Isaiah 15 - Tedim Bible

Moab tawh kisai Thu

¹ Moab gam tawh kisai thu: Zan khat thu-in Ar khua kisiasak ahih manin Moab gam a bei hi. Zan khat thu-in Kir khua kisiasak ahih manin Moab gam a beita ahi hi.

² A sangna munte-ah a kap dingin Dibon khuamite paito uh hi. Nebo le Medeba khuate’ hangin Moab mite nakpitakin kap uh hi. Dahna limin lu khempeuh kimettol a, khamul khempeuh zong kimetmai hi.

³ Kongzing lakah amaute in puanhampi silh uh hi. Innkhumzang le kongzing lampi kituahnate-ah mi khempeuh nakpi-in kapin khitui tawh a kawt uh hi.

⁴ Heshbon khua le Elealeh khua kiko uh a, amau’ kahna awging Jahaz khua dongah kiza hi. Tua ahih ciangin Moab mi galhiam tawite lau-in nakpitakin kiko uh a, amaute a ling uh hi.

⁵ Moab gam adingin ka lungsim kiko hi. A galtai ama mite Zoar khua le Eglathshelishiah khuate-ah a tai uh hi. Bang hang hiam cih leh Luhith lampi-ah amaute a kapsa-in paito uh hi. Horonaim khua zuatna lampi-ah amaute in siatna a thuakna uh hangin nakpi-in kiko uh hi.

⁶ Nimrim luite kang hi. Lopa keu-in a selthak om lo a, lopa hing om nawn lo hi.

⁷ Tua ahih ciangin amaute in a ngahsa uh le a kholsa uh na tampite pua-in Gialhek Lui-ah a paipih uh hi.

⁸ Bang hang hiam cih leh Moab gam kiim khempeuhah kahna aw a ging hi. Kahna in Eglaim khua ban a, kahna in Beerelim khua zong a ban hi.

⁹ Bang hang hiam cih leh Dibon luituite sisan tawh kidim hi. Ahi zongin Dibon khua in a thuak ding a nasiazaw omlai a, Moab gam panin a suakta mi le gam sungah a omlai mite khempeuh kithat gawp ding hi.