Hosea 13 - Tedim Bible

Israel-te’ Siat ding Kigenkhol

¹ Efraim-te beh in thu a gen ciangin a dangte lau uh a, Israel minam beh dangte in Efraim-te beh tung et uh hi. Ahi zongin Baal milim biakna hangin amaute khial uh hi; tua thu hangin si ding uh hi.

² Tua hinapi-in amaute khialthuah semsem uh a, a biak ding uh milim a bawl uh hi. Amau’ ngunte milimin bawl uh a, a hoihtakin khutsiamte a bawlsak uh hi. Tua ciangin, “Hihte tungah biakna pia un,” a ci uh hi. Mihing in milim bia-in nam tazen uh hi.

³ Tua ciangin amaute pen zingsang a kaai meiilum, a maimangpak daitui, ancilna panin huih in a letkhiat ansi, meikhu suahna-a a pai meikhu bangin a maimang ding uh hi.

⁴ Kei pen Egypt gam panin note a hong paikhiatpih note’ Topa Pasian ka hi hi. Tua hun lai-in kei simloh Pasian dang na thei kei uh a, note a hong honkhia pa kei bek ka hi hi.

⁵ Sehnel gam keuna sungah note a hong kem pa keimah ka hi hi.

⁶ Ahi zongin gam hoihna mun tungin na gil uh a vah ciangin na lungsim uh kiphasakin kei nong mangngilh uh hi.

⁷ Tua ahih manin humpinelkai bangin note hong sugawpin, kamkei bangin na pai nading uh lampi-ah kong pang hi.

⁸ A no a kilaksak vompi bangin note hong sugawpin kong balgawp ding hi. Humpinelkai bangin hong phualnek pahin, gamsate bangin kong balthanggawp ding hi.

⁹ No Israel-te kong sugawp ding hi. Kua in note hong huhzo ding ahi hiam?

¹⁰ Na kumpi ding uh le na makai dingte uh nong ngen uh hi. Tu-in note hong hon dingin na hong nget uh na kumpipa uh koi-ah om a, note hong hu ding na makaite uh koi lai tung khin ahi hiam?

¹¹ Na kumpi dingte uh kong ngawhpiak a, ka hehluatna hangin amaute ka lakhiakik khin hi.

¹² Israel mite’ mawhna le a khialhnateng uh limtakin kiciamteh a, tua ciamtehnate limtakin kikem hi.

¹³ Israel mite, naungek bangin a suahkhiat hun tung napi-in, a hailuat manun suakkhia loin a nu uh sung mahah omom lai uh hi.

¹⁴ Leinuai-a misite’ omna-ah a pai nading uh panin honin, sih nading panin suaktasak ding ka hi hiam? Sihna aw, gimna na piakna-ah amaute ka hehpih kei hi. Leinuai-a misite’ gam aw, na suksiatna-ah amaute ka khasiat kei hi.

¹⁵ Israel mite kiak bangin a pung ahi zongin sehnel gam panin nisuahna huih sa mahmah ka nungsak ding a, a tuikhukte uh le a tuinakte uh a kangsak ding hi. Tua huih in a manpha nate le deih theih peuhpeuh leenmang ding hi.

¹⁶ Israel-te in a Pasian uh lehdo uh ahih manin a mawhna uh thuak ding uh hi. Gal sungah amaute si ding uh a, a naungekte uh lei kidenna ding a, a nupi naupaiite uh kikuikham ding hi, a ci hi.