Isaiah 51 - Tedim Bible

Zion Hehnepna Thute

¹ Topa in, “Hotkhiat ding a ut, Topa a zongte aw, ngai un. Note hong ki-eu khiatna suangpi, note hong kitawhkhiatna khuk en un.

² Na pa uh Abraham le note’ pianna Sarah ngaihsun dih un. Bang hang hiam cih leh khat bek ahih laitakin amah ka samkhia a, amah thupha pia-in tampi ka phasak hi.

³ “Tu-in Zion ka hehnem ding hi. A kisia ama munte khempeuh puahpha-in, ama gamlakte Eden huansung ka bangsak ding a, ama sehnel gamte Topa’ huan ka bangsak ding hi. Ama sungah lungdamna le kipahna, lungdamkohna le lasakna awging om ding hi.

⁴ “Ka mite aw, ka thugen hong ngai un. Minamte tungah thu ka hilh a, keima thukham in amaute tungah khuavak tun ding hi.

⁵ Manlangin hong pai-in amaute ka honkhia ding hi. Ka gualzawh ding hun hong naita hi. Keimah in minamte ka uk ding hi. Tuipi gei-a gamte in kei hong muang uh a, amaute in keima hotkhiat ding hong ngak uh hi.

⁶ Dakto-in vantungte en unla, leitung zong ensuk un. Bang hang hiam cih leh meikhu bangin vantungte mangthang hi. Puan bangin leitung paatkhia ding a, ama tunga tengte pen thokang bangin si ding uh hi. Ahih hangin keima hotkhiatna kip tawntung ding a, keima khahkhiatna bei ngei lo ding hi.

⁷ “Thuman a thei, na lungsim sung uhah keima thu a vom mite aw, ka thu ngai un. Mihingte’ kosiatna kihta kei unla, amaute’ hong simmawhna hangin lungkia kei un.

⁸ Bang hang hiam cih leh nget in puan a nektum bangin amaute beimang ding a, lungno in samul puan a pehtum bangin amaute maimang ding uh hi. Ahih hangin keima khahkhiatna om tawntung ding a, khang tawntungin ka hotkhiatna kip ding hi,” a ci hi.

⁹ Khanglo in, khanglo in; thakhauh in, Topa aw. Khang sawtpi, hun lui lai-a bangin na vangliatna zangin hong huh in. Rahab a satzan gawp pa, gulpi a sunpa, nangmah hi lo na hi hiam?

¹⁰ Tuipi, tuithukpite a keusak, a kihonkhia mite’ kantan dingin tuithukpite lampi-in a bawlpa nangmah hi lo na hi hiam?

¹¹ Topa’ mi a kithehthangte hong ciahkik ding a, lasakna tawh Zion-ah hong pai ding uh hi. A tawntungin amaute lungdam ding uh a, amaute in lungdamna le kipakna ngahin, dahna le khuisatna nei nawn lo ding uh hi.

¹² Topa in, “Kei, keimah pen note hong hehnem pa ka hi hi. Lopa sangin sauvei a nungta zaw tuan lo, mihing lellelte, bang hangin kihta na hi uh hiam?

¹³ Vantungte zalin, lei bulpite a koih, note a hong bawl Topa hong mangngilh khinta na hi uh hiam? Note susia dingin a kithawi, no a hong nengniamte’ hehna, bang hangin kihta-in lau tawntung na hi uh hiam? Amaute’ hehna in note hong susiazo het lo ding hi.

¹⁴ Thong sunga kikhum mite kikhah baih ding hi. Amaute sauveipi nungta ding uh a, annek tuidawn kitasam lo ding uh hi.

¹⁵ “Bang hang hiam cih leh kei pen tuipi tokgawpin tuihualte a hawksak Topa, note’ Pasian ka hi hi. Keima min pen Vanglian Topa ahi hi.

¹⁶ Vantungte zalin lei bulpi ka phut a, Zion kiangah, ‘Nang pen keima mi na hi hi. Nang tungah thu kong hilh khin a, ka khut tawh nang ka hong hu hi,’ ka ci hi,” a ci hi.

¹⁷ Topa’ khutsung panin ama gimpiakna hai a dawn khin, hoina haipi a tawdat dongin a dawn khin Jerusalem aw, nangmah kisosuah tawm in. Nangmah kihanthawn tawm inla, dingtangto in.

¹⁸ Na mite khempeuh sung panin nang a hong makaih ding kuamah om lo a, na khoisa tapate khempeuh lak panin na khut a hong len ding kuamah om lo hi.

¹⁹ Nang tungah siatna le maimanna, kialpi le namsau, hih thu nih hong tungzo hi. Kua in nang hong dahpih ding ahi hiam? Kua in nang hong hehnem ding ahi hiam?

²⁰ Na mite gim khin a, ngenthang sungah a awk sanang bangin lam kiu khempeuhah amaute lum uh hi. Topa’ hehna, na Pasian’ taina amaute in a thuak uh hi.

²¹ Tua ahih ciangin gimna a thuak, zu ne lopi-in zukham a bang note in hih thu za un.

²² Ama mite a dingin a thumsak Topa, Topa ahi note’ Pasian in hih bangin ci hi: “En un, note’ khutsung panin hoina hai ka lakhia khin a, ka hehna haipi na dawn nawn kei ding uh hi.

²³ Note kiangah, ‘Na tung uhah kong pai theih nadingun kunsuk un,’ a hong ci, no a hong bawlsiate’ khut sungah tua haipi ka koih ding hi. Note in na nungzang uh leilak bangin bawlin, amaute’ pai nadingin kongzing lampi bangin na bawl khin uh hi,” a ci hi.