Hosea 8 - Tedim Bible

Milim Biak Manin Israel-te Kitai

¹ Pataukohna peengkul tum in. Galte in muvanlai bangin ka gam a leenlak dingin hong kithawi uh hi. Bang hang hiam cih leh ka mite in ka thuciamna uh pelhin, ka thuhilhnate hong nial uh hi.

² Amaute in kei pen amau’ Pasian, hong ci-in, nangma mite hi ung, hong ci napi-in,

³ amaute in a hoih nate paaikhia uh ahih manin a galte un delh ding uh hi.

⁴ Amaute in kei hong dong loin kumpi ding vaihawm uh a, kei’ theihpih lohin ulian koih uh hi. A ngun a khamte uh tawh amau’ siatna ding milim a bawl uh hi.

⁵ Samaria khuapi mite in a biak kham bawngno ka deih kei hi. Tua a bia mite tungah ka heh hi. Amaute in mihoih a suahna ding uh bang tanvei ngak lai ding ahi uh hiam?

⁶ Israel sunga om mi khat in tua milim bawl a, tua milim pen Pasian hi lo hi. Samaria mite in a biak milim kisuzan ding hi.

⁷ Paunak-ah, Huih a tuhte in huih ngahkik ding a, a vui om lo an kung in annek ding piangsak lo hi, kici hi. A vui om lo an kung panin an kingah mah taleh zong gamdang mite in netum ding hi.

⁸ Israel khempeuh kinawmvalhin kisusia ding a, tu nangawnin minam dangte in bangmahin ngaihsun nawn lo uh hi.

⁹ A hon lak panin a taikhia, a thumang lo gam la bangin Assiria mite tung panin huhna a ngen dingin va tai uh hi. A huh ding uh a deihna-in midangte tungah amau pumpi a va zuak uh hi.

¹⁰ Tua bangin minam dangte a cial hangun keimah in amaute kaikhawmin gim ka pia veve ding hi. Assiria kumpipa’ bawlsiatna tawh a sawt loin gimna a ngah ding uh hi.

¹¹ Israel mite in mawhmaisakna ding mun biakna tau tam bawl semsem leh mawhna ding mun tam a behlap semsem a suak zawsop uh hi.

¹² Amaute hilhna ding simzawh loh thukham tampi gelh taleng zong, amaute in don loin thu lamdangpi khatin ngaihsun lel uh hi.

¹³ Amaute in gan tawh biak ding utin, a biakna sate ne nuam uh hi. Ahi zongin Topa ahi keimah ka hih leh amaute tungah ka lungkim kei a, amaute’ mawhnate phawkin tua mawhnate hangin amaute gim ka pia ding hi. Egypt-ah amaute ka sawlkik ding hi.

¹⁴ Bang hang hiam cih leh Israel mite in amau a Piangsak pa mangngilh uh a, inn lianpipite a lam uh hi. Judah mite in zong kulhnei khuapi tampi a lamthuah uh hi. Keimah in tua khuapite mei tawh halin a inn lianpite uh ka kangtumsak ding hi, ci hi.