Hosea 2 - Tedim Bible

Topa in A Citak lo A Mite A Itna

¹ Tua ahih ciangin na Israel mipihte, “Pasian’ mi,” ci inla, “Topa in a hehpih mite,” zong ci in.

² Tate aw, na nu uh zolbawl un. Amah ka zi hi nawn lo a, kei zong ama pasal ka hih nawn loh hangin a paktatna le midang tawh a mawhnate a khawl nadingin zol un.

³ A gamtat hoih lohna a khawl kei leh, a nu sung pan a suah laitakin a guaktangin a ommah bangin, a puanteng hawkkhiatsakin a guaktangin ka omsak ding a, a keu, bangmah a po zawh lohna gamlak bangin ka bawl ding a, dangtakin a si ding hi.

⁴ Ama tate, paktatna panin a piang tate ahih manin, tua a tate zong ka hehpih kei ding hi.

⁵ A nu uh a paktat hi a, tua ahih manin amaute a paii numei, zumna mel thei loin a gamta ahi hi. Amah in, “Ka it pasal dangte kiangah ka pai ding hi. Amaute in anletui, samul puan le saihadial puan, oliv thau le zu hong pia uh hi,” a cizaw lai hi.

⁶ Tua ahih ciangin amah a paikhiat zawh loh nadingin ling ka kaihnelh ding a, a kimkotah kulh ka ciang ding hi.

⁷ Amah in a pasal dangte delh ding a, ahi zongin amaute kiang tung zo lo ding hi. Amah in amaute zong niloh ding a, ahi zongin mu zo lo ding hi. Tua ciangin amah in, “Ka pasal masa kiangah ciahkik ning; tu-a bangin ka om sangin ama kiang nuamzaw ding hi,” a ci ding hi.

⁸ Ama tungah an, leenggahzu, le oliv thau ka piakna, le Baal pasian biak nadingin a zat ngun le kham tampi tak a piapa ka hihlam hong phawkkha lo hi.

⁹ Tua ahih manin anlak hun ciangin ama tungah ka piak ngei an le leenggahzute ka pia nawn kei ding a, a silh dingin ka piak samul puan le saihadial puante ka pia nawn kei ding hi.

¹⁰ Tua ciangin ama it pasal dangte’ muhna-ah a puante hawkkhiatsakin a guaktangin ka omsak ding a, kuamah in kei’ khutsung panin honkhia zo lo ding hi.

¹¹ Ama lungdam theihna, a kumsim pawite, a khasim pawite, a nipisim pawite, a biakna kikhop khempeuh ka beisak ding hi.

¹² Ka pasal it dangte in thamanin hong piak hi, ci-in a gen a leengguite le a theikungte ka susia ding a, gamsate in tuate suksiatsakin gamlakpi a suak ding hi.

¹³ Kei hong mangngilh tanvei sung, Baal pasian tungah paknamtui a hal tanvei sung, le a pasal it dangte tawh a kikhawl dingin a manpha kizepna a tuamtuamte tawh a kizep hun tanvei sungzah mah gim ka pia ding hi.

¹⁴ Tua ahih ciangin sehnel gamah amah ka paipihkik ding a, itna kam tawh hopihin ka zolkik ding hi.

¹⁵ Tua lai panin a leenggui lote ka piakik ding a, Lungkhamna Kuam a cihnopna Akhor Kuam pen lametna kongpi ka suaksak ding hi. Egypt panin a paikhiat, a nungakno hun lai mah bangin ka thugennate hong ngai ding hi.

¹⁶ Tua ciangin kei pen, ka pasal, hong ci kik ding a, kei pen, ka Baal pasian, hong ci nawn lo ding hi.

¹⁷ Ama kam panin Baal pasian min ka pulaksak nawn kei ding a, a min kilokha nawn lo ding hi.

¹⁸ Tua ciangin, ka mite a suksiat loh nadingun gamlak a om gamsate, huih lak a leeng vasate le leitungah a bokvak ganhingte tawh thuciamna ka bawl ding a, thalte, namsaute, galhiam khempeuh, leitung panin ka phiatkhia ding hi. A lungmuang hithiatin ka mite ka omsak ding hi.

¹⁹ Israel aw, nang, zi-in kong neikik ding a, nang tungah thuman thutangin kong gamta kik ding hi. Nang hong itin kong hehpih tawntung ding a, keima-a’ na hi tawntung ding hi.

²⁰ Kei-a’ ahi tawntung dingin nang kong la ding hi. Tua ciangin Topa ka hih lamtak nong thei ding hi.

²¹ Tua ni ciangin keima mi Jezreel-te’ thungetna ka pia ding a, leitungah guah ka zusak ding hi.

²² Leitung in an, leenggahzu le sathaute piangsak ding hi.

²³ Leitungah ka mite kipsakin a cithei-in ka bawl ding a, hehpih loh, a kici mite ka hehpih ding a, ka mi hi lo, a kici mite, ka mi na hi uh hi, ka ci ding a, amaute in, “Nang pen kote’ Pasian na hi hi,” hong ci ding uh hi, Topa in a ci hi.