Jeremiah 1 - Tedim Bible

Jeremiah A Kisapna le A Kisawlna

¹ Benjamin gam Anathoth khua-a siampi khat ahi Hilkiah’ tapa Jeremiah’ thugente hih bang ahi hi.

² Amon’ tapa Josiah, Judah gamah kumpi a suahzawh kum sawm le kum thum a cin kumin ‘Topa in Jeremiah a hopih hi.

³ Josiah’ tapa Jehoiakim kumpi a suah ciangin Topa in Jeremiah a hopih leuleu hi. Tua khit ciangin Josiah’ tapa Zedekiah kumpi a suahzawh kum sawm le kum khat a phak kum, a kha ngana, Jerusalem khua mite sal tang dingin a kipuakkhiat dong tam veipi a hopihpih hi.

⁴ Topa in kei hong hopih a,

⁵ “Gil sungah kong bawl ma-in nang kong thei khinzo hi. Na suah ma-in nang kong teelkhia khinzo a, minam dangte tungah kamsang dingin kong koih khinzo hi,” hong ci hi.

⁶ Tua ciangin keimah in, “Ah, Topa Pasian aw, kei thugen ka siam kei a, naupang khat ka hi lel hi,” ka ci hi.

⁷ Ahih hangin Topa in, “‘Naupang khat ka hi lel hi,’ ci kei in; bang hang hiam cih leh kong puakna khempeuhte kiangah na pai ding a, kong sawl peuhpeuh na gen ding hi.

⁸ Amaute kihta kei in; bang hang hiam cih leh nangmah a hong hu dingin ka hong ompih hi, Topa in kong ci hi,” hong ci hi.

⁹ Tua ciangin Topa in a khut tawh hong zam phei-in ka muk hong lawnsakin hong hopih hi. “En in, ka thute na kam sungah kong koih khinzo hi.

¹⁰ Gam khempeuh le kumpi khempeuhte’ tungah a botkhia ding le a phelkhia dingin ahi zongin, a susia ding le a lawnkhia dingin ahi zongin, a lam ding le a phut dingin ahi zongin, tuni-in za, nang kong piazo hi,” hong ci hi.

¹¹ Tua ciangin Topa in kei tungah, “Jeremiah aw, bang mu na hi hiam?” ci-in hong dong hi. Kei zong, “Ngak, a kici almond singhiang khat ka mu hi,” ci-in ka dawng hi.

¹² Tua ciangin Topa in, “Na man hi; bang hang hiam cih leh ka thugente ka tangtunsak nadingin kei zong ka ngak hi,” hong ci hi.

¹³ Topa in a nihveina hong hopih leuleu a, “Bang na mu hiam?” ci-in hong dong hi. Kei zong, “Beel a so khat ka mu a, leilu lam panin hong awnsuk hi,” ka ci hi.

¹⁴ Tua ciangin Topa in, “Leilu lam panin hih gammi khempeuhte’ tungah siatna hong sosuk ding hi.

¹⁵ Bang hang hiam cih leh leilu lamah a om gam khempeuh keimah in ka sam a, amaute hong pai-in Jerusalem khua kongpite-ah ahi zongin, khua kimkota kulh kiimte-ah ahi zongin, Judah gam khuapi khempeuh kiimte-ah ahi zongin a kumpi tokhomte uh hong phut ciat ding uh hi.

¹⁶ Ka mite in kei hong taisan uh ahih manin a mawhna uh hangin amau’ tungah thu ka khen ding hi; pasian dangte tungah meihal biakna pia uh a, a khut uh tawh a bawlsa uh milimte a bia uh hi.

¹⁷ Tua ahih manin Jeremiah aw, kithawi in. Pai inla kong sawl khempeuh amaute kiangah va gen in. Amaute kihta kei in; na kihtak leh amau’ mai-ah kong lausakzaw lai ding hi.

¹⁸ En in, hih gambup langah a ding ding, Judah kumpite, uliante, siampite le hih gammi khempeuh langah a pang dingin tuni-in nang, khuapi muanhuai khat bang ahi zongin, sikkhuampi khat bangin ahi zongin, sumngo kulhpi khat bangin ahi zongin ka hong bawl hi.

¹⁹ Amaute in nang’ langkhatah hong do ding uh hi. Ahih hangin a hong zo kei ding uh hi; bang hang hiam cih leh Topa in kong cihin-ah, nangmah a hong hu dingin ka hong ompih ding hi,” a hong ci hi.