Isaiah 56 - Tedim Bible

Pasian’ Thuciam Zuihna Thaman

¹ Topa in hih bangin ci hi: “A sawt loin note ka hong honkhia ding a, hong khahkhia ding ka hih manin thutang thumanin gamta un.

² Hih banga a gamta mite, hih thu a lenkip mihingte, Sabbath tangin a siasak lote, siatna bawlna ding panin hoihtakin a kikemte, thupha ngah mi ahi hi,” a ci hi.

³ Topa pawlin a beel gamdang mipa in, “Topa in ama mite kiang panin kei hong khenkhia taktak ding hi,” ci kei hen. A kiget mipa in, “En un, kei pen Pasian’ mite lakah a kihel thei ding ka hi kei hi,” ci kei hen.

⁴ Bang hang hiam cih leh Topa in hih bangin ci hi: “Keima Sabbath nite tangin, kei hong lungdamsak thei nate teel a, ka thuciamna a lenkip a kiget mite tungah

⁵ ka innsung le ka huang sungah tanu le tapate sangin a hoihzaw phawkna le min ka pia ding a, a mang ngei nawn lo ding a kip tawntung min amaute tungah ka pia ding hi.

⁶ “Ama na a sem ding, Topa’ min a it ding, ama nasem a suak dingin Topa pawlin amah a beel gamdang mite, Sabbath ni tangin a siasak lo, ka thuciamna hoihtakin a lenkip mi peuhmah,

⁷ ka mual siangtho-ah paipihin keima thungetna inn sungah ka lungdamsak ding a, amaute’ meihal biakna le a biakpiaknate uh ka biakna tau tungah kisang ding hi. Bang hang hiam cih leh ka inn pen mi khempeuh a dingin thungetna inn kici ding hi.

⁸ Israel a kikhenthangte a kaikhawm Topa Pasian in, a kikaikhawmsa mite banah midangte keima kiangah ka kaikhawm lai ding hi, ci hi,” a ci hi.

Israel-te’ Milim Biak Mawhsakna

⁹ Lo sungah a om ganhing khempeuhte, gamlakah a om ganhing khempeuhte aw, a netum dingin hong pai un.

¹⁰ Amau’ galvilte a mit uh taw a, amaute khempeuh in bangmah thei lo uh hi. Amaute khempeuh ui ham thei lo inncing tawh kibang uh a, amaute in tawng thei lo uh hi. Mot paupau, lumlum, lususu in om ding bek nuam a sa uh hi.

¹¹ Uite in nakpitakin duh uh a, kham hun cih nei ngei lo uh hi. Tuucingte in zong thutheihna nei lo uh hi. Amaute khempeuh amau tum ciatin gamta uh a, a vekpi-un amau’ phattuamna ding bek a zong ciat uh hi.

¹² Amaute in, “Hong pai un, leenggahzu nene ni; khamtheihzu dawndawn ni. Zing ciangin zong tuni sangin nuamzaw lai ding hi,” a ci uh hi.