Isaiah 59 - Tedim Bible

Nambup Gitlohna Pulakna

¹ A honkhia zo lo dingin Topa zawngkhal lo a, khua a za thei lo dingin a bil ngong lo hi.

² Ahih hangin note’ mawhnate in note le na Pasian uh kikhenna hong piangsak a, amah in note’ aw hong zak theih loh nadingin na khialhnate un ama maitang liah hi.

³ Bang hang hiam cih leh na khutte uh mi thahna sisan tawh nin a, na khutmete uh mawhna tawh a nin hi. Na mukte un zuauthu gen a, na leiite un gitlohna thu a gen hi.

⁴ Kuamah in thutang tawh thu na nei kei uh a, thuman tak tawh thukhen zumah na pai kei uh hi. Note in bangmah lopi suanin nei-in zuauthu na gen uh a, siatna ding thu ngaihsunin buaina na piangsak uh hi.

⁵ Na ngaihsutnate uh gul gunei tui bangin gu a nei hi a, na vaihawmnate uh maimom khau puan tawh kibang lel hi. Gul gunei tui khat sukham lehang adang khat hong tui zel hi.

⁶ Na maimom khau puante uh kizang thei lo ding a, kuamah in silhlo ding uh hi. Na vaihawmnate uh tua maimom khau puan bangin a mawkna suak lel ding hi.

⁷ Siatna bekbek na geelgeel uh a, na sepkhiat ding uh na ngaklah mahmah uh hi. Mawhnei lo mite thah ding haksa na sa kei uh hi. Na paina khempeuh uhah siatna vive om kawikawi hi.

⁸ Note’ omna peuhah kuamah lungmuang thei lo a, note’ sepna khempeuhah thuman khat beek om lo hi. Na lungsim uh kawi mahmah a, hong zuikha mite in thunuam mu ngei lo uh hi.

⁹ Tua ahih ciangin ei a hong gimsakte kiang panin Pasian in a hong hotkhiat lohna a hang i thei hi. Eite in a nuam ding i lamen a, ahi zongin lungzinna bekbek i tuak hi.

¹⁰ Mittaw bangin kawm i zawt a, mit nei lote bangin i mai hi. Suntang laipi mahin khuamial lak bangin i tuk a, a hat mite lakah misi tawh i kibang hi.

¹¹ Eite khempeuh vompi bangin i humham a, vakhu bangin i thumthum hi. Eite in thutang i zong a, ahi zongin khat zong i mu kei hi. Hong hotkhiat ding i ngen a, ahi zongin bangmah hong piang lo hi.

¹² Bang hang hiam cih leh nangma tungah kote’ thupalsatna tampi tak pha a, ka mawhnate un kote’ langah teci hong pang hi. Kote’ thupalsatnate, ka mawhnate uh ka thei uh hi.

¹³ Nangmah hong lehdo-in nang kong nial uh a, na thu kong zui kei uh hi. Midangte nengniamin nang kong lehdo uh hi. Ka ngaihsutnate uh khial a, ka thugente uh zuauthu vive ahi hi.

¹⁴ Thutang kihawlkhia a, thuman in hong naih thei lo hi. Mihonpite’ kikhopna munah thuman kizang lo a, thutang tum thei lo hi.

¹⁵ Thuman om lo lua ahih manin siatna a pelh mipa pen mihai-in kingaihsun zawsop hi. Topa in hih thu mu a, thutang om lo ahih manin amah lungkim lo hi.

¹⁶ Amah in nenniamna a thuakte a huh ding mi khat beek a om lohna a mu hi. Tua ahih ciangin amaute a honkhia ding le a gualzawh nadingin ama vangliatna a zang ding hi.

¹⁷ Amah in thumanna pen awmdal lum bangin silh ding a, gualzawhna pen sik lukhu bangin khu ding hi. Na khempeuh a manin bawlkik nopna, gimna a piangsakte gim pia-in thukkik nopna lungsim puan bangin a silh ding hi.

¹⁸ Amau’ gamtatna bangin amah in thukkik ding a, amah a langpangte gim pia ding hi. Ama galte a thukkik ding hi. A gamla pekah a om tuipi gei-a gamte zong a thukkik ding hi.

¹⁹ Tua ahih ciangin nisuahna le nitumna kikalah a om mi khempeuh in amah zahtakin, a vangliatna kihta ding uh hi. Bang hang hiam cih leh huihpi nung bang, tuipi khang bangin amah hong pai ding hi.

²⁰ Topa in ama mite tungah, “Note a hong hu dingin Jerusalem-ah kong pai ding a, mawhna panin a kiheikhia mi peuhmah ka hong honkhia ding hi.

²¹ “Note tawh hih bangin thuciamna ka bawl hi: Keima vangliatna tawh keima thukhamte le ka thuhilhnate note tungah ka hong pia khin a, tu a kipanin a tawntungin note in tua thute zui-in na suanlekhakte uh na hilh ding uh a, a khang khangin na maimangsak kei ding uh hi,” a ci hi.