Hebru 5 - Tedim Bible

¹ Siampi lianpen ahi peuhpeuh mipa pen a mite’ mawhna hangin Pasian’ tungah biakna le letsong a piaksak dingin ama mipihte lak panin kiteelin nasep a kiguan’ ahi hi.

² Amah zong lam tampi-ah a ginalo thei mi mah ahih manin thu thei lo mite le a khial mite tungah lungnem takin na sem thei hi.

³ Amah zong miginalo mi mah ahih manin mite’ mawhna hangin biakna a pia hi bek loin ama mawhna mahmah hangin zong biakna a pia ahi hi.

⁴ Tua bangin pahtawina a nei siampi lianpen nasep pen a sem dingte amau utthu tawh a kisehtawm mawk hi lo hi; siampi lianpen a sem dingin amahmah a kisehtawm hi lo a, Aaron a kisap mah bangin Pasian in amah a seh ahi hi.

⁵ Tua mah bangin Khrih zong, amahmah in siampi lianpen nasep a semtawm mawk hi loin Pasian in ama kiangah, “Nang, ka Tapa na hi hi. Tuni-in na Pa ka suak hi,” na ci hi.

⁶ Mun dang khatah zong, “Melkhizedek siampi gui zui-in a tawntungin siampi na hi ding hi,” na ci lai hi.

⁷ Leitungah mihingin Jesuh a omlai-in sihna panin amah a honkhia thei ding Pasian tungah thu ngenin khitui naptui tawh thumin na kiko hi.

⁸ Amah, Pasian’ Tapa hinapi-in a thuakna tawh thumang ahih theih nading a na kisin hi.

⁹ Tua bangin a cingtaak mi a suahkhit ciangin ama thu a mang mite khempeuh a dingin tawntung hotkhiatna a kipatna hong suak a,

¹⁰ Melkhizedek gui zui-in siampi lianpen dingin Pasian in a bawl hi.

Tawpkik loh ding Hilhkholhna

¹¹ Hih thu tawh kisai-in i gen ding tampi a om hangin note in thu thei hak mahmah na hih manun i gentel theih nading haksa hi.

¹² Tu-in note pen midang a hilh dingin sia na suahtheih ding uh hun hikhin napi-in note mahmah pen Pasian’ thu a bulpite hilh ding na kisam lai uh hi. Antak nethei nai loin nawi bek a nethei lai na hi uh hi.

¹³ Nawi bek a ne laite pen naungek ahih manin a man le a man lo thu bangmah phawkthei nai lo uh hi.

¹⁴ Ahi zongin antak i cih pen a sia le a pha a khenthei, a lim le a lim lo a khentheita, a khangham khinsa mite a’ ding ahi hi.