Amos 6 - Tedim Bible

Israel A Kisuksiatna

¹ Israel minamte in muanin a hong neih, i minam lakah ulian ahi, Zion-ah nuamtakin a om hithiat, Samaria-ah lungmuang takin a om note a dingin zumhuai mahmah hi.

² Kalneh khua-ah pai unla limtakin va en un. Tua ciangin Hamath khuapi lian ah va paisuak unla, Filistia-te’ khuapi Gath khua dong va paisuk un. Judah le Israel kumpi gamte sangin hoihzaw tuan a, amaute’ gam pen note’ gam sangin lianzaw tuan ahi hiam?

³ Note’ tungah siatna hong tun ni ding, a kipelh theih nading na hanciam uh a, ahi zongin tua bang na hihnate un, siatna khangsak semsem zawsop hi.

⁴ Saiha kibawl lupna tungah a lum hithiat, tutphah nip tungah a kizia hiathiat, tuuno sa le bawngno sa, duhduhin a ne note in gimna na thuak ding uh hi.

⁵ David bangin la phuah nuam na sa uh a, lasaknate na tum nuam uh hi.

⁶ Leenggahzu hai lianpipi-in na dawn uh a, sathau hoihpente tawh na kizut uh hi. Ahi zongin Josef minamte’ siatna hangin themkhat zong na dah het kei uh hi.

⁷ Tua ahih ciangin note pen salin a pai masa pente na hi ding uh a, na nopsakna teng uh a beita ding ahi hi.

⁸ Topa Pasian thupi takin kiciam khin a, Topa, Vanglian Pasian in hih bangin ci hi: Israel-te’ kiphatsakna ka hua a, a munmuanhuaite uh ka mu nuam kei hi. Tua ahih manin a khuapi le a sunga a omteng, galte’ khut sungah ka pia ding hi.

⁹ Inn khat sungah mi sawm bek nangawn a suakta a om laina a om leh, tuate khempeuh zong a si khin veve ding hi.

¹⁰ Mi khatpeuh a sihna inn panin a vui dingin a si puakhia-in, a behte khatpeuh hong pai ciangin, innsung tawngah a bu mi khatpeuh kiangah, “Hih lai-ah a si dang a om hiam?” ci-in a dot ciangin, “Om lo hi; pau kei in. Topa’ min na lawhkhak ding kidawm in,” ci-in kidawngkik ding hi.

¹¹ Topa in thu a piak ciangin inn liante kisatzanin inn neute kisatnen ding hi.

¹² Sakolte, suangkeen tungah tai thei ngei a, bawngtalte tawh tuipi tung kikho thei ahi hiam? Tua hinapi-in note in thutang, gu na suaksak uh a, thuman, a khial na suaksak uh hi.

¹³ Lodebar khua bang lel na lakzawhna uhah na lungdam uh a, “Eima thahatna tawh Karnaim khua i lazo hi,” na ci uh hi.

¹⁴ Topa, Vanglian Pasian in hih bangin ci hi: No Israel mite a do dingin minam khat ka khangsak ding a, leilu lamah, Hamath khua lutna ciangka panin, leitaw lamah Arabah lui kikal dong, note hong nuaigawp ding uh hi, a ci hi.