Daniel 5 - Tedim Bible

Kawm Tung a Laigelhna

¹ Kumpi a suah ciangin Belshazzar in pawi lianpi khat bawl a, a mi liante tulkhat samin amaute tawh zu a ne uh hi.

² Zu a nek laitakun, Belshazzar in a pa Nebukhadnezzar in Jerusalem biakinnpi panin a puakkhiat ngun hai, kham hai, le kuangte a va la dingin thu a pia hi. Kumpipa in a miliante le a zite le a zineute in tua haite tawh zu a nektheih nadingun hai la dingin thu a pia hi.

³ Thakhatin kham haite, kuangte hong paipih uh a, a vekpi-un tua haite tawh zu a ne uh hi.

⁴ Amaute in zu ne uh a, kham tawh, ngun tawh, sumngo tawh, sik tawh, sing tawh, suang tawh a kibawl pasian-te a phat uh hi.

⁵ Thakhat thu-in kumpi innsung meivak a taan penna lam kawm tungah mihing khut khat hong kilangin lai a hong gelh hi. Tua khut in lai a gelh laitak kumpipa in a mu hi.

⁶ Tua ciangin kumpipa lau lua mahmah a, a mai daang gawpin a khut a ling kauhkauh hi.

⁷ Amah in mitphial siamte, aisan siamte, aksi et siamte va sam pak un, ci-in a kiko hi. Tua mite a hong tun uh ciangin kumpipa in, “Hih lai kigelh a sim thei, a khiatna a hong gen thei peuhmah kumpi puanpi silhsakin, minphatna khamkhi a ngawngah ka oksak ding a, kumpi gam sungah a za lian a thumna-in ka koih ding hi,” a ci hi.

⁸ Kumpipa’ thudot mite hong tung uh a, ahih hangin tua lai a sim thei le kumpipa tungah a khiatna a gen thei kuamah a om kei uh hi.

⁹ Tua tak ciangin kumpi Belshazzar lungkham mahmahin a mel daang semsem a, a miliante in a cih nading mel a thei kei uh hi.

¹⁰ Kumpipa le a miliante gamlum ngeingai-in a om laitakun, pawi inn sungah kumpinu hong lut a, “Kumpipa aw, sauveipi nungta in. Bang hangin lungkham lua-in na mai daangsak zenzen na hi hiam?

¹¹ Na gam sungah Pasian’ kha a nei mi khat a om hi. Na pa kumpi ahih laitakin, tua mipa in pasian-te’ pilna tawh a kibang pilna, theihna le lungsim navakna a nei hi. Tua hi a, kumpi ahi na pa Nebukhadnezzar in tua pa pen aisan theite, mitphial siamte, khongkhai siamte, le aksi et siamte’ ukpi dingin a koih hi.

¹² Amah in a kanzaw siamna nei a, mangkhiat siamna, thudotna haksa nonote dawntheihna, le thuthukpite gentel theihna a nei hi. Tua ahih ciangin kumpipa in Beteshazzar ci-in a min a phuah Daniel samsak in. Tua hileh amah in a hong gen thei pah ding hi,” a ci hi.

¹³ Tua ciangin thakhatin kumpipa kiangah Daniel a paipih uh hi. Kumpipa in, “Nang Daniel pen kumpi ahi ka pa in Judah gam panin a hong lakkhiat Jew mi salte khat hi lo na hi hiam?

¹⁴ Nangma sungah Pasian’ kha om ahih manin siamna nei-in, lungpilna le theihna na neihlam ka thei hi.

¹⁵ Ka thudot mite le mitphial siamte, hih lai kigelh a sim ding le a khiatna a gen dingin a hong pai uh hinapi, a khiatna a theizo kei uh hi.

¹⁶ Ahih hangin nangmah in thuthukpi le kuama theih zawh loh thute gen thei hi, ci-in kong zazo hi. Hih lai kigelh sim thei-in a khiatna nong gen theih leh kumpi puansan kong silhsak ding a, minphatna khamkhi na ngawngah hong oksakin, kumpi gam sungah a za lian thumna-in ka hong koih ding hi,” a ci hi.

¹⁷ Daniel in kumpipa kiangah, “Letsong pen kei hong pia kei inla, midang khatpeuh piazaw in. Ahi zongin tua lai kigelh hong simsakin a khiatna kumpipa kong hilh ding hi.

¹⁸ A Lianpen Pasian in na pa Nebukhadnezzar kumpi lianin koih a, zahtakna le vangliatna a pia hi.

¹⁹ Amah lianlua mahmah ahih manin gam khempeuh, nam khempeuh, pau khempeuhte in kihta-in a ling uh hi. Mi khatpeuh a thahnop leh that a, a nuntaksaknop leh a nungtasak hi. A ut leh mi khatpeuh pahtawi-in, a ut leh a daisak thei hi.

²⁰ Ahih hangin amah a lung khauhin kiphasak a, gilo lua ahih manin a kumpi tokhom panin kilakhia a, a minthanna a taan hi.

²¹ Mihingte lak panin amah kihawlkhia a, ganhing lungsim a nei hi. Gam sakolte tawh tengkhawmin, bawngtal bangin lopa ne a, daitui dal ding nei loin a pualamah a lum hi. A tawpkhakna-ah a Lianpen Pasian in mihingte’ kumpi gamte uk a, a teel peuhpeuh kumpi suak hi, ci-in a phawk thei hi.

²² “Ahih hangin a tapa ahi nangmah Belshazzar in hih thu khempeuh na theih hangin na kiniamkhiat tuan kei hi.

²³ Vantung Topa’ langah na pang hi. A biakinnpi hai le kuangte la-in sabuai tungah nangmah tawh, na miliante tawh a zineute le na zite uh tawh zunekna-in na zang uh hi. Theihna a nei lo, a mu thei lo, khua a za thei lo ngun, kham, sumngo, sik, sing, le suang tawh a kibawl pasian-te’ min na phat uh hi. Na nuntakna le na hihna khempeuh a hong uk Pasian na zahtak kei hi.

²⁴ “Tua ahih ciangin Pasian in hih laimalte tua khut a hong gelh sak hi.

²⁵ Tua a kigelh laimal pen hih bang ahi hi: Mene, Mene, Tekel, Parsin.

²⁶ A khiatna zong hih bang ahi hi: Mene pen kisim a cihna hi a, Pasian in na gam ukna hong simsak a, a beisak ta hi, cihna ahi hi.

²⁷ Tekel pen kitawikhai a cihna hi a, nang hong kitawikhai-in na lek zo kei hi, a cihna ahi hi.

²⁸ Parsin pen kikhen cihna hi a, na gam kikhen khamin Media le Persia-te a kipiazo hi, a cihna ahi hi,” a ci hi.

²⁹ Tua ciangin Belshazzar in Daniel pen kumpi puansan a silhsak dingin thu pia pah a, minphatna khamkhi a ngawngah a oksak hi. A gam sungah a za lian thum nadingin a koih hi.

³⁰ Tua zan mahmahin Babylon kumpipa Belshazzar kithat a,

³¹ Media mi Darias kumpi a suak hi. (Tua laitakin Darias kum sawmguk le kum nih a pha hi.)