Ezra 3 - Tedim Bible

Pasian Biakna a Ki-omsak Kikna

¹ A kha sagihna hong cin ciangin Israel mite amau’ khuapi ciatah teng khin uh ahih manin, khekhat khai bangin Jerusalem-ah hong kituah diam uh hi.

² Tua ciangin Jozadak’ tapa Jeshua le a siampipihte, le Shealtiel’ tapa Zerubbabel le a behte hong kipan uh a, Pasian’ mi Moses thukham sungah a kigelh bangin meihal biaknate piak nadingin Israel Pasian biakna tau a bawl uh hi.

³ Amaute in tua gam a midang tengte kihta uh ahih manin a mun lui mahah biakna tau phut pahin zing le nitak simin Topa’ tungah meihal biakna a pia uh hi.

⁴ Tua ciangin amaute in a kikipsaksa bangin buk pawi bawl uh a, nisimin zat dingin a kisehsa zah bangin meihal biakna nisimin a pia uh hi.

⁵ Tua ciangin hihte banah a tawntung a meihal biakna, Khadet sima biakna, le Topa’ pawi a kisehsa hun khempeuh le Topa’ tungah amau’ utthu tawh a pia mite khempeuh’ biaknate zong a pia uh hi.

⁶ Topa’ biakinnpi a bul a kiphuh nai loh hangin a kha sagihna a ni masa ni a kipanin amaute in Topa’ tungah meihal biaknate piak ding kipan uh hi.

⁷ Tua hi a, amaute in suangseekte le khutsiamte tungah sum pia uh a, Persia kumpi Sairas’ tung panin a thu ngahna bangun Lebanon mualtung gam panin tuipi gei Joppa khua-ah taamtak singte a hong puaksuk ding Sidon khuamite le Taia khuamite tungah zong annek tuidawn le sathau a pia uh hi.

Biakinn Lamkik Kipan

⁸ Amaute, Jerusalem khua-a Pasian’ biakinn-ah a hong ciahkik uh a kum nihna, tua kum a kha nihna sungin Shealtiel’ tapa Zerubbabel le Jozadak’ tapa Jeshua, nasep kipan uh a, a Israel mipihte, siampite, Levi mite, le salsuahna panin Jerusalem-ah a hong ciahkik mite khempeuh in zong a huh uh hi. Amaute in Levi mite kum sawmnih panin a tungsiah peuhmah Topa’ biakinn sungah biakna nasepte a vaan dingin a seh uh hi.

⁹ Jeshua a tapate le a behte tawh, le Hodaviah-te beh Kadmiel le a tate in Henadad’ tapate le Levi mi a tapate uh le a behte uh tawh Pasian’ biakinn-ah nasemte tungah ukna tavuan a lakhawm uh hi.

¹⁰ Innlamte in Topa’ biakinn a bul a phuh uh ciangin, Israel kumpipa David in a geelkholhsa bangin Topa a phat dingin siampite in a puan uh silhin peengkul tawh, Asaf’ tapa Levi mite daltuah tawh a panmun ding uhah hong pang uh hi.

¹¹ Tua ciangin amaute in Topa phatna le lungdamkohna a kidawngin sa uh a, “Topa hoih hi; bang hang hiam cih leh Israel-te hong itna kip tawntung hi,” a ci uh hi. Topa’ biakinn bulpi kiphut khin ahih manin mi khempeuh in nakpitakin Topa phat uh hi.

¹² Midang tampi lungdamin a aw neih zahun a kiko uh hangin a biakinn masa a mu ngeisa siampite, Levi mite, le innkuan lutang, midang tampite in hih biakinn bulpi a kiphuh a muh uh ciangin kapin a thum uh hi.

¹³ Mite nakpitakin kiko ahih manin lungdamna awging, le kahna le thumna awgingte mite in khen thei lo uh hi. Gamlapi pek panin tua awgingte a kiza hi.