Hosea 1 - Tedim Bible

Hosea’ Zi le A Tate

¹ Judah kumpite Uzziah, Jotham, Ahaz, Hezekiah, le Israel kumpi Joash’ tapa Jeroboam’ hun lai-in Beeri’ tapa Hosea tungah Topa in thu na gen hi.

² Topa in Hosea tungtawnin Israel-te tungah thu a na gen cil lai-in, amah in Hosea kiangah, “Hih gammite kei tungah citak loin pasian dangte bia uh ahih manin, nang zong hong tulpih lo ding numei paktat khat tenpih inla, tua nu tawh ta nei in,” a ci hi.

³ Tua ahih ciangin Hosea in zong Diblaim’ tanu Gomer tenpih a, tua nu hong gai-in tapa khat hong nei hi.

⁴ Tua ciangin Topa in Hosea kiangah, “Na tapa’ min dingin Jezreel phuak in; bang hang hiam cih leh ama pute Jehu in Jezreel khua-ah a mi thahna hangin Israel kumpipa tungah gim ka pia baih ding a, Israel mite tungah Jehu’ suanlekhakte’ ukna ka beisak ding hi.

⁵ Tua ciangin Jezreel kuam-ah Israel mite’ galhiam khempeuh ka sumai ding hi,” a ci hi.

⁶ Tua ciangin Gomer gaikikin tanu khat nei hi. Topa in zong Hosea kiangah, “Na tanu’ min dingin hehpih loh, a cihnopna Loruhamah phuak in; bang hang hiam cih leh Israel mite ka hehpih nawn kei ding a, a mawhna uh ka maisak het kei ding hi.

⁷ Ahi zongin Judah mite ka hehpih ding a, namsau le thal, sakol le sakol tung tuangte, le galsimna tawh hi loin, amaute’ Topa Pasian ahi kei mahmah in amaute ka honkhia ding hi,” a ci hi.

⁸ Loruhamah a tei khit ciangin Gomer gai-in tapa khat nei leuleu hi.

⁹ Tua ciangin Topa in, “Na tapa’ min dingin ka mi hi lo a cihnopna Loammi phuak in; bang hang hiam cih leh no Israel mite, ka mi na hi nawn kei uh a, kei zong note’ Pasian ka hi kei hi,” a ci hi.

¹⁰ Ahi zongin, tehzawh loh, simzawh loh zah dongin tuipi sehnel bangin Israel mite tampi pha ding uh a, tua hunin, “Note ka mi hi lo,” a kicih hangin ni khat ni ciangin, “A nungta Pasian’ tate,” kici ding hi.

¹¹ Judah mite le Israel mite kigawmkik ding uh a, amaute a makai dingin mi khat a seh ding uh hi. Amaute khangin citheikik ding uh a, tua Jezreel hun pen a nuam mahmah hun hi ding hi.