Isaiah 50 - Tedim Bible

¹ Topa in, “Amah ka ciahsakna, na nu a kimakna lai koi-ah om ahi hiam? Tua ahih kei leh nang kong zuakna ka leibatnate koi pan ahi hiam? Nomau mawhna hangin note hong kizuak a, nomau khialhna hangin na nu uh kipaikhiasak hi.

² “Kong pai ciangin bang hangin mi khat zong om lo ahi hiam? Kong sap ciangin bang hangin hong dawng ding khat zong om lo ahi hiam? Hong hon zo lo zah dingin ka khut hat lo lua ahi hiam? Tua ahih kei leh zong note khahkhiatna ding vangliatna nei lo ka hi hiam? Keima taina tawh tuipi ka keusak a, gunte pen sehnel gam ka suaksak hi. Tui om loh manin a ngasate dangtakin si-in a uih gawp hi.

³ Vantungte khuamial ka silhsak a, amau’ kituam nadingin puanhampi ka bawl hi,” a ci hi.

Pasian’ Nasempa’ Thumanna

⁴ A lunggim mite ka thahatsak theih nadingin Topa Pasian in ka gen ding thu hong hilh khin hi. Ama hong hilhnate a ngai dingin zingsang simin lawpna hong guan hi.

⁵ Topa Pasian in thu theihtelna hong guan hi. Amah ka lehdo kei a, zong ka nungngat kei hi.

⁶ Hong satte, ka nung ka dawh a, ka khamul-in a hong kai mite, ka paang ka dawh hi. Maizumna le cilphihna panin ka maitang ka hei kei hi.

⁷ Topa Pasian in kei hong huh hi. Tua ahih ciangin cih nading thei loin ka om kei hi. Tua ahih manin ka thuak tentan a, hong maizumsak lo ding hi, ci-in ka thei hi.

⁸ Ka thumanna a langsak Pasian a nai-ah hong om hi. Keima langkhatah kua hong pangzo ding ahi hiam? Thukhen zumah kikhia nu’ng. Thukhen zumah kua in hong khia nuam ahi hiam? Kei hong langpang dingin hong kuan tahen.

⁹ Topa Pasian in kei hong huh hi. Kua in kei mawh hi, ci-in gen thei ding ahi hiam? Amaute khempeuh puan bangin paatkhia ding uh a, nget in amaute netum ding hi.

¹⁰ Topa kihta a, a nasempa’ thu a mangte khempeuh khuamial sungah na pai hangun Topa muang unla, Pasian suanin nei un.

¹¹ Midang suksiat ding a sawm mite aw, note’ vaihawm siatna mah in note hong susia ding hi. Topa’ khut tung panin gimna thuakin na lumsuk ding uh hi.