Ezekiel 2 - Tedim Bible

Ezekiel A Kisapna

¹ Tua awging in, “Mihing ahi Ezekiel aw, dingto in. Nang tungah thu kong gen nuam hi,” hong ci hi.

² Tua bangin thu hong gen laitakin ka sungah Pasian’ kha hong lutin ka khe-in hong dingtosak hi. Tua ciangin a awging kizom lai-in kei kiangah,

³ “Mihing ahi Ezekiel aw, kei hong langpangin a hong lehdo Israel minamte kiangah nang a hong sawl ka hi hi. A pu a pate uh mah bangin amaute in tu dongin kei hong lehdo lai uh hi.

⁴ Amaute a lungsim uh khauhin paupeeng uh hi. Keimah Topa Pasian in amaute tungah ka gen ding thute a va gen dingin a hong sawl ka hi hi.

⁵ Amaute in nangma thu hong mang a, hong mang kei zongin, amaute lakah kamsang khat a omkhit lamtak thei ding uh hi.

⁶ “Ahi zongin mihing ahi Ezekiel aw, amaute ahi a, a thugente uh ahi zongin na kihta kei ding hi. Amaute in nang ling hong kaihnelh ding uh a, momai lak a om na bang ding hi. Tua bang hitaseleh, hih a lehdo thei mite’ maipuak zia le amaute’ kampaunate hangin lau tuan kei in.

⁷ Amaute in hong mang a, hong mang kei zongin, nang tungah kong gen khempeuh amaute tungah va gen in. Amaute pen a lehdo thei mi ahihna uh phawk in.

⁸ “Mihing ahi Ezekiel aw, nang tungah kong gen thute ngai in. Amaute bangin hong langpang kei in. Na kam ka inla, tu-in ka hong piak ding na ne in,” a hong ci hi.

⁹ Tua ciangin kei lamah khut khat hong kizan a, tua khut in laizial tawn khat a tawi ka mu hi.

¹⁰ Tua ciangin tua khut in tua lai kizial hong phel a, a lang nih tuakah lai kigelhin, dahlekah thu le thumletau thute vive a kigelh ka mu hi.