Jeremiah 14 - Tedim Bible

Guah Zuk lohna Thu

¹ Guah zu loin khua keuna tawh kisai-in Topa in Jerusalem kiangah hih bangin a gen hi:

² “Judah gam kap a, a khuapite maimang dekdek hi. A mite in puan vom khu-in leilakah bok uh a, Jerusalem khua-a om mite’ kahna aw ging hi.

³ Uliante in a nasemte uh tuitawi dingin sawl uh a, tuikhuk a zuat uhleh tui na om lo hi. A beel hawm uh tawh hong kilehkik uh a, lungkhamin cih nading thei loin a lu uh puan a khuh uh hi.

⁴ Lokhote lungmang uh a, a lu uh puan a khuh uh hi. Bang hang hiam cih leh guah zu lo ahih manin lei a keugawp hi.

⁵ Lopa om lo lua ahih manin sazuk in gamlakah a no a nusia liang hi.

⁶ Gam sakolte, bangmah om lohna mualtungah se-alte bangin a nak huhu uh hi. Lopa om lo ahih manin a hakzo kei uh hi.

⁷ Ka mite in kei tungah, ‘Topa aw, ka mawhna uh kote’ langkhatah hong pang ahi ta zongin nangma min hangin kote hong hehpih in. Kote in tam veipi nang kong nungngat uh a, nangma tungah ka hong khial khinzo uh hi.

⁸ Israel mite’ lamet pa aw, haksat hun ciangin ko a hong honkhia pa na hi hi. Bang hangin ka gam sung uhah khualmi bangin nang omin khualzin zan khat bek a taam bangin hong om na hi hiam?

⁹ Bang hangin mi lungkiagawp bangin omin, a honkhia thei lo galkap pa bangin om na hi hiam? Ahih hangin Topa aw, kote’ laizangah nang na om a, nangma minin kote hong kisam hi. Kote hong nusia kei in,’ hong ci uh hi,” hong ci hi.

¹⁰ Hih mite tawh kisai-in Topa in thu gen a, “Kei kiang panin amaute vakkhia kawikawi nuam uh a, a kideek kei uh hi. Tua ahih manin Topa keimah in amaute ka sang kei a, a khialhnate uh phawkin, a mawhnate uh hangin gim ka pia ding hi,” a ci hi.

¹¹ Topa in kei kiangah, “Hih mite in thupha a ngah nadingin thu hong ngen nawn kei in.

¹² An a tan’ uh hangin amau’ thumna ka ngai kei ding a, meihal biakna le an tawh biaknate hong piak uh hangin ka sang kei ding hi. Amaute namsau tawh ahi zongin, kial tawh ahi zongin, pulnatna tawh ahi zongin ka sisakzaw ding hi,” hong ci hi.

¹³ Tua ciangin keimah in, “Ah, Topa Pasian aw, en dih in. Kamsangte in amaute kiangah, ‘Note in namsau ahi zongin, kial ahi zongin na mukha ngei kei ding uh a, hih munah Pasian in lungnopna kip hong pia ding hi,’ a ci uh hi,” ka ci hi.

¹⁴ Tua ciangin Topa in, “Tua kamsangte in kei’ min suangin zuauthu hong gen uh hi. Amaute ka sawl kei a, thu ka pia kei a, zong ka hopih kei hi. Note kiangah hong gen uh thute a man lo maangmuhna, bangmahin a kimang lo aisanna, le amau’ ngaihsuttawm thute ahi hi.

¹⁵ Tua ahih ciangin ka sawl lohpi, ‘Hih gam sungah namsau ahi zongin, kial ahi zongin hong tung lo ding hi,’ ci-in keima min suangin thu a gen kamsangte tawh kisai-in Topa in ka cihin-ah, namsau le kial tawh hih kamsangte a si khin ding uh hi.

¹⁶ A hilh uh mite in zong kial le namsau thuakin amaute a kipan a zite uh, a tapate uh, le a tanute uh Jerusalem khua kongzing lakah kipaithang ding a, kuamah in a vui kei ding hi. Bang hang hiam cih leh amau’ gitlohna amau’ tung mahah ka buaksuk ding hi,” hong ci hi.

¹⁷ Tua ciangin Topa in kei tungah thu hong gen a, “Jeremiah aw, amaute kiangah, ‘Sun le zanin ka khitui luangluang hen la, kang ngei kei tahen. Bang hang hiam cih leh keima mite in nakpitakin liamna thuak uh a, nakpitakin a kisat uh hi.

¹⁸ Lolai-ah paikhia leng, namsau tawh a kithat mi bekbek ka mu a, khuapi sungah lut leng, kialin a puksite bekbek ka mu hi. Kamsangte le siampite in koi-ah pai ding cih thei lopi-in gam sungah an ngenin a vak kawikawi uh hi,’ ci-in va gen in,” hong ci hi.

¹⁹ Topa aw, nangmah in Judah gam nialsiang khinzo na hi hiam? Zion khua kihhuai sa na hi hiam? Bang hangin kote liamna hong thuaksak a, hong damsak nawn lo na hi hiam? Lungnopna ka lamen uh a, hoihna bangmah a hong tung kei hi. Damna ding hun ka lamen uh a, lauhuaina bekbek ka mu uh hi.

²⁰ Topa aw, ka gitlohna uh le ka pute ka pate uh gitlohnate ka hong pulak uh hi. Bang hang hiam cih leh nangma tungah ka hong mawh khin uh hi.

²¹ Nangma min na khualna-in kote hong nolh kei inla, a vanglian na tokhom mindaisak kei ta in. Kote tawh nong thuciamna hong phawk inla, hong ciampel kei ta in.

²² Gamdang pasian zuaute’ lakah guah a zusak thei om ahi hiam? Tua ahih kei leh zong vantungmi in ama thu-in guah zu tawmsak thei ahi hiam? Tua bang a hih thei nang bek hi lo na hi hiam? Topa kote’ Pasian aw, nangmah in tuate khempeuh hih na hih manin nangma sungah lametna kong nei uh hi.