Isaiah 27 - Tedim Bible

Israel Mite Khahkhiatna le Kaihkhopna

¹ Tua ni ciangin Topa in a sak mahmah, a lian mahmah, a to mahmah namsau tawh, a taikhia gulpi ahi awle, a kikualvial gulpi ahi awle gim pia ding a, amah in tuipi sunga om tua gulpi a that ding hi.

² Tua ni ciangin, “A deihhuai leenggah lo thu la-in sa un!

³ Keimah,Topa, tua lo a hong pa ka hi a, a hunhunin tui ka buak hi. Khatpeuh in a suksiat loh nadingin sun le zanin ka hong ding hi.

⁴ Leenggui lo tungah ka heh nawn kei hi. Ling le lingkungte hong om leh keimah kuankhia-in tuate ka haltum ding hi.

⁵ Tua ahih kei leh keima hutna sungah amaute hong om hen la, amaute in kei tawh kilemna hong bawlin keimah tawh amaute hong kilem ta uh hen,” Topa in ci ding hi.

⁶ Hong tung ding hunah Jakob in zung kha ding a, Israel palhin dawnkhia ding a, leitung khempeuh a gah tawh kidimsak ding hi.

⁷ Pasian in Israel-te’ galte a vatgawp bangin Israel-te vatgawp ahi hiam? Tua ahih kei leh amau a thatte a kithah bangin Israel-te kithat ahi hiam?

⁸ A kithukkim dingin amaute sal suahsakna tawh gim a pia hi. Nisuahna huihpi in a mutkhiat bangin amaute a khinkhia hi.

⁹ Israel in suang tawh a kibawl biakna tau khempeuh suangkang satvui a batsak ciangin Asherah milimte le paknamtui taute a dinglai om nawn lo hi. Hih thu hangin Jakob’ mawhna kimaisakin a mawhna kilakkhiatsak hi.

¹⁰ Bang hang hiam cih leh a muanhuai khuapi pen gamlak bangin amah guakin omin, mi’ tenna mun pen kitaisanin kinusia hi. Tua lai-ah bawngno gamta-in lum a, singhiangte a kheuh hi.

¹¹ A hiangte a keu ciangin kitan hi. Nupite hong pai-in mei-in cih uh hi. Hih mite in khentel theihna nei lo ahih ciangin amaute a bawlpa in amaute hehpih lo ding a, amaute a piangsak pa in amaute tungah maipha lak lo ding hi.

¹² Israel mite aw, tua ni ciangin Eufratis gunpi panin Egypt luipi dongin Topa in thu hong khen ding a, note khat khatin hong kikaikhawm ding hi.

¹³ Tua ni ciangin peengkul lianpi khat kitum ding a, Assiria gam sunga a mangthang mite le Egypt gam sunga a kihawlkhia mite hong pai-in Jerusalem mual siangtho tungah Topa hong bia ding uh hi.