaitan zo lo ding ahihleh leilu lama sik le sumngo kihel khawm kuaitan zozaw ding ahi hiam?

¹³ Topa in, “Na gam sung tenga na bawl uh mawhna khempeuhte’ hangin na neih na lam uh le na sum na paite uh man ngah loin na galte uh ka tuahsakmang ding hi.

¹⁴ Na theih ngei loh uh gam khatah na galte uh’ na ka hong semsak ding hi. Bang hang hiam cih leh ka hehna mei bangin kitawhkuang a, a mit nawn kei ding hi,” a hong ci hi.

Topa in Jeremiah A Ompihna Gen

¹⁵ Tua ciangin keimah in: Topa aw, nang na thei hi. Hong phawk inla hong veh in. Kei a hong bawlsiate tungah phu hong laksak in. Ka galte tungah na lungduaina hangin kei’ sih nading piangsak kei in. Nangma hangin minsiatna a thuak ka hihlam hong thei in.

¹⁶ Na thute in kei hong kem a, an bangin ka ne hi. Na thute kei a dingin kipahna le lungdamna ahi hi. Bang hang hiam cih leh nangma minin kei hong kilo hi, aw, Topa, Vanglian Pasian aw.

¹⁷ Mi gualnuam mawkmawkte tawh ka kikhawl kei a, zong ka lungdam khawm kei hi. Nangma thu kong manna hangin kei tangkai ka hih manin a hehin ka omden hi.

¹⁸ Bang hangin ka natna dai thei lo a, ka liamna dam thei lo a, dam nuam het lo ahi hiam? Tui a kang lui tawh kibangin lungkiatna hong thuaksak ding na hi hiam, ka ci hi.

¹⁹ Tua ahih manin Topa in, “Na hong kilehkik leh kong koihna ngei-ah kong koihkik ding a, ka na na sem kik ding hi. Thu manpha lo gen loin thu manpha bek na gen leh, ka kamsang dingin ka hong zang ding hi. Nang kiangah amaute hong pai ding uh a, nang na hih leh amau’ kiangah na pai kei ding hi.

²⁰ Hih mite tungah sumngo a kibawl khuakulhpi kong bangsak ding a, amaute in a hong sim uh hangin a hong zo kei ding uh hi. Bang hang hiam cih leh a hong honkhia ding le a hong suaktasak dingin nang ka hong ompih hi, Topa in ka hong ci hi.

²¹ Migilote’ khutsung panin nang kong suaktasak ding a, mi lauhuaite’ khutsung panin nang kong honkhia ding hi,” a hong ci hi.