Amos 1 - Tedim Bible

Israel-te’ Kiima Om Minam Dangte tungah Thukhenna

¹ Tekoa khua-a a teng tuucingte lakah Amos a kici mi khat om hi. Uzziah pen Judah kumpi hi-in Joash’ tapa Jeroboam in Israel kumpi a sep laitak, zinlin’ ma kum nih hun laitakin Pasian in Amos tungah hih thute kilangsak hi.

² Amos in, “Zion Mual panin Topa hong hawksuk a, Jerusalem khua panin hong awngkek hi. Tua ahih manin lonona gamteng keugawp a, Karmel mualdawn dum dide teng kausan ta hi,” a ci hi.

Syria Mite

³ Topa in hih bangin ci hi: Damaskas khuamite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in an gawina suang tawh gawizan bangin, Gilead gammite gawigawp uh hi.

⁴ Tua ahih manin Hazael innkuante mei tawh ka hal ding a, a meikuang in Kumpi Benhadad’ munmuanhuaite kangtum ding hi.

⁵ Damaskas khuakulhpi zawlte ka sutan ding a, Aven Kuama teng mi khempeuh le Betheden Kuam sungah a om gam ukte khempeuh keimah in ka susia ding a, Syria mite ahihleh Kir gamah salin kipaipih ding hi.

Filistia Mite

⁶ Topa in hih bangin ci hi: Gaza khuamite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in minambup khat sal dingin manin, Edom mite tungah ap uh hi.

⁷ Tua ahih ciangin Gaza khuapikulh ka kangsak ding a, a munmuanhuai teng a kangtummang ding hi.

⁸ Ashdod khuapi-ah a teng mite ka lakhia ding a, Ashkelon khuapi ukte ka beisak ding hi. Ekron khuapi ka sugawp ding a, Filistia mi a omlaite si ding uh hi.

Taia Mite

⁹ Topa in hih bangin ci hi: Taia khuamite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in minambup khat Edom mite tungah ap uh a, lawmta dinga a thuciamna uh zui lo uh hi.

¹⁰ Tua ahih ciangin Taia khuapikulh ka kangtumsak ding a, a munmuanhuai teng kangtummang ding hi.

Edom Mite

¹¹ Topa in hih bangin ci hi: Edom mite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in a sanggam uh Israel-te namsau tawh delh uh a, hehpihna lungsim nei lo uh hi. A hehna uh damsak ngei lo uh a, a tawntungin heh niloh uh hi.

¹² Tua ahih ciangin Teman gam sung khempeuh ka kangtumsak ding a, Bozrah khuapi munmuanhuai teng kangtum ding hi.

Ammon Mite

¹³ Topa in hih bangin ci hi: Ammon mite thumvei a khialh khit, a liveina hangin pel loin amaute gim ka pia ding hi. Bang hang hiam cih leh amaute in huaihamin gam a deihthuah manun Gilead gam simgawp uh hi.

¹⁴ Tua ahih ciangin Rabbah khuapikulh ka haltum ding a, a munmuanhuai teng khempeuh kangtum ding hi. Galdo a kikona aw ging ding a, tua kidona awging khuapi huihnung bang ding hi.

¹⁵ A kumpipa uhleh a uliante uh salin kiman ding hi.