Isaiah 52 - Tedim Bible

Salsuahna panin Pasian in Zion Khahkhia ding

¹ Zion aw, khanglo in; khanglo inla na tha khauhsak in. Khuapi siangtho Jerusalem aw, na puan hoihte silh in. Bang hang hiam cih leh dawibia mite le a nin mite nang sungah hong pai nawn lo ding hi.

² A kimancip Jerusalem mite aw, leivui panin kisingkhia unla dingto un. A kiman Zion mite aw, na ngawng panun hong kihenna khaute sutkhia un.

³ Bang hang hiam cih leh Topa in, “Man nei loin note hong kizuak a, sum pia loin note hong kitankhia ding hi.

⁴ Bang hang hiam cih leh Topa Pasian in hih bangin ci hi: Egypt gamah peemta dingin ka mite a masa-in pai uh a, tua banah thu om lopi-in Assiria in amaute nengniam uh hi.

⁵ Tu-in Babylon-ah tua bangmahin amaute tungah piang leuleu hi. Thu om lopi-in salin om uh hi. Amau a ukte, kihihsakna tawh awng uh a, sunthapai-in keima min kisimmawh hi.

⁶ Tua ahih ciangin ka mite in keima min hong thei ding uh a, thu a gen pa pen keimah ka hihna tua ni ciangin amaute in hong thei ding uh hi. Keimah, hih lai-ah ka om hi,” a ci hi.

⁷ Thuhoih hong puak, kilemna thu a genzak, thuhoih thupha a hong puak, hotkhiatna thu a genzak, Zion tungah, “Na Pasian in uk hi,” ci-in mualte kantanin thu hong gen kamtai pa bangzahin hoih ahi hiam?

⁸ Ngai un, na galvilte un a aw uh sangsak a, amaute in lungdamin la sa khawm uh hi. Bang hang hiam cih leh Zion-ah Topa hong paikikna amaute in maitang kituahin a mu uh hi.

⁹ A kisia Jerusalem munte aw, la sa-in kiko khawm un. Bang hang hiam cih leh Topa in ama mite hehnemta a, Jerusalem honkhia khinta hi.

¹⁰ Topa in minam khempeuh mai-ah a vangliatna siangtho zangin ama mite honkhia hi. Leitung mi khempeuh in i Pasian’ hotkhiatna mu ding uh hi.

¹¹ Kihem un, kihem un. Babylon panin paikhia unla, a nin nate lawng kei un. Topa’ beellekuang a puate aw, khuasung panin paikhia unla, nomau kisiansuah tawm un.

¹² Note’ mai-ah Topa pai ding a, Israel Pasian pen note’ nungah hong cing pa hi ding ahih manin note galtai-in paikhia loin, a kinawhsa-in na paikhia kei ding uh hi.

Topa’ Nasempa’ Thuakna

¹³ Topa in, “En un; ka nasempa a dau pai-in, amah a lianin kikoihin kilaamto ding a, sang mahmah ding hi.

¹⁴ Mi tampite in amah lamdang sa uh hi. Mihing a bang nawn lo zah dongin nakpitakin a mai sia a, mihing a sun nawn lo zah dongin a mel a sia hi.

¹⁵ Tua ahih ciangin amah in minam tampite dipkuasak ding a, ama hangin kumpite in a kam uh cih ding uh hi. Bang hang hiam cih leh amaute tungah a kigen ngei lo nate mu ding uh a, amaute in a zak ngei loh uh nate theitel ding uh hi,” a ci hi.