Isaiah 3 - Tedim Bible

Judah le Jerusalem tungah Topa’ Thukhenna

¹ Topa, Vanglian Topa in Jerusalem khua le Judah gam panin nuntakna le luhinna, nuntakna an khempeuh le nuntakna tui khempeuh;

² mi vanglian pa le galkap pa, thukhen pa le kamsang pa, aisan pa le upa pa,

³ mi sawmnga a ukpa le zalian a nei pa, thu lamlak pa le mitphial siampa, le bum siamte a lakhia hi.

⁴ Amaute’ ulian dingin naupangte ka bawl ding a, naungekte in amaute uk ding uh hi.

⁵ Mite khatlekhat, mi khempeuh in a lawmte ciat, mi khempeuh in a vengte ciat, hihgawp ding uh hi. Khangnote pen uhamte tungah, mi ginalote pen miliante tungah kiphasak ding uh hi.

⁶ Mi khat in ama pa inn sungah a sanggampa lenin, “Nang in puan na nei hi; nang, kote’ makai pa nong hi ding a, hih a sialomtangte pen nangma khutsung hi ding hi,” a cih ciangin amah in,

⁷ “Bangmah hihzo kei ning. Ka inn sungah an le puan om lo hi. Mite a makai-in nong bawl kei ding hi,” ci-in a genkhia ding hi.

⁸ Bang hang hiam cih leh amaute khempeuh le amau’ gamtatnate in Topa langpangin amah dem uh ahih manin Jerusalem khua kipukin Judah gam kia hi.

⁹ Amau’ maiput in amau’ langah teci pang hi. Sodom bangin amaute a langtangin gamta uh a, amaute in im lo uh hi. Amaute in gimna ngah ta hen! Bang hang hiam cih leh amaute in amau’ tung mahah siatna kitun uh hi.

¹⁰ Amaute tungah thu hoih ding hi, ci-in thuman mite kiangah hih thu gen un. Bang hang hiam cih leh amaute in amau’ gamtat hoih thaman ngah ding uh hi.

¹¹ Migilo in gimna ngah ta hen! Midang tungah a gitloh gamtatna tawh kizui-in ama tungah kithukkik ding ahih manin ama tungah thu sia ding hi.

¹² Keima mite ahihleh naupangte in bawlsia uh a, numeite in zong uk uh hi. Ka mite aw, na makaite un note lam hong lakkhial a, note’ lampi zuih pen hong siasak hi.

¹³ Topa in thupang dingin ama panmun hong la a, ama mite’ thu a khen dingin a ding hi.

¹⁴ Topa pen upate le ama mite’ uliante tawh thukhen dingin kipan a, “Leenggui lo a netumte, note na hi uh a, mizawngte’ na a kisutte note’ inn sungah om hi.

¹⁵ Ka mite sucipin mizawngte na gawina uh bang na cihnopna uh a hiam?” Vanglian Topa Pasian in ci hi.

Jerusalem Numeite tungah Thukhenna

¹⁶ Topa in hih bangin ci hi: Jerusalem numeite kiphasakin ngawng doksa-in lam pai uh a, kiphatsakna tawh a mit uh hei pampamin hi tuihtuihin lam pai uh a, a khe uh gingsak sualsual ahih ciangun

¹⁷ Topa in Jerusalem numeite’ lutang meima sakin Topa in amau’ lutang kolhsak ding hi.

¹⁸ Tua ciangin Topa in khebuh hoihte, lutuam le khade lim tawh a kibang kizepnate;

¹⁹ bilbah tualte, taaute, le mai sitnate;

²⁰ lukhute, banbulhte, kawngtente, paknamtui bungte, le a kivom aite;

²¹ min gelhna zungbuhte le nakbuhte;

²² pawipuante, puanza neute, puanpite le khutkhai ipte;

²³ puanza neu vang siseihte, saihadial puansungsilhte, dialkhipte, le kikhuhna puante lakhia ding hi.

²⁴ Paknamtui tangin uihna, kawnggak tangin khauhualpi, limtak a kizem sam tangin lu kolhna, puan hoih tangin puanhampi, melhoihna tangin maizumna hun hong tung ding hi.

²⁵ Na mite, namsau tawh si ding uh a, a vanglian na mite, gal sungah kisia ding uh hi.

²⁶ Khuapi kongpi tau-in thum ding hi. Khuapi, gamkhing suak ding a, a guaktanga om nupi leilakah a tucip tawh kibang ding hi.