Ezra 5 - Tedim Bible

Biakinn Kilamkik

¹ Tu-in kamsangte Haggai le Iddo’ suan Zekhariah in Judah gam le Jerusalem-ah a om Judah mite hanthawnin, Israel Pasian’ min tawh thu a gen uh hi.

² Tua ciangin Shealtiel’ tapa Zerubbabel le Jozadak’ tapa Jeshua, Jerusalem-a Pasian’ biakinn lamkik ding kipan pah uh a, Pasian’ kamsangte in amaute ompihin huh uh hi.

³ Tua laitakin Eufratis Gungal gam sung teng a uk sawn Tattenai, Shetharbozenai, le amau’ lawmte hong paipahin amaute kiangah, “Note in hih biakinn lamkikin a nate na bawlna ding uh kua in thu hong pia ahi hiam?” a ci uh hi.

⁴ Hih biakinn lam nasepna-ah a sem mite’ min zong amaute in dong uh hi.

⁵ Ahi zongin Pasian in Judah upate huh ahih manin Darias kiangah a thu va tungin ama tung pan thu a kingahkik hun dong a nasep zomna uh kikhaktan lo hi.

⁶ Eufratis Gungal gam a uk sawn Tattenai, Shetharbozenai, le Eufratis Gungal gam sung thu a vaan ama lawmte in Kumpi Darias tungah lai khak uh hi.

⁷ Amaute in thuzaksakna lai hih bangin a gelh uh hi: “Kumpi Darias tungah thupha namcin hong tung tahen.

⁸ “Judah gam, a lian Pasian’ biakinn-ah ka va paina uh kong theisak uh hi. Tua biakinn pen suang lianpipite tawh kilamin a kawmte sing tawh kibawl hi. Hih biakinn limtakin kisemin amau’ makaihna tawh a nasep uh telh mahmah hi.

⁹ “Hih biakinn a kilamkikna ding le a nate a zawh nadingin kua in thu pia hiam, cih thu hih upate tungah ka dong uh hi.

¹⁰ Nangmah in a makai teng na theih nadingin amaute’ min zong ka dong uh hi.

¹¹ “Amaute in hih bangin hong dawng uh hi: ‘Kote pen vantung le leitung Pasian’ nasemte ka hi uh a, kum tampi lai-in a kilamsa biakinn a lamkik ka hi uh a, a lian Israel kumpi khat in lamin a zawhsa ahi hi.

¹² Ahi zongin ka pu ka pate un vantung Pasian hehsakkha uh ahih manin Babylon kumpipa, Khaldea mi Nebukhadnezzar’ khut sungah amaute pia hi. Tua kumpipa in hih biakinn susia a, a mite Babylon-ah ciahpih hi.

¹³ Ahi zongin Babylon kumpipa Sairas’ uk a kum khatna kumin hih Pasian’ biakinn a kilamkikna ding amah in thu pia hi.

¹⁴ Tua tham loin Jerusalem-a biakinn sung panin Nebukhadnezzar in la-in Babylon biakinn sunga a koih ahi Pasian’ biakinn sunga om ngeisa kham le ngun kibawl umlebeelte zong kumpi Sairas in Babylon biakinn panin lakhia-in gam ukin a hong koih Sheshbazzar min nei pa tungah ap hi.

¹⁵ Kumpipa in ama tungah, “Hih umlebeelte paipih inla, Jerusalem-a biakinn-ah va koihkik in. Tua lai-a Pasian’ biakinn pen a mun ngei mahah lamkik sak in,” ci hi.

¹⁶ Tua ciangin Sheshbazzar hong pai-in Jerusalem-a Pasian’ biakinn a bulpi hong phut hi. Tua hun a kipanin tu dong lamkik kisem suak a, ahi zongin kizo nai lo hi,’ ci uh hi.

¹⁷ “Tua ahih ciangin hoih na sak leh, Jerusalem-a hih Pasian’ biakinn a kilamkikna ding thu kumpipa Sairas in thu pia takpi hiam, pia taktak lo hiam cih a kitheih nadingin Babylon khua sunga om laibu koihna innte sung zongsak in. Tua khit ciangin kumpipa in na deihna hong zasakkik in,” a ci uh hi.