Jeremiah 13 - Tedim Bible

Dialkaih Ngot Tawh Thuhilhna

¹ Topa in kei tungah, “Pai inla patpuan dialkaih khat na lei khit ciangin kawtsak loin teeng in,” hong ci hi.

² Tua ciangin kei zong Topa’ hong gen mah bangin dialkaih khat lei-in ka teeng hi.

³ Topa in a nih veina hong hopih a,

⁴ “Na kawngah na teen, na dialkaih lei la in. Tho inla Eufratis gun-ah pai in. Tua lai-ah suanghawm sungah va seel in,” hong ci leuleu hi.

⁵ Kei zong pai-in Topa’ hong sawlna bangin Eufratis gun gei-ah ka seel hi.

⁶ Tua zawh ni tampi khit ciangin Topa in kei kiangah, “Eufratis gun-ah va pai inla, na seel dingin ka hong sawl na dialkaih va lakik in,” hong ci hi.

⁷ Tua ciangin kei zong Eufratis gun-ah pai-in dialkaih ka seelna mun khuat kikin ka la hi. Dialkaih na ngotgawp khin a, zattheih ding hi nawn lo hi.

⁸ Tua ciangin Topa in kei hong hopih a,

⁹ “Topa in kong cihin-ah, hih bangmahin Judah mite’ kisaktheihna le Jerusalem khuate’ ki-uatsaknate ka susia ding hi.

¹⁰ Ka thu hong ngai nuam loin amau’ ngaihsutna bang bekin a pai tentan nuam, pasian dangte’ na a sem ding le a bia dingin a nung a zui hih migilote pen zattheih ding ahi nawn lo, hih dialkaih bang ahi ding uh hi.

¹¹ Bang hang hiam cih leh dialkaih, mite’ kawng tungah a belh cinten mah bangin Israel mi khempeuh le Judah mi khempeuh kei’ tungah a hong belh cinten dingin ka bawl hi. Tua hileh amaute ka mi hi ding uh a, ka minthanna, ka hoihna, le ka vangliatna ding ahi ding uh hi. Ahih hangin amaute in ka thu hong mang lo uh hi, Topa in kong ci hi,” hong ci hi.

Leenggahzu Tawh A Kidim Beelte Tawh Thuhilhna

¹² Topa Pasian in kei kiangah, “Jeremiah aw, amau’ kiangah, ‘Topa, Israel mite’ Pasian in a hong genin-ah, “Zubeel khempeuh leenggahzu tawh a kidim ding hi,” hong ci hi,’ va ci in. Amaute in nang kiangah, ‘Beel khempeuh leenggahzu tawh kidim ding cih kote in thei lo ka hi uh hiam?’ hong ci kik ding uh hi.

¹³ Tua ciangin nangmah in amaute kiangah, ‘Topa in hong cihin-ah: En un, David’ tokhom tungah a tu kumpite, siampite, kamsangte, le Jerusalem khua-a a teng mi khempeuh a kipan gam sungah a om mi khempeuh zu tawh kidim sakin ka khamsak ding hi.

¹⁴ Pate le tate a kipan amaute khatlekhat ka kiphusak ding a, Topa in kong cihin-ah, hehpih lo, lainat lo, it loin ka sisak ding hi, ci hi,’ va ci in,” hong ci hi.

Judah A Kisikkik Lohna Hangin Salin Mat Ding Tawh Tawnna

¹⁵ Ngai-in na bil uh ngat un; kisathei kei un. Bang hang hiam cih leh Topa in thu a genzo hi.

¹⁶ Topa in khua mialsak a, khuamialna mualtungah na tuk ma un, na lamet uh khuavak pen khuamial bikbek a suah ma-in, Topa na Pasian uh pahtawi un.

¹⁷ Ahih hangin ka thu nong ngaih kei uhleh na kisaktheihna uh hangin ka kapsim ding a, khitui luangin nakpitakin ka kidik ding hi. Bang hang hiam cih leh Topa’ tuuhonte sal dingin kikaikhia zo hi.

¹⁸ Topa in kei kiangah, “Kumpipa le a nu kiangah, ‘Na kumpi tokhomte tung panun hong tuaksuk un. Bang hang hiam cih leh na kumpi lukhute uh na lu tung uh panin kia khinzo hi,’ va ci in.

¹⁹ Negeb gam a om khua kongpite lah kikhak a, kuamah lut thei nawn lo hi. Judah mite zong salin kikai a, a vekun sal suak khin uh hi,” hong ci hi.

²⁰ Jerusalem khua aw, khuadak inla, leilu lam panin a hong paite en dih in. Nangmah a hong kipia a hoih mahmah na tuuhonte koi-ah om ahi hiam?

²¹ Nangma lawm dingin na bawl mite teekteek in nang hong uk ni ciangin bang na ci ding hiam? Numei nausuakte in na a sak velval uh bangin nang zong na na sa ding hi.

²² Bang hangin hih thute kei tungah hong tung ahi hiam, ci-in na ngaihsut leh na mawhna a liatluatna hang ahi hi. Tua thu hangin na nik hong kihawkgawp a, a hong kibuan gawp ahi hi.

²³ Ethiopia mivomte in a vun uh khek thei a, kamkei in a gial khek thei ahi hiam? A khek theih uhleh siatna bawl ding a zongsang khin note in zong a hoih na bawl thei ding uh hi.

²⁴ Sehnel gam panin a hong nung huih in buhvai a mut bangin note kong thehthang ding hi.

²⁵ Hih pen nangma ngah dingin ka hong sehsak ahi hi, Topa in kong ci hi. Bang hang hiam cih leh kei na hong mangngilh a, pasian zuau peuh na um hi.

²⁶ Kei mahmah in na nik kong hawksak ding a, kong maizumsak ding hi.

²⁷ Na kihhuainate, na angkawmna, na hukna le gamlak mualtungah numei paktat bangin milim pasian peuh na biak kawikawinate ka muzo hi. Jerusalem aw, gimna ngah ta in. Na siantho nadingin bang tanvei sawt ding ahi hiam, a ci hi.