Hebru 2 - Tedim Bible

A Thupi Mahmah Hotkhiatna

¹ Tua ahih manin i zaksa thuman thutakte i khahsuahkhak loh nadingin kiptak khotakin i letkip ding kisam hi.

² Vantung mite in hong gen thute thuman hi a, tua thu a palsatte in a kilawm bangin gim thuak ding uh hi.

³ Tua ahih manin a thupi mahmah hih hotkhiatna thudon loin i om leh suahtakna om thei ngei lo ding hi. A masa-in Topa mahmah in hotkhiatna thu hong pulak a, tua thu a za mite in thuman ahihna thu eite tungah hong gen leuleu uh hi.

⁴ Amaute’ thugenna banah Pasian in vangliatna lim, le nalamdang a tuamtuamte bawlna tawh hong genbeh lai hi. Tua banah ama hoihsak bangin Pasian in Kha Siangtho zong hong hawm lai hi.

Hotkhiatna Thuah A Makai pa

⁵ Eite in genbelin i neih a hong tung ding leitung pen Pasian in vantung mite’ khut sungah koih lo hi.

⁶ Lai Siangtho mun khatah a kigenna-ah, “Pasian aw, nangma ngaihsut tham dingin mi pen bang hi a, na phawk tham dingin mihing’ ta bang hi lel ahi hiam?

⁷ Ahi zongin vantung mite sangin a neuzaw deuhin na bawl a, minthanna le pahtawina na guan a,

⁸ na khempeuh na uk sak hi,” na ci hi. “Pasian in na khempeuh a uk dingin bawl,” a cih ciangin na khempeuh a huamkhin hita hi. Mihing in na khempeuh a uklam i thei nai kei hi.

⁹ Ahi zongin Pasian’ hehpihna hangin mi khempeuh a dingin Jesuh a sih theih nadingin tawlkhat sung vantung mite sangin a neuzaw-in a kibawlna i mu a, sihna a thuakna hangin minthanna le pahtawina a ngahna thu i thei hi.

¹⁰ Na khempeuh ama a dingin a piangsak Pasian in tate tampi minthanna a ngahsak theih nadingin a thuakna tawh hotkhiatna thu-ah a makai dingin Jesuh a bawl ding a kilawm mah ahi hi.

¹¹ Mawhna panin mite a siangthosakpa le sianthosakna a ngah mite in, Pa, a kibang a neikhawm uh hi. Tua hi a, Jesuh in mite, “Sanggam,” a cih ding zum ngaihsut lo ahih manin,

¹² “Pasian aw, ka sanggamte kiangah nangma thu ka gen ding a, mi khempeuh mai-ah nangmah ka hong phat ding hi,” na ci a,

¹³ tua ciangin, “Pasian muanin ka nei ding hi,” na ci kik a, tua ciangin, “Pasian in hong piak ta dangte tawh hih lai-ah ka om hi,” na ci leuleu hi.

¹⁴ Tate a cih mite pen leitung cilesa a nei mite ahih manin, ama sihna hangin sihna a uk Dawimangpa a sukgawp theih nadingin Jesuh in mihing pianzia mah hong nei phot hi.

¹⁵ Tua ahih manin sihna a kihtak manin sal bangin a om mite amah in hong suaktasak hi.

¹⁶ Ama lunghihmawh pen vantung mite hi lo a, Abraham’ suanlekhakte a lunghimawh ahihna thu hong kitel hi.

¹⁷ Tua ahih manin mihingte’ mawhna a kimaisak theih nadingin Pasian’ na a sepna-ah mite a dingin hehpihna le cihtakna tawh Siampi Lianpen a suahtheih nadingin a sanggamte tawh a kibangin mihing lim a hong puak ding a kisam ahi hi.

¹⁸ Ama pumpi mahmah in ze-etna le gimna thuak ahih manin tuhun ciangin tua bang a thuakte a hong huhthei hi.