Esther 6 - Tedim Bible

Mordekai A Pahtawi Dingin Haman Ki-aana-sawl

¹ Tua zanin kumpipa ihmu thei lo a, nisim thupiang ciaptehna Khang Tangthu Laibu lasak a, ama zakin tua laibu kisim hi.

² Tua banga a kisim ciangin, kongcingte sung panin innsungmang Bigthana le Teresh in Kumpipa Ahasueras thah a sawmna thu pen Mordekai in a genna thu a kiciamtehna simkha uh hi.

³ Tua thu a zak ciangin kumpipa in, “Hih thu hangin Mordekai’ tungah pahtawina ahi a, minliatna ahi zongin bang kipia ahi hiam?” a ci hi. Tua lai-a a om kumpipa’ nasemte in Mordekai’ tungah bangmah a kipiak lohna thu a gen uh hi.

⁴ Tua ciangin kumpipa in, “Hih kiimnai-ah kua om ahi hiam?” a ci hi. Tua laitakin Mordekai thah nadingin a phuhsa khuam tungah Mordekai khailupna ding thu kumpipa kiangah a ngen dingin kumpi huang sungah Haman hong tum hi.

⁵ Tua ahih ciangin kumpipa’ nasemte in ama kiangah, “Hih lai-ah Haman om hi; inntualah ding hi,” a ci uh hi. Tua ciangin kumpipa in, “Amah hong tumsak un,” a ci hi.

⁶ Tua ahih ciangin Haman hong tum a, kumpipa in ama kiangah, “Kumpipa in a pahtawi nop mipa tungah bang kihih leh hoih na sa hiam?” a ci hi. Tua ciangin Haman in a lungsim sungah ngaihsun a, “Kumpipa in kei sangin a pahtawi nopzawk ding kua om zenzen ahi hiam?” ci-in ngaihsun hi.

⁷ Tua ahih manin Haman in kumpipa kiangah, “Kumpipa in a pahtawi nop mipa a dingin

⁸ kumpipa mahmah in a silh kumpi puante, le kumpipa a tuanna sakol a lukhu tawh la sak in.

⁹ Tua ciangin kumpipa’ ulianpen khat tungah tua kumpi puante le sakol apsak in. Kumpipa in a pahtawi nop mipa pen amah zemsak inla, tua ciangin khuasung kongzing lampi-ah sakol tungah a tuangsa-in na ulian pen pa kaisak inla, ama mai-ah kiko sakin, ‘Kumpipa in a pahtawi nop mipa tungah hih bangin kibawl ding hi,’ cisak in,” a ci hi.

¹⁰ Tua ciangin kumpipa in Haman kiangah, “Na cihsa bangin manlangin kumpi puante le sakol la pah inla, kongpi-a om Jew mi Mordekai tungah hih thute khempeuh hih in. Na gensa khat beek siit kei in,” a ci hi.

¹¹ Tua ahih ciangin Haman in kumpi puante le sakol la-in Mordekai zem a, khuapi sung kongzing lampi-ah amah tuangsakin, “Kumpipa in a pahtawi nop mipa tungah hih bangin kibawl ding hi,” ci-in a taangko hi.

¹² Tua ciangin kumpipa’ kongpi-ah Mordekai ciahkik hi. Haman ahih le kilukhuhsa-in a thum kawmin a inn-ah ciahpah vingveng hi.

¹³ Tua ciangin Haman in a zi Zeresh le a lawmte khempeuh tungah ama tunga thupiang teng a gen hi. Tua ciangin a zi Zeresh le a lawmte in ama kiangah, “Tu-a na lelhtak Mordekai pen Jew mi ahi hi; amah na zo kei ding a, amah in nang hong zozaw ding hi,” a ci uh hi.

¹⁴ Tua bangin Haman tawh amaute a kiho laitakin kumpipa’ innsungmangte hong pai a, Esther’ bawlsa nitak an a ne dingin amah a paikhiatpih pah uh hi.