Isaiah 20 - Tedim Bible

Assiria in Egypt le Ethiopia Zo Ding

¹ Assiria kumpipa Sargon in a sawl galkapmang lianpen pa, Filistia khuapi Ashdod-ah pai-in, tua khua va sim hi.

² Tua hun ma kum thum laitakin Topa in Amoz’ tapa Isaiah tungtawnin thu genin, “Na puanhampi suah inla, na khe panin na khedapte suah in,” a ci hi. Amah zong tua mah bangin gamta-in, tangguak le kheguak tawh lam a pai hi.

³ Ashdod khua a kilak khit ciangin Topa in, “Egypt le Ethiopia langkhatah lim le siahil dingin ka nasempa Isaiah tangguak le kheguak tawh kum thum sung lam a pai mah bangin,

⁴ Assiria kumpipa in, Egypt gam mite’ maizumna ahi, a moi a hamin, tangguak kheguakin, tawbo dawksa-in, Egypt mite galin manin, Ethiopia mite salin manin paikhiatpih ding hi.

⁵ Tua ciangin amau’ lametna Ethiopia le amau’ kisialhpih Egypt’ hangin amaute lungkia-in a cih nading uh thei lo ding uh hi.

⁶ Tua ni ciangin hih tuipi gei-a teng mite in, ‘En un, eite’ lametna, Assiria kumpipa’ kiang panin eite hong honkhia dingin i belh mite’ tungah hih bang piang khinta hi. Eite bangci suahtak ding ihi hiam?’ ci ding uh hi,” a ci hi.