Isaiah 66 - Tedim Bible

Topa’ Thukhenna le Zion’ Mailam Daupaina

¹ Topa in hih bangin ci hi: Vantung pen keima tokhom hi a, leitung pen keima khengakna ahi hi. Kei a dingin koi lai-ah inn lam ding a, keima tawlngakna ding mun koi lai ahi hiam?

² Hih nate khempeuh keima bawlsa ahih manin hih nate khempeuh keima-a’ ahi hi, Topa in ci hi. Ahih hangin kiniamkhiatin, lungsim a kitamzan mipa, keima thu-ah lau-in a ling kelkel pa, keima deih mipa ahi hi.

³ Biakna-in bawngtal a gopa in mihing zong that hi. Biakpiakna-in tuuno a gopa in ui ngawng zong at hi. An tawh biakpiakna a bawlpa in vok si zong pia hi. Paknamtui tawh phawkna biakpiakna a bawlpa in milim zong bia-in thupha a pia hi. Hih mite amau ut bang ciatin gamta uh a, amau’ kihhuai gamtatna uhah nuam a sa uh hi.

⁴ Tua ahih ciangin amaute tungah gimna ka tungsak ding a, amau’ kihtak thute mah amau’ tungah ka tungsak ding hi. Bang hang hiam cih leh ka sap ciangin kuamah in hong dawng lo uh a, thu ka gen ciangin kuamah in hong ngai lo uh hi. Keima thu man loh ding mah utzaw uh a, a sia-in gamta uh hi, a ci hi.

⁵ Ama thu-ah lau-in a ling mite aw, Topa’ thu za un: Keima tungah note nong cihtakna hangun na mipihte uh pawlkhat in note hong mudahin hong hawlkhia ding uh a, zahpihna tawh note hong hopihin, “Lungdamin na om ding uh hong deihsak ka hih manun, Topa in ama liatna hong lak hen la, note hong honkhia ta hen,” hong ci vial ding uh hi. Hih banga hong paute pen mindaina a thuak ding mite ahi uh hi.

⁶ Ngai un, khuapi sunga gamlumna! Biakinn sunga awging! Topa in a galte gim a piakna huging ahi hi.

⁷ Ka khuapi siangtho pen nausuak natna a thuak ma-in nau a suak nupi tawh kibang a, nausuak gimna a tun ma-in amah in tapa khat a nei hi.

⁸ A tuaci bang kua’n za ngei na hi uh hiam? A tuaci bang kua’n mu ngei na hi uh hiam? Ni khat thu-in gam khat piang ngei ahi hiam? Tomnokhat sungin minam khat piangkhia ngei ahi hiam? Bang hang hiam cih leh Zion in nausuak gimna a thuak phetin a minamte suakkhia pah hi.

⁹ Nausuah hun tungsak napi-in suaksak lo ding ka hi hiam, Topa in ci hi. Nau a suakkhiasak keimah in naugil khakcip ding ka hi hiam, na Pasian in ci hi.

^10-11 Naungek in a nu’ nawi teepin nuam a sak mah bangin, Jerusalem in nuam a sakna ah nuam na sakkhawm theih nadingun amah a it khempeuhte aw, Jerusalem tawh lungdam unla, ama hangin kipak un. Ama hangin kapin a thum khempeuhte aw, ama lungdamna ah amah tawh lungdam khawm un, a ci hi.

¹² Topa in hih bangin ci hi: Tu-in gunpi bangin nopsakna le tuiletkhia bangin minamte’ hauhna ama tungah ka tungsak ding hi. Note pen a nu’ nawi teepin, a ang-ah kipua a, a khuk tungah a diang naungek na bang ding uh hi.

¹³ A nu in a ta a hehnep bangin note kong hehnem ding a, note in Jerusalem khua sungah hehnepna na ngah ding uh hi.

¹⁴ Hih thu a hong piang na muh uh ciangin na lungdam ding uh hi. Note hong thahatsakin hong cidamsak ding hi. Tua ciangin ka thu hong mangte ka huhna, ka galte tungah ka hehna ka lahna thu na thei ding uh hi, ci hi.

¹⁵ Bang hang hiam cih leh heh mahmahna tawh ama sinsona le meikuang tawh gim a pia dingin meikuang sungah Topa hong pai ding a, huihpi bangin a leengte hong pai ding hi.

¹⁶ Bang hang hiam cih leh Topa in mei tawh thukhenna sem ding a, a mawh mi khempeuh tungah a namsau tawh thu khen ding a, Topa in a thah mite tam mahmah ding hi.

¹⁷ Biakna huan sungah a pai dingin amaute kisiansuahin a kisiangthosak, a laizang a om pen a zuite, voksa le kihhuaina le zusa a nete beimang khawm ding hi, Topa in ci hi.

¹⁸ Bang hang hiam cih leh amau’ nasepnate le amau’ ngaihsutnate ka thei a, minam khempeuh a khawm dingin ka hong pai hi. Amaute hong pai-in ka minthanna mu ding uh a,

¹⁹ amaute’ lakah lim khat ka khai ding hi. Amau’ sung panin, minamte tung, Tarshish mite tung, Put mi le Lud mite tung, Meshek mite tung, Tubal mi le Javan mite tung, ka min hoihna a za ngei lo, ka minthanna a mu ngei lo tuipi gei-a om gam mite tungah a suakta lai mite ka sawl ding hi. Amaute in minamte lakah ka minthanna genthang ding uh hi.

²⁰ Israel mite in beel siangtho sungah an tawh amau biakpiakna tawi-in Topa’ biakinn-ah hong paipih uh mah bangin amaute in minam khempeuh lak panin Topa’ tungah piak dingin na sanggamte khempeuh uh, sakolte, leengte, taalte, le late, kalaoh hatte tungah hong pua-in ka mual siangtho Jerusalem-ah hong paipih ding uh hi, Topa in ci hi.

²¹ Amaute kimkhat zong, siampite le Levi mite a suak dingin ka la ding hi, Topa in ci hi.

²² Ka bawl ding vantung thak le leitung thak pen ahihleh keima mai-ah kip ding hi. Tua mah bangin na suan na khakte uh le na min uh kip ding hi, Topa in ci hi.

²³ Khadet khat pan Khadet khat, keimah bia dingin Jerusalem-ah mi khempeuh hong pai ding uh hi, Topa in ci hi.

²⁴ Amaute a ciah uh ciangin kei hong lehdo mite’ luanghawmte en ding uh hi. Bang hang hiam cih leh amau a ne thante si ngei loin, amau a kihalna mei mit ngei lo ding a, amaute pen mi khempeuh’ kih hi ding hi, a ci hi.