2 TIMOTI NIHNA 4 - Tedim Bible

¹ Pasian’ mai, le a hingte hitaleh a site hitaleh mi khempeuh’ thu a khen ding Khrih Jesuh’ mai-ah nakpitakin ka hong hanthawn hi. Amah Kumpi-in hong paikikin ukna hong kipan ding ahih manin,

² hunhoih hunsia cih khen tuan loin Pasian’ thu hilh ding na kin ngaihsut nading, lungduaina tawh mite’ lungsim zo-in, mite taii-in, hanthawnin na hilh nadingin thu a hong pia ka hi hi.

³ Mite in thuman a ngaih nop loh hun, amaute’ deihna bek a zuihnop hun, amaute’ zaknop thute bek a gen ding sia a cial thuahthuah hun hong tung ding hi.

⁴ Amaute in thuman thutak ngainuam nawn loin tangthu phuahtawm peuh ngaihsutpi-in nei ding uh hi.

⁵ Ahi zongin nang na hih leh thu khempeuhah na lungsim ki-ukin haksatnate na thuak inla, Pasian’ thugen nasep semin, na nasepna-ah maa na tun in.

⁶ Kei ka hih leh Pasian biakna-in hong kipiak ding hun hong tungta hi. Hih leitung nuntakna ka nusiat ding hun hita hi.

⁷ Kidemna-ah ka hat tawpin ka hih khin a, a mong dongin ka tai khin a, upna thu khotakin lenin ka zokhin hi.

⁸ Thu a manin a khen Topa in tua Ni ciangin kei a hong piak ding thuman lukhu ahi gualzawhna thaman in tu-in kei hong ngak gige hi. Kei tung bekah a hong pia ding hi lo a, ama hong paikik ding itna tawh a ngakte khempeuh tungah zong a pia ding ahi hi.

Pumpi tung Thugenna

⁹ Kei kiangah na hong pai baih theih nadingin hong hanciam in.

¹⁰ Demas in hih leitung thu kinzaw ahih manin kei hong nusia-in Thesalonika khua-ah a pai hi. Kresen, Galatia gamah pai a, Titus, Dalmatia gamah pai hi.

¹¹ Luka bek kei kiangah om hi. Marka in nasepna-ah nakpitakin hong huhthei ahih manin na hong pai ciangin amah hong tonpih in.

¹² Tikhikas ahihleh Efesa khua-ah ka paisak khin hi.

¹³ Na hong pai ciangin Troas khua-ah Karpas kianga ka nusiat ka puantualpi hong pua inla, laibute zong, a diakdiakin savun laidalte tawh zong hong pua in.

¹⁴ Sikseekpa Alexander in kei tungah siatna lianpi hong bawl hi. Ama gamtatna tawh kizui-in Topa in thuk ding hi.

¹⁵ Amah in i thuhilhna nakpitakin nial ahih manin amah tawh kisai-ah nangma pumpi kidawm mahmah in.

¹⁶ Keimah kihut nading thu ka gen masak ni-in kuamah in hong koppih loin hong taisanmang uh hi. Tua thu hangin mawhsakna thuak kei beek uh hen!

¹⁷ Ahi zongin Topa in kei hong ompih a, Gentail mi khempeuh tungah Pasian’ thu a kicingin ka gentheih nadingin thahatna a hong pia hi. Tua ahih manin sih nading thukhenna pan hong suaktasak hi.

¹⁸ Topa in siatna khempeuh panin kei hong honkhia ding a, ama vantung gamah muanhuai takin hong tunpih ding hi. Amah in a tawntungin minthanna ngah tahen. Amen.

Vaikhakna

¹⁹ Prisilla, Aquila, le Onesiforas-te innkuan na hopihsak in.

²⁰ Erastas, Korin khua-ah omlai hi. Trofimas, Miletas khua-ah a cina-in ka nusia hi.

²¹ Phalbi tunma-in nong pai theih nadingin hong hanciam in. Eubulas, Pudens, Linas, Klaudias, le i sanggam dangte khempeuh in zong hong hopih uh hi.

²² Topa in nangmah hong ompih tahen. Note khempeuh tungah Pasian’ hehpihna thupha hong tung tahen.